「一醒覺經已殺出這條路」

見工通常會遇到一個問題:「你有咩 career goal / career aspiration ?」或者直接啲嘅問法係:「你嚟緊三至五年事業上有乜嘢目標?」

呢條問題通常留喺尾段,你個人已經適應咗個面試嘅氣氛,同個 interviewer 已經有少少了解,原先背好嘅稿忘記咗九成半,好容易一個唔該講咗心裡面嗰句。

即使你同我心入面都係諗緊「妖,鬼知咩?」口裡總會立亂作啲得體嘅嘢出嚟,不外乎都係喺呢間公司啲嘢上晒手,可能有得升職,或者涉足更廣泛嘅範疇。而我好老實同你講,呢啲廢話,九成九唔會成真。

「氏朱必有茵,事出必有因。」我咁樣講得,當然係有根有據。

朋友曾經面試過某間銀行,又係臨近送客, 阿 interviewer 咁樣樣問:「你覺得你三至五年之後會做成點?」咁阿朋友當其時都係豬噏啲咩「可能升過一次職或者有機會 relocate 去總公司 head office 學嘢」啦。結果?係出咗 offer ,但因為另一啲原因,朋友最終冇入到呢間公司。

又試過有另一個朋友,遇上一條類似嘅問題,佢都係希望 by that time build up reputation ,再睇下到時有咩機會晉升。結果又係出咗 offer ,佢有返到工,但最終未夠兩年就轉咗工。

面試如相睇,短則廿分鐘,長則一個鐘,夠畀你認識間公司幾深、又夠畀間公司了解你幾多?我冇去過 Table for Six 嗰啲 speed dating 場合都可想而知,真係得個桔── gut feeling 個 gut 。何況一般勞動人口 (唔計做老闆或者等退休賴死唔走嗰啲) 都係兩三年就轉工,你點樣坦白同 interviewer 講「三至五年後,我可能已經喺另一間公司做緊同你一樣嘅位」?呢啲唔係叫博炒,係摟打。

​撇除呢啲實際又貼身嘅原因,另一個比較 philosophical 嘅理由,係人根本冇預知能力。或者有所謂嘅「毋忘初衷」,但所謂初衷又點會圍繞住你僱主或你老闆嚟轉?梗係自我中心去構想,大學畢業嘅就希望三至五年後上到 ger 級 (manager ,唔好諗錯其他) ,已經 ger 級嘅可能諗緊到時會轉到去一間好啲嘅公司,去到樽頸位嘅或者希望五年後喺另一個行業企穩陣腳。

又或者,簡單啲,希望到時儲夠錢結婚或者買樓。

​事業上嘅轉折、走向,其實只係附屬於你人生嘅 derivative 。用金融術語講,如果人生係正股,咁事業就係窩輪。你人生條路想點樣行,咪會拉扯到事業嘅轉變,幾多女性為咗生兒育女而決定事業路途上到 mid-level 就行人止步唔再向上,又幾多人為咗 work-life balance 而放棄比較優厚嘅收入?先分清莊閒,如果你連人生三至五年後嘅目標都未定,咁講咩事業短中長期目標都係嘥氣。

​最後一樣嘢,係人嘅想像力有限,就好似你玩《金融群俠傳》咁,地圖原本就九成係唔知咩嚟嘅,咁我又點樣要求你 base on unknowns 去預測未來?好多行業本身就有一啲鮮為人知嘅崗位,唔係行內人唔會知道,何況大家所知嘅行業好多都係建基於生活日常經驗,銀行飲食運輸建築零售,全部都係個人消費層面,對沖基金分析員或者地盤工程安全主任呢啲,我唔講,你會知?

​返工嘅嘢,真係唔好一心諗咩升職加人工。知道你嘅人生、生活想要幾多,先好再講事業上要做到啲乜。

One clap, two clap, three clap, forty?

By clapping more or less, you can signal to us which stories really stand out.