一直好鍾意睇史兄嘅不良嗜好系列,佢嘅不良嗜好,除咗唐老鴨之外我幾乎全部都有。煙酒咖啡粗口,並非為染上不良嗜好開脫,而係以上嘅嘢都係學朋友M講,用嚟吊命(本人並不鼓勵任何人染上以上惡習)。
R吹本人可以話十分爛飲,最初真係為R水吹,因為溝女又好,朋友吹水又好,甚至傾生意應酬都好,飲兩杯乜都易講。前題當然要量力而為,飲撚大咗要人照顧番轉頭包你溝女傾計,尤其做正經嘢,必定死梗(誤,有個穩定女友喺你飲醉時照顧下你其實幾溫馨,雖然跪下玻璃少不免)。後生啲嘅時候乜都飲,大學時最鍾意同一班老死買最平嘅酒,場地係嘉芙之類嘅任何劈場、大家屋企、宿舍、甚至公園、街邊,任何有酒精嘅嘢都可以倒入口,坐埋一齊就傾計猜枚飲,但求一嘔。平價酒之中,King Robert可謂經典,嗰陣近乎工業用甲醇嘅味道我相信我呢一世都唔會忘記。
後來做嘢幾年開始有少許消費力,見識多咗靚酒吧,飲多咗好酒,又開始跟風飲下威士忌,繼而愛上Islay Whisky嘅泥煤味。威士忌的確千變萬化,試下呢隻有咩特別,嗰隻有乜風格,好易上癮。題外話,講個威士忌笑話,話說有次喺機場免稅店,聽到兩個懶係醒嘅香港中坑拎住啲威士忌,”喂屌大手買,買多幾支12年擺五年就變17年架喇到時賺一個開!”笑嘅同時你會感嘆香港人熱愛炒賣嘅程度。威士忌暫且寫到呢度,有關威士忌嘅文章亦都好多,所以今日主要講Gin。
最初認識Gin係早年喺酒吧識女仔時,發現好多女仔都鍾意飲Gin Tonic呢款cocktail,無他,簡單又易入口,唔需要好多花巧材料。Gin、tonic water、一舊仔青檸,已經可以沖成好好嘅Gin Tonic。後來去過一啲比較sophisticated嘅Gin Bar,發現Gin做底嘅cocktail原來可以有好多玩法。除咗一般常見用青檸青瓜配gin之外,我飲過嘅一啲有趣配搭包括Espresso(第一次飲嘅時候係好震撼,無諗過咖啡配酒出嚟個感覺可以咁清新)、Earl Grey、紫蘇等等。或者都循例簡單介紹下Gin先。
- Gin屬於烈酒,起碼40%度酒精,本身都係穀物釀製。
- 穀物釀完之後會加唔同嘅藥材、花果等等,其中好重要嘅係杜松子。
- 同好多酒一樣,本身係藥用,杜松子本身就清熱解毒醫痛風。(但有痛風又點飲酒呢?)
- 荷蘭發明,英國發揚光大,美國consume最多。
- London Dry Gin最為常見,其餘有Dutch Gin、Plymouth Gin、Sloe Gin等。
集中講番London Dry Gin,一般比較常見牌子有Hendricks、Bombay、Beefeater等等,價錢一般二百幾起跳,已經可以調到好唔錯嘅Gin Tonic。個人覺得初學飲酒嘅人更加應該由gin入手,第一,Gin比起威士忌、紅白酒更加容易分好壞、更加容易飲得出每一種唔同嘅特色。第二,Gin大部份時間溝tonic water飲,易入口又唔會好快醉,去酒吧social穩陣之選。第三,呢個好緊要,相對其他酒例如whisky、brandy、紅白酒平。應該咁講,同樣$200蚊左友嘅whisky唔會入得口,$200蚊嘅Gin會相對入得口。高階貨嘅話,起碼17年以上single malt whisky,日本好Scotch好,唔計炒價起碼四位數起跳,相對之下又攞獎又有人叫Gin酒之王嘅德國gin Monkey 47大概都係$700蚊,當然你可以話釀酒方法唔同,又唔洗陳年咁耐,當然平啲,呢度我地只討論purchase value。
點都要推介一兩支心水嘅,最廣為人知嘅Hendricks一定唔錯,Gordon’s就唔好搞啦,呢啲都好基本唔講。第一支想推介下嘅係Beefeater 24,價錢方面應該$400蚊左右。
Beefeater 24係2017年Beefeater出嘅一個高階版本,喺本身傳統嘅London Dry Gin入面加多咗12種草本元素(Gin比較少放喺酒桶陳年,口味大多源自加入嘅草藥),好好Dap,唔難試出酒入面唔同材料嘅香氣,有茶味、果皮味等,口感亦都平衡。
第二種想介紹嘅都算係近年嘅大熱,日本Suntory廠出嘅Roku (6) Gin,R吹叫佢做六仔。
Made in Japan幾時都係高質嘅代名詞,六仔比起Beefeater 24就無用到12種口味咁多,簡而精嘅日本風味,幾種好容易飲得出嘅味包括Citrus味、煎茶味、果皮香等。有別於其他日本產酒比較輕口味,六仔係算係Strong嘅。價錢方面好緊要,記住喺各大機場免稅買,係平好多好多。香港兩間大型日本超市講緊五、六百,機場的話三舊以下搞掂。
近期仲出咗一支港產Gin,啱啱開賣,未有機會試。索價算幾高,但個樽靚到無話可說,淨係”港產”兩個字應該都會令我乖乖俾錢。唔喺度賣廣告,自己實google到。試咗再同大家分享下。