【搣走晒啲「威化餅」】245萬LANCIA Delta Integrale活化+升級
Sep 5, 2018 · 4 min read
Text: John Chan
Photos: Automobili Amos/Newspress U.K.
80年代中晚期至90年代初生產嘅Lancia Delta Integrale,唔少都有車身生銹問題,見過有少部份,生銹到好似朱古力威化餅咁,用鏍絲批輕輕敲一敲,碎晒。
當然,Lancia Delta Integrale係好車。外形,相信以後都唔會再有啲咁有霸氣嘅意大利高性能Hatchback;歷史,贏過咁多場世界越野錦標賽(WRC),咁輝煌嘅戰績,有今生,冇來世。



意大利Automobili Amos啱啱喺Grand Basel公布,推出20部,經過活化同升級嘅LANCIA Delta Integrale。所謂活化,就係將原有車身拆走,改用手打鋁製車身。引擎艙蓋、車頭最前端(燈罩、鬼面罩、泵把)、車身後幅都以碳纖製造,令車重大幅減磅90kg至1250kg。留意,原有嘅後車門已被封死⋯⋯吖!呢樣有少少失望,唔夠原汁原味。





原有嘅2公升直四Turbo引擎經過大修同升級,包括進、排氣歧管、全新冷卻系統,大修嘅差速箱同經過強化嘅波箱,以應付加大後嘅335匹馬力。
車廂內櫳全部翻新,有唔少碳纖維襯飾,全新嘅按掣,Recaro桶型座椅。首批公布圖片嘅內櫳以啡色為主調,80年代味濃到滿瀉。






每部盛惠27萬歐元,即約245萬港元。你估呢條水做得掂,呢間公司遲啲會唔會好似Singer咁,你交部車俾佢,佢幫你度身訂造,升級到要幾靚,有幾靚⋯






