我在律師樓打工的日子 (上)
律師樓常給人專業的感覺，好多人以為在當中工作一定很有錢途和前途。無綫當年套《壹號皇庭》將從業員的生活注入無窮浪漫及英雄元素，紫醉金迷。十多年前，我也有機會成為他們的一員，先後在兩間律師樓工作了大半年。以第一身觀察，發現原來這個行業只不過是「鱷魚頭老襯底」，好多人得個樣。
當年我臨近畢業前，努力研究jobsdb、careertimes等求職網站，輸入 “law
clerk”、“legal assistant”等字眼，均出現大量職位空缺。當時心想，那麼多職位空缺，我又有學歷，又怎會失業？
第一份見成的legal assistant工作地點位於金鐘，當時in我的不是律師，而是一位中年的女秘書，會談30分鐘後她便說聘請我。過程很正面，她說只要肯學肯做就得。但我感到奇怪，為何面試不用見律師呢？離開時，看見一位穿鮮紅色冷衫的地中海亞伯在房間和另一位女職員談話，我想這位便是老細了。幾日後秘書致電我簽約，不過簽約後7天再次收到她的電話：「莊生，原本做你果個位既老師爺，佢諗諗吓都係唔走哪。唔好意思，你就當冇事發生過啦........」說罷便掛了線。我人生第一份工，未上班便被炒了，剛好7日通知，終於知道點解個律師一直唔出面。
小小挫折等於激勵，我又繼續寄CV，不久又有interview。這間律師樓位於畢打街，規模較大，佔大半層樓，不過裝修十分殘舊。面見我的是一位約40歲的男合伙人，面試前我上網起佢地底，知道他同時擁有律師和會計師專業資格。他十分友善和踏實，會談1小時後便說請我。點知，返工第一日知道我唔係跟佢，而係跟另一個女合伙人。
呢個女合伙人是公司第二把交椅，之後簡稱女波士，她在HKU law及PCLL畢業，是blue blood。大老細係一個亞伯，同我一樣主修歷史，後來再讀law，當時我以為可以步他後塵。
當年大學宿舍已行光纖上網，但律師樓的電腦竟然上唔到網，每一部都係孤島，間唔中仲會聽到打字機的聲音，影印房長期有同事係到講是非。返咗幾日工，知道公司走咗好多人，開始有啲驚......
某天，女波士係新界區分行安排咗個senior clerk過來我同地一班新人做training。呢個auntie三十多歲，一開口就係咁數臭女波士，仆街含家剷全部粗口出齊，大概係抗議女波士針對佢，調走佢冇得返中環，又話公司規距做錯嘢要賠錢。賠錢？我仲未出糧哦，啲嘢又唔識做，邊有錢賠？我又開始驚。auntie教我地做樓契註冊，填大堆政府文件，好多仲要用打字機打......聽咗成朝唔知up乜。自己話晒都係大學生，篇畢業論文都寫咗成十萬字，對住堆admin嘢感到十級無力。
坐我後面有個中年大叔，日日著寶藍色西裝，梳八两金頭，仲成日帶住隻閃令令勞歷士，成日大大聲講電話。佢係律師樓既師爺，讀書唔多，但因為做得奈儲客多，成為女波士的主要客人來源，每單交易佢都會有分成。入職不久，女波士叫佢教我做嘢，但成個星期都冇搵過我。某日早上，我偷聽到八两金同女波士講：「X律師，我真係唔想教人，我都好忙.....」我知道，果個「人」就係我。
不久公司來了一個三十多歲女律師M，都幾好樣，女波士叫我跟佢。佢上職不久就被同事起了朵，叫「大秘書」。原來，當年她由女秘書做起，半工讀London U在HKU Space開辦既LLB。當年Space仲有開PCLL，讀完可以做律師，佢就係昔日獅子山下的奮鬥典範。如此，我就做咗「大秘書」既秘書。M對我好好，很有禮貌，又肯教我嘢。一次公司開會，見到佢既無力感。
「你地呢個月有咩單、有咩客？」女波士充滿霸氣地捽數。八两金當然面不改容，因佢大把客係手。呢刻我如夢初醒，發現原來律師都要跑數，《壹號皇庭》冇講。有知識、有技術都冇用，到最後都係講錢。M後來知我係大學生，問我：「你點解入呢行做呀？你可以做博物館、教書哦，唔好浪費時間啦﹗」一言被驚醒，人生第一次就係咁樣祼辭咗。Last day她請我在置地廣場食日本嘢，第一次食牡丹蝦，十分鮮甜。呢餐飯埋單成幾千蚊。
我在律師樓打工的日子(下)
當年好勝的我仲未心息，又繼續寄CV去律師樓，有一間係信德中心既律師樓叫我見工。呢間firm好細，入到會議室有個四十幾歲既女人見我，佢有啲情緒化同口臭，半個鐘後就話請我啦。雖然我唔太想做，但馬死落地行，當儲吓經驗。返工第一天先知道原來佢係律師，真係估佢唔到。
呢間律師樓以兩個人既名命名，但我奇怪由頭到尾得一個老細，原來另一個係佢朋友，係自願掛名，根本唔係到做，等人覺得間firm好大only。呢份工我唔係做樓契，終於有得掂較為接近《壹號皇庭》情節既litigation，每天往來法庭派送文件，好聽就叫clerk，唔好聽就叫office boy。
好多政府機構職員，對住啲律師樓clerk同送件姐姐擺出一副狗咀臉，經常呼呼喝喝，文件填錯一個字便彈回頭，好多送件姐姐返到公司受罰。不過，她們之間又會互相幫助，仗義幫行家順路派送較遠的文件，真係人間有愛。當時我十分扯火，以我的學歷竟要做這樣的工作、受這些氣。這些政府職員入職只需中五學歷，但人工已是我當時雙倍有多......
呢間律師樓很細，只有我和另一位秘書E。做了一個星期，發現老細喜怒無常，鍾意就成朝拉住我和E傾閒計，唔鍾意就鬧到我地狗血淋頭。老細也是blue blood出身，九龍塘著名女校畢業，之後在HKU完成LLB及PCLL。不過，佢既職涯就麻麻地，可能性格問題得罪人多。她的主要生意係做政府的duty lawyer，即係幫在裁判署認罪的犯人求情。佢唔需要辯護技巧，只要在法官面前扮死狗，表達悔意爭取減刑。
有一日，有一個其他律師樓的師爺A上公司和老細傾咗成朝。呢個師爺外表十分企理，戴粗黑眼鏡，十分自信。原來他上來R工做，說要大力發展呢間律師樓，我和秘書E聽到後偷笑。他向我展示了一隻光碟，內裡是他行走江湖多年來用的法庭文件template。其實，當時我在HKU SPACE讀緊London U既LLB，發覺讀既野同做既野完全冇關係......
某天，老細毛拉拉捉住我來鬧，我終於頂唔順，將放係抽屜的辭職信給了她，她當場呆了。後來，知道老細原來有思覺失調…… 師爺A安慰我，請我和秘書E在上環文娛中心的大排檔食lunch，說：「後生仔，做嘢唔駛咁衝動啊？」雖然，呢句說話當時對我來說仲難聽過粗口，但仍然多謝佢碟揚州炒飯。
兩年後我又再與律師結緣，不過唔係做clerk、唔係做office boy，而係做法律記者，一個《壹號皇庭》裡沒有的角色。法庭職員冇再向我呼呼喝喝，因為我有記者證，有筆和相機，有權柄記錄一切法庭內的事。警官和檢控官也不能對我太無禮，因記者有採訪權，可向律政司甚至法官投訴。而最重要的是，每個法庭內有我的專座——記者席。終於，爭。返。口。氣。
某天，在區域法院內重遇當日天天鬧到我狗血淋頭的老細，她當時正在庭內為犯人求情。我坐在記者席第一個位，全程望著她，小心記下從她口中所出的每一個字。她十分害怕地望著我，口震震，像為自己求饒。不知她擔心在庭上被記者捉到錯處，還是在庭外被捉到不可見光的事.......那一刻，我感覺自己像《流氓大亨》中的萬子良一樣，由失意的牛雜小販成為有錢佬，爭返口氣。
之後，有人說她每次來法庭工作都驚驚青青，見到記者會調頭走。之後我又遇見師爺A，不過佢已唔認得我了，正跟隨另一位律師工作。半年後，秘書E電郵一篇新聞給我，說這位當年天天鬧到我們狗血淋頭的老細，騙了客人100萬元被捕後判監5年。當時，我已轉任marketing工作，沒機會報道這單法庭新聞，就當無事發生過。
