信不信由你(1) — 曼德拉效應
最近,曼德拉效應成為一個熱門話題,我相信就算大家唔知咩係曼德拉效應,都應該聽人提過下。
曼德拉總統
首先,要了解咩係曼德拉效應,就先要了解咩係曼德拉。曼德拉,係一個人,佢係第一任嘅南非總統。
南非一向有好嚴重嘅種族歧視問題,白人高高在上,黑人下賤到不得了。而曼德拉係一個致力消除種族歧視嘅人。喺佢做總統之前就已經積極推動反種族隔離運動,但當時政府就以「密謀推翻政府」等罪名判入獄,前後共服刑26年半。

佢喺好多人心目中都係一個衛人,但到底曼德拉有咩咁特別?點解會有個效應係以佢命名呢?
是咁的,佢2013年去世。
但有好多人記憶中,佢80年代就已經喺獄中死咗。
曼德拉幾時死?
你可能會話,咁冇問題丫,一個咁出名嘅人,幾時死,一定有晒紀錄。check下咪知囉。
你講得啱,而呢個就係奇怪嘅地方。
所有文獻,紀錄,都指出曼德拉係2013年死。但有一班人,就堅持自己清楚記得曼德拉喺80年代就死咗。
咁簡單,佢記錯咗囉。
問題就嚟喇。如果係記錯,應該唔會有一大班人都記錯同一件事,而且記錯佢死嘅時間係同一個時間。
呢個時候,就有人提出平行宇宙理論,去解釋呢件事。
平行宇宙
首先,平行宇宙嘅意思就係,同一個時間,其實唔止我地身處嘅宇宙正在運作。而係有好多個,而每一個宇宙都大同小異。即係你身處呢個宇宙,睇緊呢篇文意,但同一時間,另一個宇宙嘅地球上,你可能係跑緊步。
而呢個理論指出,曼德拉喺宇宙A係80年代死的。而喺宇宙B,曼德拉冇死到。之後,喺某一時間點,宇宙A同宇宙B merge埋一齊,成為宇宙C。而喺宇宙C,有啲歷史會跟宇宙A,有啲歷史會跟宇宙B。
而曼德拉就跟宇宙B,冇死到。直到2013年先死。
而我哋嘅記憶,係會記得已被消滅嘅歷史。
而曼德拉嘅死就係其中一個例子。所以呢啲大量記憶同文件紀錄有出入嘅例子,就叫做曼德拉效應。
例子
而最可怕嘅係,我哋香港人好熟悉嘅嘢,事實紀錄同我哋嘅記憶係有出入。
蔡風華曾經講過一句金句: 一剎那光輝唔代表永恆。
但原來佢係話:一時嘅光輝唔代表永恆。
唔通,係我哋記錯?定係歷史已經唔同咗?
另一個更誇張嘅例子,李小龍喺精武門入面講咗一句人人都知嘅說話:中國人,並唔係東亞病夫。
我諗你都記得?咁我哋又回帶睇下。
聽唔聽到李小龍講咩?
佢話:中國人,唔係病夫。
唔通,係我哋記錯?定係歷史已經唔同咗?
信不信由你。