主席B女致開幕辭 (第四屆基督教性/別文化節)

文:Natalie Ng (SCMHK 主席)

各位嘉賓、各位參加者,大家好!我係B女,係本年度香港基督徒學生運動(SCM-Hong Kong)的執委之一,亦係第四屆基督教性別文化節的籌委之一。喺呢度,我代表SCM-Hong Kong 及文化節的籌委,歡迎各位蒞臨今日嘅活動。

香港中文大學學生會基督徒學生運動與香港中文大學學生報合辦的第四屆基督教性/別文化節,將於今日同聽日,喺中大舉辦一系列與性/別議題相關的學術及體驗活動。係呢度,特別多謝各位嘉賓嘅悉心準備,全靠你哋嘅參與,文化節先可以有咁精彩,同多元化嘅活動。

加入咗SCM之後,有一段時間我喺度思考,點解SCM要將性別議題作為一個重點關注嘅項目呢?究竟基督教、基督徒同性別有咩關係呢?我係一個返主流福音派教會嘅基督徒,曾經有導師同我講:「我真係唔明點解基督教組織會搞埋一啲肯定同性戀、情慾解放嘅嘢!」,亦都有導師每每去到涉及性別人權嘅話題,就拎出王牌答案:「只有神先可以作判斷」,彷彿基督教只會否定性別情慾,而當我哋開始發現主流基督教論述,無法處理現實的性別議題時,基督徒就唯有唔出聲。

然後,我發現我要問嘅,唔係「點解SCM要做性別運動」,而係「點解我哋唔可以做性别運動」。

近日有人炮轟SCM唔係「主流基督教組織」,舉辦性別文化節,有侮辱基督教聲譽之嫌。SCM的確唔係主流基督教組織,因為主流基督教界,甚或主流社會,長久而來都視性別為禁忌,甚至肯定父權思維。而SCM則確信我哋嘅信仰,係關於釋放,並且讓處於邊緣的人得榮耀,呢個就係SCM作為基督教組織,要做性別運動嘅原因。性小眾因為佢哋嘅性別特質,而處於社會邊緣,無法自主地面對同享受情慾,呢啲性小眾包括:不受伴侶福利保障嘅同志、因為身體殘障而難以享有性權嘅殘疾人士、被污名化為散播愛滋病病毒的男同志色情片演員等等。

今次文化節的目的,亦與SCM係性別議題上嘅理念同出一轍,就係要去肯定人類的情慾,係存在經驗中不可分割的部分,必須持續關注同考察。藉著文化節,我哋期望透過唔同嘅活動,去支援性小眾,以及更新教會,令大專生和基督徒反思信仰,結合生活經驗去探索、了解並接納自己。

最後,我想用各位少少時間,去多謝今屆基督教性別文化節嘅各位籌委。在座可能都有人知道,第三屆嘅文化節因為受到種種阻撓而被逼取消,令我哋更體會到打破校園、教內同社會恐性文化的重要性。幸得各位籌委在處處碰壁嘅過程中,百折不撓。同時,SCM Hong Kong亦要多謝中大學生報作為我哋嘅合辦組織,令第四屆基督教性別文化節得以成功舉行。

多謝各位!