你的性格如何,你的事業也必如何

如果話三歲定八十,咁我六歲嗰年返小學一年班,有人問邊個想做校車嘅「車長」 (即係負責點人數、帶隊上車嗰個人) ,我冇有識死行出咗一步,先至聽到話要小四以上先可以做車長──呢件事應該多少反映咗置記橫衝直撞、鍾意揸莊話事嘅態度。

喺職場上見過唔同類型嘅老細,有性格謙厚嘅,有滋柔淡定嘅,有吹毛求疵嘅。唔同嘅性格,套返落唔同嘅工種,跟唔同款式嘅老闆,就有唔同嘅效果。

我見過有個阿姐三分顏色上大紅,初初入嚟係威係勢,殊不知學習能力有限搞唔掂 back office 啲 workflow ,畀吹毛求疵嘅老闆鏟完又鏟,直情淪落到變咗鵪鶉咁樣樣。好啦,結果佢支持唔住劈炮唔撈,又居然獲得老闆個老闆挽留,幫佢轉去另一個部門重新開始。哈,工種大同小異,跟著個性情隨和嘅波士,好快就有風聲傳返去舊部門,話呢位阿姐已經故態復萌,揸住雞毛當令箭。

我唔知呢啲叫吸引力法則定係乜。不過,隨住 Career Path 嘅推進,一般嚟講唔係 Up 就係 Out ,唔係 Out 就係 End of Road 。咩解?上唔到去嘅,或者升咗上去但唔習慣唔適應嘅,自然離巢他投。走唔到嘅,一係冇能力走,一係冇心走,咁事業發展咪學連詩雅話齋,到此為止。

上唔到位做大佬而出走嘅,國際足球壇有個例子叫尼馬。佢喺巴塞隆拿超越唔到球王美斯,咪去巴黎聖日耳門做土皇帝。 Fair enough 。

咁升完職但又走嘅係咩玩法?有幾款: common 嘅係攞咗新 title 之後順勢跳出去人工再加一次;少見啲嘅,係原本做開 technical / specialists (例如 IT 揼 code 嘅朋友⋯⋯) ,升咗之後要 take up 多啲 management 嘅職責,對內帶 team 管人、對外湊客跑生意,是但一樣做唔掂都幾責駛。

呢個問題,源於 Specialist 同 Generalist 嘅分別,亦由於 Hard Skills 同 Soft Skills 係兩回事。技巧嘅嘢唔識可以學到識,但性格上鍾意同樂於從事嘅嘢,同幸福一樣,冇得勉強。

如果話態度決定高度,咁性格就決定你嘅經緯度。喺呢度定嗰度?答案,就喺你個心度。