Member preview

「我想知,為何要做KYC」

十幾年前,大學同學曾經講過:「細時唔讀書,大個做運輸」。喂,其實我細細個第一份想做嘅工作其實係巴士司機囉好冇?

咁結果我當然冇考到牌揸巴士嘅車牌。如果唔係呢度就唔係「置地記者」,係「城巴司機」啦。

當時大學畢業之前嘅搵工熱潮,主要圍繞各大機構嘅 MT 同埋 Big4 ,二三線嘅咪一般銀行 Sales 職位,好聽啲,叫 Banking Services Trainee ,都係「青衣」丫,冇 Management 之嘛。首先學 sell credit card sell mortgage ,考完試上牌賣保險,再考埋 HKSI 就 sell 基金同 ELI 。

然後,港股直通車煞停、雷曼兄弟爆煲、迷你債券真身原來唔係債券 (係 CDS) 。銀行業最光輝嘅時代完結,接住落嚟係低處未算低:匯豐、渣打先後被揭發打擊洗黑錢同反恐不力,監管機構追住嚟咬,要實施大量補救措施去加強管理。

於是,以前最熱門嘅 Sales 工,而家多咗個對手: KYC 。或者對於唔鍾意跑數、害怕見客嘅新鮮人嚟講, KYC 工種盛行係一種福音。但如果你問我,我只覺得 freshgrad 做 KYC 係冇選擇中嘅選擇,工種分得過份精細之下,做銀行 back office 都做到好似工廠妹咁,而工廠妹應該唔需要有 degree 。

連登有個高質 post 講 KYC ,我冇人咁熟。 By way of background , KYC 簡單講就係 Know Your Clients (或 Customers) , retail 咪認識下你服侍緊嘅公公婆婆, corporate 嘅比較多變化,各行各業大中小企甚或信託同基金都包括在內。

How to KYC ?你點樣認識新朋友丫?問下人叫咩名、查下家宅囉。銀行攞埋身份證、地址證明,起碼知道眼前嘅客人姓甚名誰住邊度,再問埋錢從何來、開戶口做乜,留低嘅唔係一份心意,係一份文獻,記載住每段客戶關係嘅起源,證明畀人睇銀行唔係為咗賺錢而飢不擇食 (吓?) 。

呢個過程,參與嘅固然有前線對客嘅員工,但一大串文件總要喺後欄梳理、編檔 (filing) 方便日後存取 。何況總有客人背景比較神秘或者複雜,公司客亦唔係間間都茶餐廳或者補習社咁簡單。於是,要有人檢閱、覆核文件,界定風險類別,最後甚至要 compliance 批核。

正因為咁,勞動市場對呢啲後欄 (Back Office) 文職工作有好大需求。衰啲講,真係有手有腳都請。咁呢啲工種當然有複雜有簡單,有僂儸有首領,但萬變不離其宗:查家宅,跟 procedure 處理,用腦嘅需要唔係太多,除非自命神探蛛絲馬跡都唔放過。

呢個現象,都係現代商業社會工序越搞越複雜、分工越來越精細嘅後果。換轉喺細公司,人少少就兼顧大範圍嘅工作,但喺人多、架構龐大嘅企業內,作為一粒螺絲仔,可以做嘅就係重重複複、細微到見樹葉而不見林嘅工作。都係嗰句,初出茅蘆學識大公司嘅規矩、手勢係好事,但長遠嘅成長嚟講,做得咁專,真係冇乜益處。

有機會再寫 due diligence ,一樣同 AML / KYC 相關但可以更闊更深奧嘅工作。

One clap, two clap, three clap, forty?

By clapping more or less, you can signal to us which stories really stand out.

Responses
Only members of Medium may see responses to this story.