Death Wish Coffee Arabia و النصب علي المستهلك المصري، و الاحتيال علي العلامة الاجنبية
النهاردة اشتريت عبوة قهوة من صفحة علي الفيس بوك اسمها Death Wish Coffee Arabia بتدّعي انها تبيع المنتج الحقيقي لشركة Death Wish العالمية.
اول حاجة اخدت بالي منها هو التغليف.. سيء جدا و قلت مستحيل يكون منتج اصلي بالشكل ده.
ده غير ان كمان عندهم خطأ في كلمة WARNING اللي مكتوبة علي العبوة WARING.
طبعا ده غير ان البُن نفسه مغلف في كيس عليه لوجو مختلف
ايه بقي سبب وجود اللوجو دة علي الكيس ؟؟ هو ان النصابين كانوا طابعين الاستيكرات دي من فترة، لكن شركة Death Wish الحقيقية اعلنت انها غيرت اللوجو، و هنا طبعا ماقدرش النصاب يعيد طباعة الاستيكرات تاني و باع المنتج بالاستيكرات دي عشان ميخسرش ثمن الاكياس اللي تم تغليفها (خطة في منتهي الغباء)
المهم بعدها عملت فيديو هزار علي صفحتي الشخصية علي فيس بوك بتريق فيه علي ان الموضوع طلع نصب و دة مش المنتج العالمي و كدة فا حد من اصدقائي اخبرني انهم كاتبين علي صفحتهم ان المنتج بتاعهم مش الاصلي بتاع بلادة، رديت عليه قلتله لا انا قبل ما اشتري تأكدت منهم انه الاصلي
المهم بعدها الموضوع سخن في دماغي وقلت هدعبس وراهم لحد ما كشف نصبهم.
و هنا ساعدني صديقي تامر عزب (Big shout to you bro) في البحث و الدعبسة جوا الكود بتاع الموقع بتاعهم اللي مسروق من الموقع الحقيقي مع تغير شوية بيانات عبيطة اي واحد عنده خبره نص ساعه في الـ HTML يقدر ينفذها بسهول.
زي ما حضراتكم شايفين فوق، ده الموقع بتاع الشركة النصابة.. ايقونة ال shopping cart معمولة بشكل مقرف نتيجة ان اللي عمل النسخة المسروقة للموقع بيعمل شغل نص لبه (و بالمناسبة انا اساسا UI DEVELOPER) كمان في الشمال هتلاقى ايقونه Email me مش شغاله اصلا.
دة بالنسبة للموقع..نيجي بقي للضربة الكبيرة (وهنا احب اشكر تاني صديقي تامر عزب انه اتحول لشارلوك هولمز و ساعدني في كل اللي هقوله ده)
النصابين دول لما خدوا بالهم ان في كذا حد اكتشف نصبهم، راحوا كاتبين بوست عشان يداروا بيه نصبهم، و ان المستهلك يقدر يدخل علي الموقع بتاعهم و يستخدم السيريال العبيط اللي موجود علي العبوة بتاعتهم في التأكد من جودة المنتج و انه اشتري حاجة اصلي و ما تضحكش عليه.
و زي مانتم شايفين، شالوا من عليهم مشكلة ان المنتج مش جاي من برا.. لا دول بيشتروه في شكاير ولا بلاليص وبيتعبي هنا في مصر.
و طبعا في ناس صدقت الكلام ده.. بس ايه موضوع السيريال كود دة بقي ؟ هنا التقيلة
زي ماقلت فوق ان اللي عملهم الموقع بتاعهم واحد مبتدء علي قد حالة، الشخص دة بقى راح عيني عينك يسال علي موقع بتاع برمجة ازاي يقدر يعمل الحته بتاعت السيريال دي.
الصورة دي فيها البوست بتاع اخينا المبرمج اللي عملهم الموقع المزيف بيسأل فيه ازاي يقدر يعمل برمجة حته السيريال دي.
و دة كمان الرابط بتاع سؤاله http://www.traidnt.net/vb/traidnt2701871/
الناصح فيكم هياخد باله ان السؤال بتاع اخينا ده كان يستفسر علي موقع اسمه https://asks.world/again/index.htm و دة مش موقع الشركة النصابة
هقولك طب اضغط كدة علي الموقع ده.. و هتلاقيه فتح الصورة اللي تحت دي
دلوقتي بتقول لنفسك طب السيريال ده لازمته ايه دلوقتي ؟؟؟ اقولك انا
هو كل اللي عمله انه جاب بار كود من أي generator موجود علي النت ببلاش يطلعله كان الف رقم ياخد الارقام دي ويحطها فى قاعدة البيانات بتاعت الموقع و يطبعهم علي كام استيكر ب ١٠ جنية و يلزقهم علي العبوة بطريقة غير احترافية خالص زي الصورة دي
فا المستهلك لما يشتري المنتج و يشك انه اتنصب عليه من منظر التغليف ولا من البن المعفن، فا يدخل علي صفحتهم علي فيس بوك تلاقيهم بيقولوا تأكد من الجودة بالباركود اللي علي العلبة بتاعتك، فل تدخل الموقع و تتأكد ان المنتج اصلي و حضرتك تتطمن و تتصور بيه و تعوج نفسك علي صحابك انك بتشرب قهوة ديث وش بقي وبتاع.
هو يبيع ربع كيلو بن عادي بـ ٢٠٠جنيه وهو في اي مكان ب ٤٠ جنيه او اقل كمان، وانت يتنصب عليك و تصدق انك بتشرب قهوة Death Wish بجد.
احسبوا انتوا بقي كم المكسب من حركة النصب اللي عملها دي.
و اخيرا.. اسيبكم مع صورة من اكونت انستجرام الشركة النصابة المحترمة
شكرا لوقتكم و اسف علي الاطالة و شكر خاص من القلب لتامر عزب علي المجهود الرائع في التحقيق.
و ياريت ندعم هاش تاج
#DeathWishArabiaFrauds #ديث_ويش_نصابين
