英超背後,香港U22

你不會一個人行路!
香港大球場全場爆滿,大部分都穿上紅軍球衣,識唱跟住唱,唔識唱都高聲叫,氣氛之好,讓人忘記自己在香港大球場。

對上一次香港大球場因爲足球比賽爆滿,我懶得翻查紀錄,就個人經驗而言,是香港對阿根廷,那場波印象最深,除了雨傘革命和美斯,就是香港「球迷」罵葉鴻輝,叫他開龍門球開得快點,作為香港人我覺得好醜。另一場印象深刻,令香港大球場爆滿的賽事,是好多年前南華殺入亞協四強,全場撐南華,香港大球場真真正正成為香港球隊主場,難得。當然講到威,唔可以數漏東亞運金牌那場決賽。

香港球迷好現實,通常殺到入最後階段至捨得真金白銀買票入場,然後影張相放上網,寫句「香港足球好波」。嗱,我唔會話係壞事,至少他們識揀波睇,講到揀波,香港人確實有一手,英超、西甲高水平,又包裝得好,當然多人揀來睇。本土貨?有時我覺得,迫人支持都幾無禮貌,一件貨物優質,何須迫人支持呢?我絕對尊重落場踢港超的球員,他們肯定是香港水準最好的一群,即是你想睇香港踢波最勁班人,就要入場睇。但一個聯賽能否引起注意,除了球員和水準,推廣更為重要。

港超少人睇,都算明白,包裝零售做得唔夠好,但作為香港人,總要支持香港隊,我的意思是,盲撐。打個比喻,曼聯跟利物浦在香港大球場踢,同時香港隊在旺角場比賽,那一定要去旺角撐場,至少我會這樣選擇,他們可是代表這個城市,而我,就是香港人。

英超亞洲盃這兩天令我有點感慨,就在球迷為英超球星為之瘋狂的時候,香港有班年輕人,穿上香港隊波衫遠赴北韓搏命,卻無乜人理會。今次他們代表香港可要冒兩個險,一,去北韓唔小心拎張海報隨時無命,二,他們為香港踢比賽,不只在場跑跑跳跳,而是冒著受傷的危險,誇張點講,唔好彩的話隨時斷腳。但是,又有幾多香港人,甚或至球迷會留意他們在U23亞洲錦標賽的發展。經過整個星期的奮鬥,他們取得一勝兩和,連主隊北韓都贏不到他們,雖然未能晉級,成績已算不錯,可惜球迷記得的,就只是利物浦贏李斯特城。

睇唔睇無得迫,夾硬要從來唔入場,甚至唔留意的人入場睇本來無概念的東西,對他也構成很大傷害,世間上大部分事情,還是主動去做才能成就美麗的東西。我只不過覺得,香港人至少可以關心一班為自己地方賣命的人,給他們鼓勵。要求還是太多?那睇條新聞,知道他們的存在,就夠了。

他們值得受到多一點尊重。


來自2017年7月25日