A0女仔嘅共通點

純粹個人睇法（頭盔）

二十幾歲，正在向三字頭接近。身邊有朋友已經生咗小朋友，都有啲啱啱結婚或者準備結婚。當然大多數都仲拍緊拖。先唔講嗰啲獨身主義嘅朋友，有啲渴望愛情嘅女性朋友仲係A0，咩原因？

唔通真係your face,your fate?話個樣一啲影響都冇實係呃人嘅，靚仔靚女會吸引到更多人，是生物性上嘅不可抗力。不過人類並唔係咁簡單的動物，外在條件只係影響第一觀感，仲有好多條件影響你嘅戀愛運。

有個朋友嘅朋友，都係二十幾歲嘅女仔，其貌不揚，行抽象派風格，個樣似足畢卡索啲畫，絕無誇張。但喺，佢已經結咗婚生左仔，個仔仲唔喺佢老公嘅，聽講仲好多感情瓜葛。齋睇佢外貌真係諗唔明點解會有咁多人鍾意。所以話，樣真係唔係唯一問題。

我所認識嘅A0女仔入面，高矮肥瘦都有，客觀講樣貌都端正，普通女仔樣。最近留意到佢地心態有啲似。

第一樣係唔打扮，每日都以街坊裝示人。唔係話靚唔靚嘅問題，而係對自己外在形象唔在意嘅心態，覺得反正都冇人睇佢就是但啦。又覺得真愛嘅都唔會在乎個樣，要睇內在。係，其實啱嘅，都有人鍾意樸素嘅女仔。但更多時候會令人覺得佢係一個好朋友，好同事，而唔會向「戀愛對象」方面諗。老實講句，要吸引人睇你內在都係靠外在，日久生情真係好難。

第二就係同一種心態影響嘅行為。佢地舉手投足都friend zone左人先。有啲係本性開朗直率，好快同人稱兄道弟。有啲其實係怕羞，成日打哈哈遮蔽自己嘅唔好意思。就算對住鍾意嘅人，都會一面嫌棄，驚人睇得出佢嘅心思。對所有異性都以「朋友」方式對待。呢種女仔會令人覺得比較平易近人，好人，但同樣唔會有戀愛想法。

第三係擇偶條件上矛盾。二十幾歲冇拍過拖，自然會覺得好條件嘅睇唔上自己。另一方面又foul晒所有一般男仔，每一個佢地都會搵到好多唔啱自己嘅缺點。寧缺勿濫係啱，但唔接觸落又點知對方係咪真係咁差？

第四係環境上問題。讀書時冇把握機會，出黎做野冇乜異性／適齡異性，又冇乜活動，交友圈子窄。客觀條件影響，冇得講。

其實以上都係老生常談嘅廢話，最重要都係一樣野－－冇自信，極其冇自信。佢地對戀愛有幻想，但同時都對自己可以拍拖覺得無望。所以佢地會成日話隨緣、佛系、唔緊要都慣、買定姑婆屋。歸根究底都係冇自信，縮係自己嘅保護殼入面，扮唔在意。於是有各種各樣互相影響嘅因素衍生。

雖然我唔係男仔，唔可以代表男性發言。但我真心覺得佢地唔係唔好，只係將自己看待做戀愛絕緣體。其實只要將自己放開少少，機會自然更多。