【17, 18, 19肉搏戰】SUZUKI Solio Mild Hybrid靠7速加減升呢

PowerPlay HK

9 min readSep 2, 2018

Text & Photos: John Chan

一個飯局上，某君話：「我以為Suzuki Solio只係13、14萬（連稅）左右」

講真，我都想。

但係，而家乜都貴晒。

上網望望幾個香港有售嘅日本同德國牌子車價表，想買部1000c.c.至1500c.c.嘅五門揭背車仔或「超微型MPV」（日本汽車業界稱為Compact High Wagon），最平都17、18萬。

⋯⋯13、14萬⋯⋯已經係好多年前喇。

喺17（16萬尾都計埋嘞）至19萬幾，呢個咁窄嘅價格帶，排名不分先後，有Toyota Spade（$179k）、Honda Jazz 1.3（$168k）、Jazz 1.5 RS（$193k）、Suzuki 1.0 RSt（$168k）、Suzuki Solio Mild Hybrid（$188k）、Mazda2（$189k）、Volkswagen Polo Sport 230 TSI（$189k），如有數漏，請提一提小弟。

點解今次會試Suzuki Solio Mild Hybrid？

首先，我好耐冇揸過呢款車，而且，見佢銀碼都幾進取幾Chur，貼住19萬⋯⋯喂！俾多些少可以買部Jazz 1.5 RS。我相信有唔少人都會咁諗：「鬥空間大，我點解唔揀Jazz，人哋又1.5公升，又係Honda，引擎容積大你成300c.c.⋯⋯」

如果我都係咁諗，當然唔會約嚟試。直至執筆前一刻，我仍相信日本品牌陣營細車嘅定價，整體而言係「有根有據」，而且理據紮實，唔會「搏大霧」。

Suzuki Solio Mild Hybrid sell廣體空間，刻意拉盡四隻角空間，難怪四四方方，坐上司機位望前，的確好開揚。借用少部份用家成日掛在口邊嗰句：「唉吔！睇位好易呀，真係好易呀！」其實，而家啲德、日細車睇位又有幾難呀。

揸一陣，你會認同Solio Mild Hybrid係一部日本本土味好濃嘅細車，感覺同Spade相似，但偏偏呢種「日本味」強烈嘅車廂氣氛，又令人好受落，好就手，好易適應，兼且好親切。

Solio車廂天花離地距非常高，有1.36米，比我年頭試嘅Jazz RS 1.5 6MT（1.28米）更高，坐喺後座望向中控台，好開揚，冇傳統五門揭背小車咁侷促。一、二年班嘅小學生乘客可以直接行上車廂冇頂頭。

Solio車系一向sell雙趟門，兼且係兩隻都電動。事實上，相近價位同體積嘅小車，只有佢採用咁嘅佈局，我個人幾鍾意細車用趟門（包括豐田Spade），尤其是要間中接載長者或小孩，趟門就好好用。買車Budget同養車開支鬆動，當然可以諗吓Sienta、Noah、Serena、Stepwgn以至Alphard。

但係，如果買車、供車、泊車、養車都要「睇餸食飯」，我覺得Solio係幾值得考慮。

同剛才幾款相近價位嘅日本型號相似，Solio Mild Hybrid嘅椅背唔算厚，頭枕亦屬於扁平，擺明追求收藏緊緻程度多於舒適性，如果你唔明白佢嘅設計出發點，好易認定佢「單薄」「偷雞」，但係，坐墊幾軟熟同幾厚。我屁股算大，坐耐咗仍覺得幾舒服。

後排座椅可以50:50各自前後滑動，滑動距離最長達165mm，好啱載老人家去飲茶或帶小朋友去踩單車。佢哋上咗車，將座椅推前少少，椅背後夠位放張大size嘅摺合式輪椅或單車仔。椅背向後調校斜度達56度，遇上大塞車或「望不見家鄉」嘅公路慢流，不妨叫老婆或老媽子、外母等女性，較斜張櫈「眠一眠」，一瞓著，自然唔使俾人「鵝」。

兩張前座椅背各有摺合式小型餐枱、左右電趟門都有手電式遮簾⋯⋯呢啲唔係咩high-tech嘢，亦都講唔上有幾大驚喜，但原裝隨車跟埋，安裝緊緻。自問係顧及家人用車感受嘅無定向買家，見到咁嘅安排，係會對部車有好感，即時「自動加分」。

Solio Mild Hybrid配1.2公升（1242c.c.）直四自然吸氣引擎，91匹/6000rpm，峰值扭力12kgm/4000rpm。同剛才提過嘅1.5公升級自然吸氣型號比，馬力明顯細十幾匹至廿幾、卅匹。

再望望引擎容積最接近嘅Jazz 1.3，扭力幾乎一樣，輸出時間亦早1000rpm。Solio Mild Hybrid亦比Jazz 1.3輕近70kg，只有970公斤。所以，即使引擎馬力唔算好大，但勝在車輕，試車時只有我同代理人員，D波起步同早段加速算幾輕鬆。

喺香港買小車，要有預咗「坐滿」嘅心理準備，尤其是呢類有廣體空間設計嘅日系Compact High Wagon，就算唔會滿座，你總會搬吓嘢呀，出入吓迷你倉呀，當佢「白牌van仔」咁用。

歷年輸港嘅CVT波箱小車以至hatchback，往往都未必配有手動加減轉波功能，例如早年嘅Lexus CT200h同Toyota Spade。其實，只要稍為揸過呢類引擎波箱配搭嘅CVT車上斜路，都知道「加減波」好有效幫助用家善用動力。否則，有相當數量嘅駕駛者只顧一味死踩油門，又或者無奈呆等動力提升至「ok啦」嘅水平。

我唔敢輕率咁架上等號，爆一句：「因為Solio Mild Hybrid有加減波，所以要賣18萬幾」但呢個功能著實好實用同物有所值。

將波棍推到最底，轉去M波，以撥片控制加減。喺屯門公路，7個前速，我最常用4、5波，喺深井、青龍頭段上上落落、大欖上斜出九龍，要突圍爬頭或加速，動力話嚟就嚟，傳動質感算幾實淨，仲有少少棍波車味。

同本田今代1.5 Turbo Stepwgn嘅套CVT、Subaru XV嘅Lineartronic CVT 7速加減有得揮。一見路面暢通，轉返去D，食住慣性衝力，輕輕鬆鬆「溜」住去。住得遠，又想慳錢養車，一定係咁揸。

要彈佢一句，就係檔閘各個波檔距離頗近，例如由M波推返上D波，唔好太急，亦要輕手啲，否則好易推多一格。

4000rpm前嘅引擎聲浪仍算合理，聽落音質唔係「散」同「乾」，亦都feel得到引擎艙同駕駛艙之間嘅隔音有過認真處理，比起六、七年前，以至十幾年前嘅Wagon R，真係進步咗好多好多。

Solio Mild Hybrid嘅微混合動力系統（Mild Hybrid），肯定唔係咩新科技，近十年輸港嘅部份型號曾經配備。Suzuki嘅Mild Hybrid主力靠綜合啟動摩打發電機（Integrated Starter Generator，簡稱ISG）運作，佢喺短暫停車Start-Stop時，負責重新啟動引擎，效能比傳動交流發電機快，亦因以皮帶拉動引擎，介入嗰一剎那靜好多，震動極輕微。當你要大油加速，又或電腦認為條件許可情況下，ISG亦會俾力，輔助引擎輸出。

ISG喺剎車時回收動能產生電力，分別儲存於引擎艙內鉛酸電池及位於前座乘客座墊底部嘅鋰電池。鉛酸電池喺Start-Stop重啟引擎時，為ISG供電；而鋰電池因效能高，充電快，則在ISG為引擎補充動力時供電。

我好難具體、準確話俾大家聽Solio嘅Mild Hybrid系統，係唔係好efficient，又或者喺邊一個時間介入。但係，整體而言，喺靜止起動加速，同大油加速呢兩方面，我覺得Solio Mild Hybrid嘅低扭發放表現，遠比以往我所認識嘅1.2公升、1.3公升，以至1.4公升級自然吸氣引擎優勝。