「故居新居也可安居,就是為著安睡」

大家一日健在,一日都有新聞聽。 (正確啲講係,一日唔死一日都有新聞聽)

上市公司編號 1178 嘅「共享經濟集團」公告話,請咗個新嘅 CEO ,芳齡廿二,月薪六萬,履歷欠奉,除咗本身係上市編號 643 嘅「恒富控股」嘅 Business Development Manager (呢個 title 好 tricky 但一般嚟講係 Sales) 。

另外,1178 同時委任新嘅 CFO , 23 歲女,同樣月薪六萬,之前喺深圳某公司做 Vice President (呢個朵一樣 tricky ,原則上好多零售銀行嘅前線銷售人員都係 VP) 。

早前市場就住證監持牌機構空殼有價,連帶 Responsible Officer (RO) 「人頭」都好搶手,唔使辦公,只需掛名,都可以月入幾萬。但 RO 假假地要有相關工作經驗,要有管理經驗,要考 HKSI Paper 。而家上市公司話你知,只要你識人, fresh grad 咁嘅資歷,一樣可以做上市公司 CXO 。

以前大家講到 CEO ,都係講緊年薪過千萬嘅打工皇帝如霍建寧。犬儒啲嘅,自己開間空殼公司報稱自己係 CEO 都係幾千蚊嘅消費。不過,上市公司喎,雖則妖股垃圾股生養眾多、遍佈全地,但呢位新晉 CEO 真係打破大家嘅想像。

置記早前知道某上市公司委任 CEO ,三十出頭,履歷又係九唔搭八,年薪百萬,都相信係啲幕後金主嘅馬仔出嚟做「人頭」。公司有咩實質業務冇人知,至少我贈你薄酬,你贈我人頭, fair enough 。而家玩得落去 fresh grad 層次,相信好快香港就會見到首位生於 21 世紀嘅上市公司 CEO 。

外國嘅月亮係咪特別圓?我唔敢講。不過美國科網股嘅 CEO 年輕才俊多的是 (係呀 Zuckerberg 我講緊你) 。喺香港要同樣實幹有為嘅年輕 CEO 難求,更難做到,倒不如有錢齊齊搵,鐵打嘅官府、流水嘅「首席執行官」 (行政總裁呀屌你) ,搵夠上岸出國嘆世界,曾經做過邊檔嘢嘅 C 乜 O 又如何?

One clap, two clap, three clap, forty?

By clapping more or less, you can signal to us which stories really stand out.