令你去【任何活動】都有得著嘅 20個 Tips

人愈大,關係愈多;但並唔係每一段關係都係我哋所享受、所期待同有所得著。

我哋成日都埋怨好多嘅對話都好「行」、好膚淺、冇咩營養、冇咩價值;但係,到底我哋自己又做得夠唔夠,去製造一個好嘅對話、建立一段有價值同有建設性嘅關係呢?

如果你嚟梗要去任何嘅 Networking Events 又或者 Meetups,不妨試下以下嘅方法去令到你係每段對話同關係拎得最多!


去之前嘅準備

去一個活動之前咩都唔做絕對係「死路一條」。正所謂,機會係留比有預備嘅人;其實,係你打算 join 個活動嘅時候已經可以開始預備。

1. 由「點解」著手

你嘅時間好寶貴,一秒都唔好浪費。好認真咁問自己:「到底我想要咩?」「點解我需要去呢個活動?」「我要係呢個活動拎走啲咩?」整個 plan 比自己。有屬於自己嘅期望。明白自己所做嘅野有咩意義、價值同目的。

2. Research 下關於個活動同講者嘅資料

邊個搞個活動?佢(地)有咩信念?同自己一唔一致?點解佢哋會存在?邊個會去?做下資料搜集,Google 下佢哋嘅背景,做過啲咩。如果你想 impress 佢哋,唸定啲問題,係 Q&A 環節問佢地 (又或者完左之後)。

3. 準備好到時講啲咩

你係邊個?你做啲咩?點解你係個活動度?你嚟梗有咩 goals?你有興趣嘅話題係咩?你有咩故事想同人分享?你一定唔會後悔早啲去準備定呢堆問題。做一個講故佬/婆係絕對無問題。如果你自己有咩 special agendas (問人意見或者叫人 join 你嘅 project),準備定個 elevator pictch

“一個知「點解」嘅人係可以應付差唔多任何嘅「點樣」。” - Viktor E. Frankl /《Man’s Search for Meaning》作者


活動嗰陣-Networking

等咗咁耐,要嚟嘅終於要嚟;係你 Show Time 嘅時間啦!

4. 早啲到

唔好以為呢個係個冇咩建設性嘅 Tips。你早啲到,就可以早啲去熟習個環境;你早啲熟習咗,你晏啲社交上就會自在啲、自信啲。你參加個活動都係為咗識多啲志同道合嘅人,咁早啲到又有咩所謂喎?

5. 聆聽、聆聽同聆聽

「溝通不嬲唔係關於講,而係聽。」-相信呢句嘢你都聽咗好多次。記得,係聽,唔係講。鼓勵人講多啲關於佢哋自己嘅嘢。聽下佢哋嘅故事、目標、抱負、興趣、感受,什至困惑。每個人都鐘意講自己嘢,唔好搶哂嚟講。

(一個好經典嘅例子:你個 friend 同你講「我最近買咗部 iPhone 啊!」如果你咁樣回應:「係啊!?我又買咗部 Samsung 喎!我好鐘意佢個防水功能…〈下省一千字〉」你唸下,人地明明講梗佢部 iPhone,你一嘢轉翻去講自己嘢;你話啦,人地又點會有隱同你繼續傾先得㗎?)

6. 做(最真嘅)自己

有句好老套嘅說話:「你要人對你真,你首先對人真先。」對你自己嘅故事、感受、夢想或者困境要有信心。記住,只要你 show 同樣嘅 care 比人,人地會 show 翻相同嘅 care 比你。千祈唔好睇少自己。人,始終都係人。

7. 活在當下

唔好一路傾計,一路碌你部電話。比同你傾梗計嗰個人 feel 到你真係 care,真係投入梗佢講嘅嘢。當你做到真正嘅「活在當下」,你會發現呢個世界好似得翻你同對方咁。如果呢樣嘢發生係你身上,咁就要恭喜哂你啦!

8. 正面啲、比啲鼓勵、有建設性

唔好做散發負能量嗰個-包括係咁投訴同埋怨。冇人鐘意咁嘅力量。
比對認同感、讚賞同支持;唔好咁孤寒,唔駛錢㗎!每個人都想覺得自己做嘅嘢係重要同特別。
就算你想 challenge 對方,記得批評人,都要建設地去批評。

9. 「和藹可親」啲

去活動扮 cool 扮型係一件好浪費大家時間嘅事。主動同人握手;最重要嘅,當然就係,保持一個燦爛嘅笑容啦 :)

10. 重燃你嘅好奇心

你去一個活動,除左識人,就係學多啲嘢;所以,open your minds。你身邊每一個人都至少有一樣嘢可以教到你。學愛因斯坦話:「我並唔係特別醒,只不過係我對世界任何一樣嘢都有份充滿熱情嘅好奇心。」

11. 問有質素嘅問題

「今日天氣幾好」呢啲對白真係可以慳翻。去得活動個啲通常都同你有唔少嘅共同之處;直接跳落去啦。你可以考慮問以下嘅問題:你最近忙梗咩 (唔好一條就停,比你嘅好奇心繼續帶領個對話)?你今年有咩 plan 或者 goal?你做梗嘅嘢最正個 part 係咩?你係你個行最想 achieve 嘅係咩?問題同聆聽就係對話最重要嘅元素。

12. 搵你同對方嘅共同之處

點解問同聽?因為你想搵到同對方相同嘅 ideas、目標、信念、願景或者困惑 (同是天涯倫落人~)。搵到之後,繼續延伸;好嘅對話就係咁樣開始。

13. 建立有意義嘅關係

去活動最正嘅係咩?人囉!特別係對你生命同夢想有意義嘅人。如果搵到,恭喜你。主動啲問對方攞 Facebook、Email 或者 Whatsapp。珍惜係你生命遇上有相同 (或相似) 抱負、理想或者信念嘅人;人生最浪漫,莫過於此。


活動嗰陣-講者

識人係爽,但係唔代表講者講嘢嗰陣可以咩都唔做。

14. 抄低啲正嘢

唔好剩係坐係度。拎起你部手機,用 Evernote 或者 Google Keep (當然,紙同筆都 Okay),去記低任何你覺得有用或有趣嘅 ideas、問題或者睇法。都係嗰句,好奇啲啦!

15. 拎啲「手信」走

係每個 talk、每個講者都會有嘢拎得走:可能係一句金句、一個貼士或者一個 idea。記得,當你臨走嘅時候,至少拎啲嘢走。

16. 將「手信」變成「行動」

無論一個 idea 有幾正都好,佢都唔會令到你成長;除非你將佢轉換成一個「可以比你自己行動嘅項目」。簡單啲講:「哇!呢個 point 正喎;不過,我下一步可以做咩呢?我點樣可以將自己本身嘅經歷同目標同啱啱對方講過嘅嘢拉上關係呢?」知道係唔夠,你一定要行動。試下,實驗下,從錯誤裡吸收;我哋就係咁先學習同成長到。

17. 分享你學到嘅嘢

將自己學到嘅嘢教比其他人不嬲都係其中一個最好嘅學習方法。開心 share 比你嘅朋友、同事、什至伴侶。當你能夠教識人哋嘅時候就係代表你真正學懂一樣嘢 (當然如果你將學到嘅嘢成功地變成行動就更好啦);你都可以考慮寫篇 blog (好似我而家咁) 或者 share 係啲網上社區。


活動之後

活動嘅完結唔代表一切嘅完結。做下以下嘅嘢,你會令你嘅得著變得更加可持續發展。

18. 同人 Keep 住聯絡

等對方知道,佢哋令你好有得著。話比對方知係佢地身上學咗啲咩。有時間嘅話,咪約佢哋出嚟飲杯咖啡食、件 cake、吹下水囉。

19. 沒完沒了嘅學習

終身學習-鄭融都有教啦。如果你知道有咩書要睇又或者有咩 topics 你好有興趣,自己走去書局搵下,再唔係 Google 下。(教育或者學習從來都唔會係你畢咗業之後就終結。如果你仲未覺得自學有幾重要:最近已經有研究指出世界上最成功嘅人都係透過睇好多嘅書…可能每個月要多過三十本,去自己教自己。)

20. 行動最實際

好啦,而家你有新嘅 ideas、新嘅反思、新嘅朋友。唔駛講,下一步梗係:講多無謂,行動就最實際。整張 To-do-list 比自己。將活動嘅所有得著轉換成對你生命、你嘅範疇、什至世界嘅真正影響。咁樣,你先叫做係個活動拎到啲嘢走啊嘛!


如果你一直都覺得出席活動係為左應酬下、hea 下啲人的話;我希望你睇完呢篇嘢之後,至少你明白出席活動係為左「人」、「學習」、「經歷」同埋「自我成長」。

或者你下次出席活動嘅時候,不妨試下用以上嘅方法啊!

Good luck.

One clap, two clap, three clap, forty?

By clapping more or less, you can signal to us which stories really stand out.