想創你個心

日前遇到個朋友,佢話佢準備回歸老本行,唔再向 FinTech 方面發展。由於佢唔係第一次咁講,所以我完全唔意外,仲好替佢高興添。

有人話, FinTech nowdays is like Sex at HighSchool ── everyone talks about it but no one actually know what it is 。

香港金融創新之落後,真係講完又講、講完又講。 HKMA 近年推出 sandbox 畀銀行業界柴娃娃、玩泥沙 (誤) ,成就咗大象銀行嘅用手機號碼過數嘅 P2P Payment 同埋透過發出短訊 (SMS/Whatsapp/Facebook PM) 等人收錢嘅 PayMe ,當然仲有用指紋認證取代 Physical Token 嘅進步。

相比之下,業界講咗九年、最近終於推廣嘅電子支票,我唔知應用層面有幾廣。小額錢債已經有更多方法處理,或者公司客可能會用,但誘因係乜?點解唔就咁開張支票或者匯款?投資落去開發嘅資源,真係唔係要幾耐先收得返。

Apart from that ,香港人接觸得最多嘅咪就係如何炒賣虛擬貨幣囉。有朋友問我點買 Bitcoin ,有朋友話早期買咗 Etherium (都唔知有冇串錯) 賺咗幾個開。然後呢?乜嘢係 Blockchain ,冇嘢係 ICO ?Block c-hing 同 ICQ 或者仲多啲人知係乜。

日日睇電視睇 Tap And Go 拍住賞同埋 八達通 O-E-Pay 賣廣告,真心覺得八達通本身喺古代 (?!) 已經走得太前,方便到香港人嘅 stickiness 杰過王傑, not until 微訊支付同支付寶透過 WeChat / 淘寶滲入香港社會、大陸大學生流行派「紅包」,香港人都冇電子錢包嘅概念。因為已經有八達通。

香港嘅奇怪就係,小時了了、快人一步,到大咗就真係未必佳。而家開設咩 FinTech 學士課程,講真,邊有得追。

講返一開始提及嗰位辭官歸故里嘅朋友,佢話佢做返自己 core competency ,始終實在又搵到,仲可以舖路畀自己一家大細移民去美國。聽到呢度,我諗起吳克儉焗腸講嘅「生涯規劃」,係囉,人哋就係 plan 好咗,所以知所進退囉。然後你話要學校教學生生涯規劃,咁呢個城市又何來創新冒險精神?

正如 不負責任金融研究中心 梧兄分享 Financial Times 嗰篇講股神巴菲特 maximize profit margin 、締造壟斷、挖深護城河嘅文所講,一個社會要進步,需要嘅係更多勇於創新同冒險嘅創業家,而唔係作喺幕後要求企業擴大 market share 同壓低成本創造利潤嘅金主或投資者。