殺人犯唔一定個個係好人

思然 oce
Jul 26, 2018 · 2 min read
Photo by Fancycrave on Unsplash

已經好幾年無去書展,所以無乜留意書展既消息,但今年書展實在多趣聞。

首先,警務處處長盧偉聰叫學生睇三國演義了解中國歷史,我見到仲以為係假新聞,特登Google一下。

然後,發展局局長黃偉綸早幾日一句「罪犯未必係壞人……同樣警察都唔一定個個好人」,本來都無乜人留意。點知,警察隊員佐級協會主席衝出嚟發聲明「評發展局局長黃偉綸先生之不當言論」,話「令公眾人士誤會⋯⋯大大傷害謷務人員的信心⋯⋯打擊警務人員士氣」。

完全唔明唔恰當喺邊,黃偉綸局長只係好似做緊小學時代學能測驗既文字推理題,即係:

罪犯不一定個個是壞人,同樣____不一定個個是好人 (a)中國人 (b)老師 (c)警察 (d)醫生

最直接既對比真係罪犯對警察吖嘛。

退一萬步,當局長唔係做學能測驗,佢係真心講「警察唔一定個個係好人」嘞,咁呢句有乜問題呢?呢句係包含佐「大部份警察都係好人」呢個意思,即係無人會講「殺人犯唔一定個個係好人」㗎嘛。你話局長講「警察唔一定個個係衰人」就話唔恰當啫。

一句「警察唔一定個個係好人」都傷害到警察信心,講到警察咁畏懼人言,咁畏懼局長之言,莫非講「警察唔一定個個係無膽匪類」恰當啲?

如果我係警察,我覺得警察隊員佐級協會更加傷害我既信心,明明我有無邊毅力捱盡困難考驗,明明我係立地頂天漢子,又點會俾一句嘢K.O.先。我稔我會講「警察隊員佐級協會不代表我」。

不過如果我真係警察,我就唔會有時間寫呢篇文,我應該奉處長籲煲緊三國演義了解中國歷史。


思然 oce

Written by

做緊特殊學習需要研究,研究過幼稚園無時間玩啲小朋友點樣偷雞玩同做朋友。轉行前做過電腦審計同資訊保安。Research on Special Education Needs. Interested in humor, play, and friendship in children. ex-CISA/ex-CISSP