監管、虛擬、貨幣、戰爭

自從「兒子生性病母感安慰」之後,傳統紙媒有意無意透過標題通常冇標點符號嘅特色,創造出一連串別開生面嘅標題,帶摯埋新聞噏乜9 應運而生。既然係咁,呢篇文嗰四組詞語,畀大家自由發揮砌題啦好冇?

早前承蒙 老坑悠記 同 陸龜 賞面邀請,作客獻出置記首次嘅 Facebook Live ,席間講到中港監管機構接連出手出口術,提醒大家要防範 crytocurrencies 嘅風險。

置記唔熟悉 CSRC 嘅 mindset ,但就幾肯定 SFC 出通告,志在提醒市場各方,你班賭撚玩還玩,唔好喺我後園玩到污糟邋遢。 Not in my backyard ,少做少錯、唔做唔錯,其實同傳統官僚精神一脈相承。都難怪好多人以為證監會員工係公務員、證監會係公營機構。

原則上,如果啲友唔喺香港發行虛擬貨幣,唔搞 Initial Coin Offer (ICO) ,零售基金又唔夠膽走去以虛擬貨幣掛帥搞錯「虛幣基金」吸錢,咁 SFC 真係唔使太操心,唔使好似當年雷曼債券爆煲咁畀人話 Benz 迫力 (辦事不力) 。到時有邊個阿茂阿壽假借 Bitcoin 之名招搖撞騙、網上集資或者誘使、邀請市民大眾投資呢啲產品,咪捉下魚毛當交差。

至於大陸嗰邊吹到話連虛擬貨幣網上交易所都要拉人封艇,限期為九月底前自行熄燈,咁我就唔覺得中證監好擔心大媽股民蒙受損失喇。當局之所以要封殺一眾 crytocurrencies ,無非因為人民幣並非自由流通貨幣,資本進出中国理應受到當局嘅外匯管制約束。而家 Bitcoin 交易所變相畀投資者將人民幣兌換成另一種資產,比起南下港股通更自由 (港股通沽貨都係攞返人仔, Bitcoin 沽出可否收美金?我就唔清楚喇) ,唔整頓一下又點得?

講起自由兌換,今日香港金管局前總裁、 90 年代尾成功擊退大鱷嘅任志剛,喺佢個人網誌撰文,倡議香港股市應該改用人民幣計價、交易同交收。

或者你可以話佢高瞻遠瞻,睇到三十年內人仔國際化完成、變成自由兌換、自由流通嘅貨幣。問題係,香港股市有需要做爛頭卒去試水溫?上海同深圳 A 股都係用人仔架啦,有北上滬股通、深股通畀外資進入 A 股市場,有乜嘢需要喺港股照辦煮碗?上市公司用乜嘢貨幣發行股票,乜唔係公司自己決定嘅咩?匯豐、渣打、騰訊想用人仔集資嘅,係咪應該宣布喺 A 股上市呢?

再講,香港股市幾年前已經容許雙幣雙股,但無論係股份 (80737 合和公路基建) 抑或 ETF (例如 82822 南方A50) ,成交量一直低到無關痛癢咁滯。港交所喺市場基建做足又如何?如果大家真係對人仔計價嘅股票有需求,市場自然有供應、交易自然暢旺。而家任總無之啦啦提議港股轉玩人仔,純粹經濟因素真係講唔通。

不過又咁講,當任志剛作為行政會議成員,都可以話國內及外國投資者喺香港金融市場交易,用港元會蒙受貨幣風險 (明明港紙同美金有聯繫匯率喎) ,都可以建議香港市場容許各地投資者用自己嘅本土貨幣買賣投資產品嘅時候,真係冇咩冇可能。喺政治需要掛帥嘅世代,貨幣之間嘅戰爭,又點止純粹功能或者經濟因素咁簡單?