《史兄信箱：老闆點解猛叫我快啲「結婚買樓生仔」？》
史兄你好，
本人知你有寫專欄《睇錢份上》、《辦公室豪語錄》，今次想向你請教人生大事。
小弟行年三十，專業人員。與家人同住私樓，有穩定女友，上司、上司嘅上司、甚至上司嘅上司嘅上司成日叫我「結婚、買樓、生仔」，話咁樣個人會定性啲喎！你知唔知，佢哋提我快啲結婚生仔，仲密過我老竇老母？
點解佢哋會咁建議？我應該點算？希望你可以講下你嘅見解。
阿明上
阿明，
屌你老母啊！三十歲、專業人士，仲有個穩定女友（你冇寫數量，估計係一個掛），人生算好好啦！你距離成功只係差一間公屋！已經屬大半個人生勝利組，剩返落嚟嗰啲只係Happy Problem啊，小問題、小問題。
首先講「結婚」。我肯定自己夠資格答呢條問題（原因見我嘅署名）。老一輩嘅人成日覺得，結婚係人生一個重要里程碑，標誌住一個人已經長大成人、成熟穩重，唔再係登徒浪子、吊兒郎當，能夠肩負重任，喺工作上可以迎接更多挑戰。當你有個穩定女友，佢哋好自然覺得結婚係下一步，就好似台灣人飲完珍奶會叫多個布甸一樣。雖然我唔明點解有女友下嘅一步唔係愛撫同扑嘢，但好多人覺得，「婚姻係拍拖嘅終站」。同唔同意呢個觀點都好，你假設係真先。
你話係咪一定要用「結婚」嚟顯示自己有責任心，結咗婚就等於有責任心？當．然．唔．係。我睇法係，要睇某人有冇責任心，只要睇下條友喺屋企屙完尿會唔會 (i)抹返廁所邊同 (ii) 熄燈，邊使結婚買樓生仔咁大陣仗。問題在於責任心係無形嘅，同你喺屋企抹廁所邊同熄燈一樣，其他人睇唔到摸唔透。你直屬老闆可能同你工作好幾年，透過日常工作知你個人有冇責任心，但老闆個老闆、老闆個老闆個老闆呢？佢哋少則管十幾個員工，多則一千幾百個。莫講話一年未必見到你幾次，佢連你叫乜名都未必知。對佢哋嚟講，員工不外乎係一堆外在、可見到、客觀描述到嘅性格表現工作特徵，統稱「人設」。當要衡量評核員工前途嗰陣，呢堆「人設」大派用場，方便高層比較各員工作出決定。如果呢班高層相信已婚嘅員工等於有責任感，努力工作，咁呢個啱啱結婚嘅員工咪秤高啲。老闆好心，想你得到再上層器重，爭取升職加薪機會，咪不斷叫你結婚結婚結婚。
同樣道理，「買樓」、「生仔」亦代表呢個人喺人生中落撚咗非常重要嘅注碼，真係已經大個仔，成熟可靠。
除咗搞好人設呢個原因，上一輩嘅人成日覺得員工「結婚、買樓、生仔」，面對生活負擔、家庭壓力，唔再似單身嗰陣咁，話裸辭就裸辭。有咗顧慮，連轉工都要面對風險（新環境同事唔夾等等)，行事轉趨保守，步步為營，唔敢貿然轉工。
