ທາງເລືອກສຳລັບ Back-end developer ມີຫຍັງແດ່?
ໃນສ່ວນຂອງ Back-end developer ນັ້ນຂ້ອນຂ້າງຈະມີຄວາມທ້າທາຍຫຼາຍສຳລັບຜູ້ທີ່ສຶກສາດ້ວຍຕົນເອງ ຫຼື ອາດຈະລວມໄປເຖິງຜູ້ທີ່ກຳລັງສຶກສາເປັນວິຊາຊີບເລີຍກໍ່ເປັນໄດ້ ເພາະມັນເປັນສິ່ງທີ່ຕ້ອງໃຊ້ເວລາ,ຄວາມອົດທົນ ແລະ ຄວາມດຸໝັ່ນໃນການເຝິກຝົນຈາກໂປຣເຈັກນ້ອຍໆໄປຫາໂປຣເຈັກທີ່ຊັບຊ້ອນແຕ່ມັນກໍ່ບໍ່ຍາກເກີນໄປຖ້າຫາກວ່າທ່ານຍັງມີຄວາມຕັ້ງໃຈຢ່າງແນ່ວແນ່ທີ່ຈະສຶກສາມັນຢ່າງຈິງຈັງ ແລະ ບ້າເລືອດ.
ທາງເລືອກຫຼັກໆສຳລັບຝັ່ງນີ້ແມ່ນຈະເວົ້າເຖິງພາສາທີ່ໃຊ້ໃນການພັດທະນາ ແລະ ຍັງລວມໄປເຖິງບັນດາ library/framework ຕ່າງໆທີ່ຊ່ວຍໃຫ້ developer ພັດທະນາ App/Web ໃຫ້ມີປະສິດທິພາບຫຼາຍຂຶ້ນອີກດ້ວຍ.
PHP: ຖືວ່າເປັນພາສາຍອດນິຍົມທີ່ນັກພັດທະນາຫຼາຍຄົນຮູ້ຈັກດີ ເພາະເວົ້າໄດ້ວ່າເປັນພາສາທີ່ຄອງໂລກໃນຊ່ວງໜຶ່ງເລີຍກໍ່ວ່າໄດ້ເນື່ອງຈາກເປັນພາສາທີ່ມີ library ຫຼາຍ, ມີ community ທີ່ໃຫຍ່ ແລະ ທີ່ສຳຄັນ Content Management System (CMS) ໃຫຍ່ໆກໍ່ລ້ວນແຕ່ຂຽນຈາກພາສາ PHP ທັງນັ້ນ, ດັ່ງນັ້ນ ຈຶ່ງບໍ່ແປກໃຈເລີຍວ່າ: ເປັນຫຍັງ developer ຝັ່ງນີ້ສ່ວນຫຼາຍຈຶ່ງເຕີບໃຫຍ່ມາຍ້ອນພາສາ PHP.
Framework ຂອງ PHP: Laravel (ເອີ້ນໄດ້ວ່າຮິດກັນທົ່ວບ້ານທົ່ວເມືອງກັນເລີຍ), Yii, Symfony, Nette, Codelgniter,etc.

Node.JS: ກ່ອນອື່ນຕ້ອງເວົ້າໄວ້ກ່ອນວ່າ Node.js ບໍ່ແມ່ນພາສາໃດໆແຕ່ພາສາທີ່ໃຊ້ພັດທະນາແທ້ໆແມ່ນ JavaScript, Node.js ເປັນໂປຣແກຣມທີ່ເຮັດໃຫ້ເຮົາສາມາດຂຽນ JavaScript ສັ່ງການເຄື່ອງ Server ໄດ້, ດັ່ງນັ້ນ ນັກພັດທະນາເອງເລີຍເອົາມາໃຊ້ໃນສ່ວນຂອງ Back-end ໃນຊ່ວງປີທີ່ຜ່ານມາຖືວ່າ Node.js ກໍ່ໄດ້ຮັບຄວາມນິຍົມຫຼາຍຈາກນັກພັດທະນາທົ່ວທຸກຊອກທຸກມູມຂອງໂລກກັນເລີຍແຫຼະ.
Framework ຂອງ Node.JS: Express.js(ນັກພັດທະນາພາກັນນິຍົມໃຊ້),Hapi.js,Sails.js,Koa.js,etc.

Ruby: ວ່າກັນວ່າ Ruby ແມ່ນຂຶ້ນຊື່ໃນເລື່ອງຂອງຄວາມງ່າຍ,ຄວາມໄວ ແລະ ຢືດຢຸ່ນໃນການນຳໃຊ້, ດັ່ງນັ້ນມັນຈຶ່ງເໝາະກັບໂປຣເຈັກທີ່ມີຂະໜາດນ້ອຍຫາປານກາງ.
Framework ຂອງ Ruby: Ruby on Rails,Sinatra,Padrino,etc.

JAVA: ເປັນພາສາທີ່ສາມາດ Run ໄດ້ທຸກລະບົບປະຕິບັດການ ຫຼື ອາດເວົ້າໄດ້ວ່າເປັນພາສາຄອບຈັກກະວານເລີຍກໍ່ວ່າໄດ້, ໄດ້ຮັບຄວາມນິຍົມຢ່າງຫຼວງຫຼາຍຍ້ອນມັນສາມາດ Run ໄດ້ຫຼາຍ platform ແລະ ເຫດຜົນອີກຢ່າງໜຶ່ງກໍ່ຄືມັນເປັນພາສາເຊີງວັດຖຸ(OOP) ນີ້ຈຶ່ງເປັນຈຸດເດັ່ນຫຼືຈຸດຂາຍເລີຍກໍ່ວ່າໄດ້.
Framework ຂອງ JAVA: JavaServer Faces(JSF), Struts, Hibernate, Google Web Toolkit(GWT), Vaadin, Wicket, Vert.X, Spring, Play, Grails, etc.

Python: ເປັນພາສາທີ່ຮູ້ຈັກຢ່າງກວ້າງຂວາງໃນເລື່ອງຂອງຄວາມງ່າຍຕໍ່ການທຳຄວາມເຂົ້າໃຈແນວຄິດຂອງ code, ນອກຈາກນີ້ມັນຍັງສາມາດນຳໄປພັດທະນາ App ກໍ່ໄດ້ (ນິຍົມໃນສາຍງານຂອງ Data science) ແລະ ຍັງເໝາະສຳລັບມືໃໝ່ທີ່ຕ້ອງການທີ່ຈະຮຽນ Code ດ້ວຍຕົນເອງ, ສຳລັບສາຍເວບໄຊເອງກໍ່ຈະໃຊ້ຮ່ວມກັບ framework ທີ່ຊື່ວ່າ Django ກໍ່ໄດ້ເຊັ່ນກັນ.

ASP.NET: ແມ່ນເຕັກໂນໂລຊີທີ່ພັດທະນາໂດຍ Microsoft ໃຊ້ເພື່ອພັດທະນາເວບໄຊ, Web Application ເຊິ່ງນັກພັດທະນາສາມາດເລືອກໃຊ້ໄດ້ 2 ພາສາຄື: VB.net ແລະ C#.

ນອກຈາກນີ້ກໍ່ຍັງມີພາສາອື່ນໆອີກເຊັ່ນ: Go, Erlang, Scala, etc. ເຊິ່ງທ່ານສາມາດຊອກຫາຂໍ້ມູນເພີ່ມຕື່ມໄດ້.
Database
ມາເລືອກ Database ທີ່ເໝາະກັບໜ້າວຽກຂອງເຮົາກັນເຖາະ, ແນ່ນອນວ່າ ວຽກແຕ່ລ່ະຢ່າງມີຄວາມແຕກຕ່າງກັນໃນດ້ານຂອງການເກັບບັນທຶກຂໍ້ມູນ ແລະ ການດຶງຂໍ້ມູນດັ່ງກ່າວນັ້ນມານຳໃຊ້, ດັ່ງນັ້ນ ຖານຂໍ້ມູນທີ່ເລືອກໃຊ້ກໍ່ຄວນໃຫ້ເໝາະສົມກັບວຽກດັ່ງກ່າວ, ສ່ວນໃນແນວທາງຂອງການສຶກສານັ້ນເຮົາກໍ່ຄວນເລີ່ມຈາກຖານຂໍ້ມູນທີ່ບໍ່ຊັບຊ້ອນ, ງ່າຍຕໍ່ການທຳຄວາມເຂົ້າໃຈ ແລະ ມີປະສິດທິພາບໃນການໃຊ້ງານສູງ(ແນະນຳວ່າຄວນເລີ່ມຈາກ RDBMS).
Database ທີ່ໃຊ້ງານໃນປະຈຸບັນກໍ່ຈະມີ: Relational Database Management System(RDBMS) ແລະ NoSQL.
ໝາຍເຫດ: ເນື້ອຫາໃນບົດຄວາມນີ້ແມ່ນໄດ້ຮຽບຮຽງມາຈາກຫຼາຍໆເວບໄຊບວກກັບແນວຄິດສ່ວນໂຕ, ດັ່ງນັ້ນເນື້ອຫາທີ່ນຳມາອາດຍັງບໍ່ສົມບູນເທົ່າທີ່ຄວນຈຶ່ງຂໍໃຫ້ທ່ານໃຊ້ວິຈາລະນະຍານໃນການອ່ານ(ປານນັ້ນພຸ້ນຫວາ!!!).