【高清．多圖】三菱Delica D:5大轉款獨配Diesel偈

Text: John Chan

Photos: Mitsubishi Motors Corporation

對大多數日本以外嘅三菱fans而言，今代Delica推出12年之後，終於有大轉款（Big Minor Change，BMC），係開心嘅。

但要留意，今次只係BMC，唔係全面轉款/換代（Full Model Change，FMC），想睇下一代Delica？睇怕至少要等多三幾年。

先講動力配搭，電油引擎「全退」，只有一款柴油（Diesel）偈，究竟發生咩事？

據三菱商品戰略本部商品企劃主任渡邊伶子表示，今次大轉款之前，有90%嘅Delica買家，都係選擇柴油引擎版（Clean Diesel柴油引擎版自2012年追加，見下圖），廠方決定集中資源，用得其所。

渡邊伶子話開發團隊喺發展大轉款版本時，曾經反思「何謂Delica嘅可貴之處與特色？」，最終敲定8前速自動波箱配柴油Turbo引擎。

圖為2012年起增設之Delica D:5 Clean Diesel版本所配之柴油引擎

新引擎低至2000rpm已輸出38kgm峰值扭力，而且仲好慳油，電油引擎望塵莫及

明晒嘞。換句話：除非三菱為出口版Delica配搭電油引擎（有傳聞配1.5公升電油Turbo引擎配CVT或8AT），否則，Delica點樣BMC，都唔關香港巿場事。

如果睇到呢度走人，確實無可厚非。

有興趣留低嘅，歡迎你。

BMC Delica嘅柴油引擎，編號4N14，屬共軌式附中冷器嘅柴油Turbo格局，2.2公升直四汽缸，最大馬力145匹/3500rpm，峰值扭力38.7kgm/2000rpm，每公升柴油可以行到13.6公里（日本JC08耗油測計標準）。

呢期日本MPV車頭、鬼面罩設計有咁誇得咁誇，大轉款Delica都唔例外，要劈頭真心讚佢靚，唔易

講真，以Delica介乎1940kg至1970kg嘅車重，又要載7至8個人，兼想喺越野路有啲睇頭同強勁低扭，堅係需要柴油引擎㗎。

今次應用喺大轉款Delica嘅4N14系列引擎，配備尿素SCR系統，呢樣係三菱私家車嘅第一次。廠方好老實話：日本國內嘅廢氣排放要求愈見嚴格，喺2022年更會以「實際道路行車測試」評定新車廢排水平，暗示唔落重料降低廢排水平，唔會有將來。

目前日本保有（即已出牌，有做年檢嘅）MPV約40萬部，三菱約佔4萬部，廠方話好有信心可以擴大佔有率。

點解咁有信心？憑乜？

渡邊伶子話Delica係一部全面嘅MPV，有四驅，有高剛性肋骨式車架，巿場上無對手。

大轉款Delica特別著重提升車廂華貴程度，例如用更佳賣相嘅木質（胡桃木紋或黑鋼琴木）或珍珠質感嘅飾件，座椅坐墊及背墊都有獨特嘅圖案及紋狀。

另外，喺全新五個位置，包括天花、擋風玻璃、引擎艙、車側同地台，改良及加裝厚硬物料吸音、另以多孔或特殊表面物料遮音。

從上至下：天花、車頭擋風玻璃、車頭及引擎艙、車側及地台都重點增加及改良吸音與遮音物料

除咗標準版以外，亦新增URBAN GEAR版（頭泵把、鬼面罩、尾燈組有多組電鍍飾件），仲有一大堆dealer option，大把嘢玩。

過去一年多，日本多處遇上天災，本土巿場對高載量四驅MPV需求突增。

今代Delica即使已推出12年，憑住高離地距、四驅系統，平均每月賣出千多部（今年頭六個月賣出7233部，日本自販連數字），雖然難與豐田Voxy或日產Serena匹敵，但總算不乏識貨之人，老而彌堅。

幾時有下一代Delica？吖！太長遠喇，懶得諗。