Member preview

十萬個做乜鳩:《天機:富春山居圖》

年份:2013年
導演:孫健君
編劇:孫健君
演員:林志玲、劉德華、張靜初、佟大為

───

劇情簡介

中國元代名畫《富春山居圖》合璧展出,國際黑市開出天價,日本黑幫、英倫大盜聞風而動。身陷不白之冤的國際特工肖錦漢(劉德華飾)為證清白重出江湖,暗中執行「孫子兵法」計劃;臨危受命的中國人保高管林雨嫣(張靜初飾),護寶遇一波三折,困於多方勢力漩渦;神秘女郎麗莎(林志玲飾),百變魅惑,卻失落真心;幕後冷血黑手小山本(佟大為飾),奢血如命,終落敗歸塵。

肖錦漢為奪畫上天入地鑽沙漠,能否力克強敵,重現昔日特工風采?林雨嫣博弈於西子湖畔,能否與肖錦漢重歸舊好?麗莎險些命喪杜拜,能否擺脫魔爪,迎來涅槃?這一場生死對決,這一段恩怨情仇,都隨《富春山居圖》的安然歸國,迎來命定結局。

───

上次睇完《喜馬拉亞星》,我猶如隨呢套仆街戲登珠峰之頂,一時間再搵唔到睇爛片嘅樂趣。過去個幾月,睇過陶傑嘅《愛尋迷》(眼高手低,故事平凡,主旨唔清楚,唔知想拍乜)、鄧光榮嘅《黑豹天下》,呢堆片喺《喜馬拉亞星》、《阿嫂》、《神龍賭聖之旗開得勝》珠玉面前,失色不少,稱唔上爛片。

最後,我喺倉底搵返內地影壇經典爛片頭五名之一,《天機:富春山居圖》出嚟鞭下屍。因為懶,所以索性用問答形式去講呢套驚世爛片。原來,用完問答,先發現呢套戲有更多未解謎團,心中不少疑問,可謂十萬個做乜鳩。

【除另有註明,文中圖片來自騰訊截圖。如有侵犯版權,請搵騰訊,唔好嚟煩我】

唔好嫌細張,下面大把圖,睇死你哋(圖源:維基)

問1:點解《天機:富春山居圖》係爛片?

答:《天機:富春山居圖》有齊爛片嘅五樣必要原素-

(i) 套戲超級唔好睇(中)

(ii) 同預期相差太大(有劉華同張靜初,你點估到係咁!中!)

(iii) 團隊(特別係導演)眼高手低/掛羊頭賣狗肉(再中!!)

(iv) 劇情不知所謂(呢個再中!!!)

(v) 中途有想離場、完場有想界櫈嘅感覺。(全中~)

《天機:富春山居圖》,劇情崩壞,狗屁不通,偏偏故弄玄虛、無嗰樣搞個樣。表達手法極度跳躍,故事毫無伏筆同邏輯可言。團隊眼高手低、演員沒精打彩,120分鐘劇情,觀眾每秒如坐針氈,求生不得,求死不能。此乃爛片之經典,任何演藝學院電影班應以此作為反面教材。

問2:上面劇情簡介明明好簡單,你話套戲爛係咪你嘅問題?

答:首先,上面個劇情簡介係無內容。佢除咗話你知有乜嘢演員、同故事會喺乜嘢地方拍攝,無一句表達到劇情。

至於套戲嘅真實劇情,可謂戇鳩地複雜無比:

/《富春山居圖》分兩卷,「無用師圖」收喺台灣故宮,喺套戲開頭喺畀英國人偷咗,大部份時間放咗喺杜拜嘅敵軍大本營;而「剩山圖」喺大陸,係套戲嘅重心所在。劉華就係要趕喺台灣展覽開幕前,首先保護「剩山圖」、再拎返「無用師圖」,雙劍合壁,破鏡重圓。
劉華為咗保護張「真剩山圖」,用一張「假剩山圖」嚟掉包呃咗日本人。日本人知道後,挾持住劉華個仔,迫劉華交出「真剩山圖」。日本人搶到「真剩山圖」之後,交咗畀斯琴高娃將佢運出國,並約喺喺杜拜交收。
於是!所有人(日本人、英國人、大陸人)集合喺杜拜,劉華喺英國佬手上搶返張「無用師圖」,配合埋張「真剩山圖」,合壁展出。
你問,咁張「真剩山圖」唔係畀日本人偷咗,畀咗斯琴高娃,邊度走出嚟。原來,斯琴高娃係大陸派去嘅卧底,佢喺日本人手上騙去「真剩山圖」,再靠劉華搶返幅「無用師圖」,咁咪夠一幅完整嫁囉。/

不單一般觀眾無法掌握實際劇情,重看一次(即係睇第二次)亦無法理解。你睇套戲,唔會得到以上呢個故事,因為表達手法極差,敍事能力係零-上面嘅真實劇情簡介係我為寫文而迫睇咗套戲三次,再搵咗好幾個網上評論所研究而成……

最尾套戲又要煞有介事咁交代,原來劉華嗰張「真剩山圖」,其實係假貨,「真‧真剩山圖」一直喺大陸,無出過門口半步。/

嘩,我屌你呀!!如果你睇得明上真真假假假假真真剩山圖,你真係有資格挑戰呢部經典。

我敢擔保,淨係第一幕台北故宮搶「無用師圖」,已經有九成觀眾唔明做乜鳩:英國人鬼佬要偷畫,班日本妹偷襲英國鬼,英國鬼被殺、班女諗住執個熱煎堆去拎畫……點知畫面一黑,幾下鎗聲,三分鐘後面話死嘅係班日本妹,幅畫落咗去英國人度!!!

嘩,點解係咁?到套戲完埋都無任何交代。明明可以拍套簡簡單單嘅三方爭畫戰(日本人、英國人、大陸人),佢硬係要無無謂謂咁搞到超級複雜。

除咗劇情跳躍、無嗰樣搞嗰樣,《天機:富春山居圖》不斷喺幾個國家嘅場景不斷高速來回:杜拜>台灣>大陸>日本>香港>大陸>杜拜>日本>台灣,喺一個國家又會可能再跳三四個場景(例如喺大陸飛嚟飛去;杜拜又去兩三個地方;喺「東京」又車又房又酒店又夜總會),120分鐘跳咗起碼四十至六十次場景,平均每幕只有兩三分鐘。瘋狂飄移,鏡頭轉得既密且快,故事交待難以清楚,觀眾亦無從掌握劇情。例如鬼頭尼克嗰頭喺杜拜食雪卡,兩秒後同劉華喺大陸吹水(完全無意義,佢同劉華只係喺泳池邊吹咗兩句水),五秒後又同斯琴高娃喺西湖湖邊食水煙,嘩,大佬,佢幾秒做咗人哋要十幾廿個鐘先做到嘅嘢,係咪痴鳩線嘅?加上戲中有英、日、中、斯琴高娃,一共四大勢力,劇情去得太快太急,觀眾連演員同勢力分布都未搞得清楚。

劇情高速輪迴,場景不斷轉變,所有演員好似識瞬間移動,惟獨觀眾只有食塵嘅份兒,真係車尾燈都見唔到呀。

點解?點解?點解?點解?點解?點解?來源

咁啱,《天機:富春山居圖》嘅英文片名叫 Switch。嘩,唯一一樣貼題嘅嘢,場景不斷switch,呢個英文名真係一絕。

問3:因為劇情爛、場景過多,所以《天機:富春山居圖》成為爛片經典?

答:爛,在於劇情爛、拍攝爛,更爛係用咁多好演員,去咁多地方,配合咁多特技-成套《天機:富春山居圖》用咗1.6億人仔拍,結果係套咁嘅垃圾出嚟。

即使用咁多錢去拍,劇中製作依然流到仆街,有極多穿崩嘅地方,完全乎合中國發展嘅特色:

【影印道】

呢兩幅圖,一張係喺38分鐘左右cap,講劉華喺日本畀人棄屍、另一張喺1:11 cap,講劉華同個仔喺大陸畀人棄屍……仆你個街,棄屍嘅地方一模一樣,居然連戲都用「影印道」,可謂世風日下,道德淪亡。

留意下兩張圖角度、光暗、汽車一模一樣,只係啲樹枝有些少唔同……
【「你知道嗎?」小知識】
根據 fanwiki,「影印道」原是網民用來諷刺溫日良旗下公司出品的漫畫,舊稿當作新稿用的手法。後被其他網民借用,泛指一切舊稿新用的漫畫創作方式,較多見於出版週期較頻密的彩色漫畫。及後為分別溫日良和其他漫畫的影印道,網民多稱呼溫日良式的影印道為「肥良影印道」。

【假東京】

話說劉華要去東京偷嘢,走嗰陣嘅車係架左軚車、林志玲喺東京又係舞住架左軚車……而東京係右軚車。套戲雖然剪咗啲東京嘅背景同片段落去,但觀乎駕駛嘅車,劇組根本無去過東京,咁又何苦話去咗東京,場景不必要咁跳嚟跳去呢?

留意背景個招牌係日文。佢遇著一個去過東京又咁無聊嘅觀眾,算佢唔好彩。

【假「劉華」】

去假東京令人意外,更加估唔到連主角都係假。呢幕「劉華」抱仔,唔單止背景係假,明顯綠幕key上去,根本個「劉華」都係假嘅。分半鐘劇情,「劉華」得半句對白、無一個close up,全程戴住黑超,仲假過90年代啲移花接木照裸照……

「劉華」。其實條友好似真劉華,不過拍得好差,就住就住,學查小欣話,一睇就知係移花接木。

更仆街係呢幕作用係用嚟交代「劉華」同張靜初有個仔,似係要補拍而搵唔到真嘅「劉華」,只能起用一個假嘅:一係戲情原本唔係咁、一係拍嗰陣唔記得有呢幕。一套大片居然係可以鳩屎到咁,令人發笑。

【假香港】

套戲裏面有幾個香港差佬,講嘅係國語……諗真啲呢個唔算乜嘢穿崩……可能若干年後啲差佬真係講國語……(你唔好話呢套戲係大陸拍所以演員要講國語-裏面啲日本人角色主要係講日文嘅)

【夾萬裏面有其他人】

最尾嗰幕,劉華同林志玲潛入英國人好大嘅夾萬入去偷嘢,入去之後關好門。點知林志玲一拎幅畫,觸動咗警報……

左邊度門明明關咗……

下一個shot,已經係無端端有鬼佬喺夾萬裏面同劉華槍戰。

而呢個時候夾萬道門,其實依然係鎖住嘅……

我開始相信套戲啲人識瞬間轉移。

類似穿崩位,喺《天機:富春山居圖》俯拾皆是,仲多過我啲文嘅錯別字,你諗下有幾多?

問4:套戲仲有乜嘢問題?

答:太多無聊枝節,無厘頭位、無意思:

──劇中所有人嘅咀形同講嘅對白,全部唔夾,即係,佢個咀明明講緊「頂你」,但對白聲係發「屌你老母」。

──林志玲識國語、佢老闆日本人山本又識國語,佢哋同中國人講嘢用流利嘅國語;偏偏一見面就硬係要講日文,仲要日文又係唔夾咀型(明明個咀甩一下,就講咗三百個音嘅日文)。

──經典兩分鐘

呢套戲嘅62分鐘15秒到64分鐘6秒,我會記住呢兩分鐘。從現在開始我浪費咗兩分鐘,呢個係事實,任何人都改變唔到,因為已經過去了。

呢兩分鐘,講述張靜初喺西湖走嚟走去,120秒內一句對白都冇!!只有一堆whatsapp,畫面不斷過場再過場,張靜初由寺內去咗湖邊再去飲茶,戇鳩鳩去咗五六個景一啲作用都冇!

呢幕林志玲扮尼姑,來回睇咗三百次,仍然唔明林志玲扮尼姑係做乜鳩。

想點??

──日本女特工無撚端端引爆喺自己後面個炸彈

做乜鳩????

──行行下博物館見到女鬼

已經無力再問點解。

──日本人放雀

睇下右邊,連佢助手對放雀呢件事亦感到好疑惑

以上只係係咁咦搵出嚟嘅無謂片段,類似嘅畫面,大大小小,一分鐘出現一個。虐待你足足120分鐘,少啲心血都戰死戲院。


問5:套戲始終仲有劉華同張靜初,應該唔會太差掛?

答:首先,我講過劉華演警察或其他紀律部隊人員,套戲避之則吉。

而佢喺《天機:富春山居圖》正正係演香港特務,咁咪食得屎囉。

張靜初就堅咧,我睇完三次都搞唔清楚佢真正角色係乜:開頭綠幕假劉華嗰場戲,我以為佢係家庭主婦,劉華返工而佢喺屋企執屋;無耐,劇情需要,佢成為保險公司嘅高層;再睇下睇下,因為劇情需要,佢一個人打贏幾個特務,於是又有人話張靜初真正身份係特務……佢究竟係邊個?

其實,呢套戲林志玲先係主角。佢喺戲裏面近乎暴走,一口氣換咗空姐/護士/特工/尼姑/殺手/短裙/晚裝/西式婚紗/中式裙褂/Punk妹/病楝/模特兒/SM女皇/出浴/緊身皮裝/大肚/人妻/睡衣/黑執士/西裝扮男人/寡婦/夜總會公關,一共廿鳩幾個造型,幕幕唔同衫,惟獨你根本唔鳩知佢做乜!姣屎燉篤、冷艷、冷靜、天真、楚楚可憐、風韻猶存、白痴、戇鳩,所有性格同特徵共冶一爐,睇戲幾十年真係冇見過一個演員有咁多造型、咁多性格,仲要由一個啲戲屎到仆街嘅演員去演……

咁你玩cosplay係為咗除衫嗰下,提供官能刺激,屌你老母但未到刺激嗰幕戲套戲已經閃咗去第二個場境,吹鳩脹!林志玲啲戲屎,人所共知。咁靚女咪專心做花瓶,行行企企就掂。點知喺套戲度,林志玲連演花瓶都失敗收場!點搞呀大佬!!

上一秒個樣好地地,下一秒就變污糟貓。

最離譜係,你玩制服誘惑,居然無泳衣??

劉華同張靜初嘅表現毫無神彩,林志玲一貫唔知做乜,佟大為所飾嘅日本人好似長期便秘咁款,面目猙獰而恨意殺意不足。上上下下,混混噩噩。

問6:《天機:富春山居圖》咁爛,仲有乜值得好寫?

答:呢套戲全方位咁爛-劇情、故事表達、拍攝手法、製作、配音、對白、美指、特技、演員表現,每一個範疇都去到SS級嘅爛。爛到成為經典,絕非其他低成本爛片可以媲美。

《天機:富春山居圖》亦可謂盡顯強國嘅精髓:假大空、用錢堆砌-仲要堆得唔好睇,品味低劣,敗絮其中,符合國情。


問7:套戲有冇可取之處?

答:有。如果你唔理劇情邏輯、時間成本係零,當《天機:富春山居圖》係笑片睇,好幾幕有機會令你大笑出嚟:

──林志玲跳車

佢扮護士,喺救傷車毒暈咗劉華同張靜初,偷走幅畫……之後喺無面對任何危機同威脅下,無撚端端跳車,仲要受埋傷!!哈哈哈哈哈,痴撚線,我以為自己睇錯,點知佢自己主動跳車!!!好人好者,為乜?點解要咁做?

好地地,點解要跳車?
你望咩啫?都冇人迫你跳車。

──外國人爬上車

又係同車有關。劉華喺沙漠走佬,上演追車大戰。旁邊嘅鬼佬唔知痴咗邊條線,由自己架車好辛苦咁爬咗去劉車架車上面……

洋人演員好辛苦咁爬

點知…

彷佛喺度恥笑導演戇鳩。另外,你睇下林志玲幾冷靜。

導演用咗十幾秒講個外國人好努力爬去劉華架車嘅車頂,然後劉華用半秒KO咗佢……你話幾有喜感,幾滑稽先得。

──劉華表情

呢套戲每次出現車,都係搞笑或者穿崩。

──劍擊決鬥

呢個係經典。劉華同日本仔決一生死,唔知點解要著劍擊服決鬥,中間又要夾雜爛仔交。劉華同日本仔又好有默契,知道決鬥係要用劍擊決勝負(而佢哋又唔喺對方換衫嗰陣一劍殺死對方,真係禮儀之邦、死生之交)。林志玲咁多cosplay我仲可以當係AV情節,偏偏兩個男人格劍……

如果唔係睇在套戲就快完嘅份上,真係睇唔到落去。導演又要將決鬥配以AV式第一身視點,睇到頭暈想嘔。

唔知做乜要第一身視點
仲要兩邊第一身視點都用晒……劉華又出現瀨屎般嘅表情

──Kill bill、精武門、吳宇森

戲中有唔少疑似向外國名作/名導演致敬嘅場面,包括Kill Bill(最尾劉華兩公婆大戰一班女)、精武門(劉華殺日本人一幕)、吳宇森式雙鎗射擊(劉華同林志玲鎗戰)。不過,我擔保佢唔係抄襲,因為導演嘅能力同智商有限,抄襲完你都未必知。我係不幸睇到第三次先有所覺悟,善哉善哉。

昆倫塔天奴好快會畀人告。
呢幕堅似精武門。
吳宇森式雙鎗

問8:你咁叻批評,你又點改寫《天機:富春山居圖》?

答:呢類奪寶式特務片,只需要轟轟轟轟足120分鐘,死人冧樓,觀眾就會收貨。只要你有緊湊劇情,緊張配樂,靚仔靚女,配合正常後期製作,英雄獨腳戲或大堆頭合作,跑跑跳跳,已經有所交代。

強國最中意抄,上網搵 Die Hard / Indiana Jones / Bourne / Mission Impossible 是但一集照抄,改咗啲人名,套戲上影嗰陣話係自主研發就得。千祈唔好左抄一段右抄一段,以大陸人嘅智商同技術水平,一定出事。近幾年大陸出得最多事嘅,就係奪寶/特務片。

我唔貪心,會將《天機:富春山居圖》改寫成咁:

──兩岸準備將兩幅《富春山居圖》喺新加坡合璧展出。主角劉華係香港特工,受聘負責統籌,各地高層-包括張靜初同林志玲-喺香港開會。

──會議上,有人打算兩岸三地合力先運大陸嗰幅,然後運台灣嗰幅。因為種種政治因素(點可以畀對方嘅警方跨界執法?你估人人好似香港政府咁戇鳩咩)同個人因素(比如兩條女皆嗒劉華糖但呷鳩對方醋),決定各自運送。於是兵分兩路,張靜初運大陸嗰幅(最好加個大陸男星,如黃曉明)、林志玲運台灣嗰幅(最好加個台灣男星,例如王大陸)。

──點知分開運,防守力被攤薄,啲畫就畀日本、美國同英國人組成嘅八國聯軍(最好加埋韓國人)先後喺大陸同台灣搶咗啲畫。兩岸三地嘅精英終於知道各自為政唔係辦法,搵埋澳門嘅傳說人物(例如賭王啲親生仔ssss),一齊組成全球華人聯盟去搶返啲畫。

──鏡頭一轉,喺杜拜嘅八國聯軍(其實得英美日)正慶祝搶畫成功,但慶功上因為小事內訌,互相殘殺(當然要加啲血腥同暴力),最後日本人搶撚晒啲畫。

──幾經波折,全球華人聯盟突破好多陷阱,終於嚟到杜拜同日本人決戰。但日本人又點夠全球華人聯盟嚟呢?最後,劉關張合力搶返兩張畫(sorry係劉林張),大團圓BBQ,喺新加坡嘅展覽順利完成。

──最後揭盅,原來日本嗰邊早就畀我國嘅卧底混咗入去!嗰啲內訌,完全係為咗削弱八國聯軍嘅實力。兵不厭詐(我打咗三十次兵不厭炸,啲士兵真係慘),亦盡顯中國人嘅智慧同先見之明

呢個結局係要顯示合力團結先係王道正宗,兩岸四地人民決不分裂,中國統一偉大無比,自古以嚟任何地方都係中國嘅,全球華人聯盟必勝!至於展覽要喺新加坡舉行,係為咗等啲友諗起汪辜會談,令套戲有更重嘅歷史同政治意味。

Sorry,我寫完都覺得嘔心,仲難頂過睇三次《天機:富春山居圖》。


Follow me on Medium,我嘅文字唔會令你失望(不過寫文嘅速度會)。
https://medium.com/@relgitsjg

【今年史兄喺Medium所得稿費,將全數用作支援魚蛋革命嘅義士。】

Facebook page:https://www.facebook.com/Relgitsjg