「專家話天氣轉冷你要快快著衫」

星期一返工,同事討論緊荃灣西新盤好啲定係啟德新盤好啲。咁當然唔係網民講何雁詩好定係唐詩詠好嗰種有得講、冇得食嘅齋吹。事關,有同事真係入咗飛,抽到籌去揀樓。

咁大家一場同事,討論都係好理性嘅。「啟德溢價好高喎」、「荃灣西海濱空氣都幾好丫」,比較兩者互有長短,邊度多嘢食、邊區旺中帶靜,真係全面而客觀。唯獨是冇講過一個可能性:「不如唔好買住?」

時下流行 KOL 係咪?樓市有冇 KOL 呀咁?有,好出名嗰個叫施永青。佢做盛行?地產代理行。咁對佢嚟講有冇啲咩利益需要申報?交投越暢旺,無論平貴,佢都有佣金落袋。經紀嘅工作,就係打擊業主信心、製造恐慌畀準買家,令雙方收窄分歧,最終促成交易。當然,嚴格嚟講,樓價高啲啲,按樓價百分比計算嘅佣金係收貴啲嘅。

以上都只係圍繞緊二手市場嚟講。呢個世界仲有一手樓,而地產發展商係會畀佣金銷售成功嘅地產代理嘅。 Implication? 當市場上最大嘅賣家出貨,地產代理會不遺餘力協助推銷。佢哋講嘅任何分析同理據,基本上都係為發展商 (同自己) 荷包著想。

除咗施老闆 (及佢啲行家) ,近年仲興起一種叫按揭轉介嘅公司。無他,金管局為咗控制銀行體系承受嘅風險,辣招接連限制銀行喺按揭業務嘅活動。原本七成按揭變六成,又限住銀行風險資產嘅比重,簡而言之就係借錢會手緊咗、揀擇咗。於是,財仔也好,地產商相關嘅貸款機構也好,佢哋提供嘅「二按」為畀唔起四成首期嘅買家帶來希望。

例如話荃灣西個新盤,發展商提供八成過外嘅按揭,仲玩到唔使做壓力測試添。實力較差嘅買家真係多謝都嚟唔切。然後銀行加按揭息率咩?按揭轉介公司嘅代表就喺新聞 air-time 受訪話,睇唔到息口有空間再加。嗱,你睇唔到,有好多可能性,可能真係冇空間,可能係你隻眼有問題,可能係你視而不見。

而大家聽呢啲有利益衝突嘅 KOL 講嘢嘅時候,又有冇認真諗過佢哋說話背後嘅 hidden agenda ?定係真係「阿張小姐話冇事嘅」然後照單全收?

除咗地產經紀、按揭轉介之外,第三種樓市 KOL ,又點少得地產發展商嘅代表?印象中佢哋係冇唱淡過樓市嘅。喂,冇人嚟接火棒,佢投資嗰一百幾十億點樣返本?梗係幾大都講到,樓價好親民、前景無限、遲啲會再加價、而家你唔買就走寶。

然後如果萬一對唔住咁多位 KOL 睇錯市,佢哋要付上啲咩代價?冇咗份工?點會呢,錢都袋咗咯。 Reputation? 你肯定真係有?好似,係入錯市、捱貴貨嘅買家負責埋單。

以前我都仲會同人講,樓嘅嘢,要自用,要住咯,買得起又供得掂嘅,咪上車囉。但係如果連北角 30 年 300 呎單幢冇裝修舊樓都叫緊 500 萬嘅時候,我覺得,我唔敢再叫人入市住⋯⋯但阻人發達嘅事我又做唔出,所以,我冇再同我同事講我嘅睇法,除咗話,荃灣好似比較多好嘢食之外。

One clap, two clap, three clap, forty?

By clapping more or less, you can signal to us which stories really stand out.