文：殘風留月
身為利物浦多年球迷，嘗試為現時領先的利物浦做少少個人分析及分享，希望拋磚引玉，再聽下大家唔同意見。
解放瑞士軍刀，重拾埃及文明
其實高普係利記都有一定日子，上屆打入歐聯決賽已經睇到隊波已經成形，但係就因為沙拿早段的傷出、卡利奧斯的犯錯而令球隊未竟全功拎到歐聯，嚟到今季沙拿係上半季前期往往俾對方重點照顧，一上腳就通常都有三個球員黎招呼佢，試問佢開季果陣又邊可能仲可以好似上季咁輕鬆？(蘭斯貝利：好記得，玩FPL時頭十輪沙拿得分真係好低...)
另一方面，以往打開正中鋒位的法明奴今季到現時為止表現唔算好，至少明顯差過上季。究竟點樣先可以改善？
針對住呢兩點，上季尾利物浦失去了古天奴後，被人話冇左個「大腦」，唔識戰術安排，但係今季佢再一次變陣，將沙拿移正、法明奴移後半格，將沙基利呢把「瑞士軍刀」放埋出黎，除左解放左沙拿之外，亦都將法明奴的狀態明顯提升返上黎，亦都冇浪費到沙基利只係做後備殺手。其實法明奴就算以前打正中鋒位，佢都好落力成日返中場線幫波同防守，上季都有唔少人取笑佢係「防守型中鋒」，而家移後半格的情況下，有沙拿係前面做左焦點，佢係攻守上都可以做得更好更多，大勝阿仙奴一仗就睇到佢威力。
花大錢，不要緊，最重要遇上對的人。
沙基利融入球隊進攻體系已經完全無問題，睇埋今季陣中其他中前場球員，法賓奴亦開始交到功課，係基逹因傷患下仲未叫做有好亮麗的表現，但都進步緊；張伯倫開始復操，雖然未知幾時可以復出，但如果真係能夠係復活節前出得返，對利物浦的板凳深度將會進一步提升。
至於史杜列治同奧歷治，下半季無論係想爭正選定係吸引其他球隊青睞而轉會，後備落場都會出盡力。反而係蘇蘭基今季係一隊就冇晒機會，如果史杜烈治同奧歷治真係離隊他投，對佢黎講會係好事，否則我覺得高普應該考慮下外借蘇蘭基令佢有較多上陣機會，為將來做準備，相信謝拉特應該好樂意接收。
後防方面，洛夫雲並唔係一個差的中堅，但係佢係需要有人幫佢包波，拍返住雲迪積克之後，睇到佢表現唔似之前咁多漏洞。至於連速度都未必慢過對方前鋒的雲迪積克，而家係利物浦後防係定海神針，頂上功夫無容置疑，連包波閘位都做得十分之好，係呢半季為止筆者個人的最佳球員之選。
右閘方面阿歷山大阿諾進步仍然神速，以雙十之齡可以係英超前列球隊基本上坐穩正選位，可見此子能力。阿諾6歲就加入利物浦，仲係土生土長的Scouser (利物浦人)，相信佢假以時日，一定會成為利物浦的Icon！
至於左閘，羅拔臣明顯比起近期開晒口話唔開心的摩蘭奴好，甚至近幾場都睇到，高普後備寧願用復出冇耐的佳尼去入替羅拔臣打左閘，都唔用摩蘭奴，考慮埋遲下通天老倌米拿出得返之後，睇怕摩蘭奴離隊日子明顯不遠。傷癒復出的佳尼的狀態亦都比預期中好，今季利物浦團隊在復康同狀態訓練上明顯比以往進步，對克服聯賽大大小小的傷患潮至關重要。
最後不得不提當然係守門員位置的艾利臣比加，呢位門將保持到上季係羅馬的好表現，英超進一步表現到自己。除防守穩健之外，仲有準確的長傳能力可以幫球隊做到反擊，儘快將個波去返前場，踢回高普為球隊制定的高位迫搶戰術，都係利物浦今季防守大有進步的其中一大重點。雖然佢都仲係偶有犯錯導致失波但人誰無過，但係佢同雲迪積克到現時為止的表現，絕對合乎利物浦買佢地返黎果陣付出的價值，而佢好可能係利物浦陣中自高巴拿以來最穩陣的一位門將。
今季利物浦到現時為止係英超踢20場失8球，其中12場保持清白，就算有失波，每場最多都只係失一球，除咗因為球員的好表現之外，高普帶領的教練團隊對於英超其他球隊進攻套路上了解都係好重要一點
（歐聯就六場波失咗七球啦….）
慢熱的高普
題外話一下，摩連奴被稱為「摩三季」，一鼓作氣第二季衝冠後，第三季黯然退場；然而高普往往係要帶幾季先見到成績，原因係因為兩位教練戰術風格上截然不同。摩連奴以防守反擊為主，相比起進攻，需要的是球員勤力每人走多一步互相補位，較易上手及見到成效；但高普帶隊打高位迫搶，就好似籃球打全場緊迫，唔只單單每一個對手拎波都會去迫，而係要練習點樣迫，其他球員企咩位點配合，針對住對方的漏洞去進行迫搶會特別有效，呢類資訊同配合係必須要用一段時間黎訓練同分析先做到。
利物浦可以走到冠軍嗎？
餘下賽程，今晚利物浦對完曼城呢一關，賽程上相對列強可謂較為容易，係歐聯十六強首回合主場對拜仁之後四日就要作客曼聯，以及如果晉級歐聯八強的話，八強兩回合中間果一場就正正係主場面對車路士的另一場硬仗。最重要係，對熱刺、車路士係晏菲路進行，係對曼聯就真係要小心為上。(蘭斯貝利： 2月24同3月2先後作客曼聯同愛華頓，最有機會失分)
望住個賽程，都會明白點解哥迪奧拿會話星期四贏唔到利物浦，就基本上爭標無望；而相信有心爭英超冠軍的球隊，都會想利物浦可以係十六強砌低拜仁。
不過，其實仲有每隊都仲有十八場比賽，邊有咁快睇得到邊隊冠軍。如果咁易估到，曼城就唔會經歷兩連敗，熱刺亦都唔會爆冷輸俾狼隊。身為利記球迷廿年有多，心臟強度已經訓練到爐火純青
一日未到手一日都唔好開心住，始終呢隊波實在海鮮左太耐太耐。今晚，拭目以待！
編者蘭斯貝利曰：
八日三戰的聖誕新年快車來到尾聲，愛隊阿仙奴如筆者所料作客憾和白禮頓、晏菲路被屠、幸於主場大勝富咸止血，拎4分守著第五位；曼聯三戰全勝有9分最威水，蘇斯克查來得合時，坐緊火箭後上緊，同阿仙奴只差三分；車路士有點可惜在全場被修咸頓逼和計晒三場都有7分，但與前三的差距開始有距離…
至於熱刺，狼隊一場真係爆晒大冷，不過對卡迪夫城時未有重覆犯錯，最後6分完成，不過未能壓住曼城的確只差一點點。至於今晚曼城主場迎戰今季未嘗一敗的利物浦，就肯定是左右著今季英超誰屬的比賽。正如哥帥所言，今場贏唔到波，7分差距真係好難追，稍一不慎輸波變雙位數字簡直萬劫不復，所以筆者都較定個鬧鐘，聽朝早四點，起身睇紅藍會！
除了follow我們的專欄，
仲可以在Facebook Like我們的專頁 — 足字室！
