Jesuh Khrih Ngeih — Deihnak

Minung vialte nih kan duhmi hi deihnak a si. Cu deihnak cu a lenglei deihnak kan timi, ram pakhat le pakhat karlak ah deihnak, minung hawi karlak ah deihnak, tbt. men kha si loin kan chunglei nun hrim hrim ah deihnak hmuh kan duh.

Nain, Jesuh Khrih he pehtlaihnak a ngei lomi cu kan thinlung aa din kho lo. Phundang in chimh ahcun, kan thinlung ah deihnak a um kho lo. Room a tha taktak mi pakhat pi ah kan um zongah kan thinlung a vaivuan i, ihnak ttha tuk ah kan ih khawh ko zongah kan thinlung a re a thei. A donghnak ahcun, vawlei tei cu um rih seh, kan khuaruahnak hmanh kan tei lo.

Kan thinlung kha aa din bal lo caah khua kan ruah tik zongah kan lung a sau kho lo. Kan ai hna a puang i, a herh lo tukmi thil cung hna ah kan thin a hung. Cu vialte kan nunnak ah a rak canmi cu kan thinlung kha a rak zaw. Kan lenglei ah kan i panhter lengmang ko zongah kan chunglei ah thihnak phun phun a rak um.

Minung hi Bawipa he kan i pehtlaih hlan lo chung paoh cu kuaika hmanh ah thinlung deihnak timi hnangamnak kan hmu kho lo. Ram a deih zongah kan thinlung a dai lo i, harnak kan ton lo zongah kan thinlung a dai lo. Cucaah, thinlung daihnak timi hi ram a daih ahcun a dai dingmi khi si loin kan thinlung a uktu ding Pathian kan nunnak ah kan ngeih lawng lawng ah a dai dingmi khi a si.

Cucaah, thinlung dinhnak hmun timi hi rumnak a si lo. Phundang in chimh ahcun, sermi thil hna lak ah a um lo. Sertu sin lawng lawng ah a ummi a si. Cucaah, sertu he pehtlaihnak kan ngeih ahcun harnak lak zongah kan thinlung aa din. Phundang in chimh ahcun, kan tonmi thil kip ah khan kan thinlung aa din kho. Nain, Bawipa he pehtlaihnak kan ngeih lo ahcun kan tonmi thil kip nih khan thinlung retheihnak a kan pek.

Bawipa he pehtlaihnak ngeih a biapi tuk mu. Amah he kan i pehtlaihnak lawng lawng hi minung thinlung deihnak a pe tu a si. Cucaah, Bawipa he pehtlaihnak ngeih daithlang hna hlah uh sih.