「襟派人士,是 Compliance」

上次寫過 Legal 同 Compliance 呢兩路相關相似但唔相同嘅人馬,應承咗寫返做 Compliance 需要啲咩條件。而家找數。

或者你會問,點解唔寫 Legal 有咩條件?你有冇見過人寫做醫生要有咩條件?醫科畢業囉。法務或法事 (唔好笑,有銀行真係叫 Legal Department 做「法事」,當然打完齋要唔要和尚就另計) ,首先都係要有讀 law , LLB / LLM / PCLL 呢啲,你讀得起嘅咪 go ahead 。

相比之下 Compliance 冇咁嚴謹嘅限制,你可以話相對地冇咁專業嘅,但容易啲入行,咪就係 give and take 。

Compliance 音譯中文可以當做「襟派人士」。

襟,襟撈個襟。點樣襟撈?小心駛得萬年船,行事謹慎為先,唔好立亂行差踏錯。 Compliance 本身唔係一項業務,只因為有 business 有生意,然後有相關規管,然後生意人話我冇咁叉多時間去研究守規矩,你搵個阿四嚟同我刨熟本書佢,話我知有咩做得、有咩唔做得。

於是,各行各業,銀行、投資、保險、食物、美容、地產代理、醫療用品⋯⋯都有自己行規,都要搵條友喺內部做 Compliance 。呢位「襟派人士」,最基本要知道有咩規矩,然後通知返前線 (同埋後勤) 點樣守例。

當然,間間公司嘅取態都唔同,有啲搏老命咁進取, Compliance 阻住發達就聽畀人燒乜乜,有啲保守到一成不變, Compliance 講乜都係金科玉律。但現實之中,溝通從來唔係一招了,好似打乒乓波咁,可以搓好多板。 Compliance 一開波講嘅嘢係 baseline , Business 還拖係佢哋嘅 stretch target ,然後大家就要收窄分歧搵 leeway (噢押咗個韻) ,以「既啱規矩又做到生意」為最終目標。

所以,「襟派人士」要襟撈,除咗小心使得萬年船,另一個要點係「順得哥情,都要得嫂意」。

換句話講,除咗重重複複嘅 reporting 或者文書操作 (攞牌、通知監管機構公司有咩變動) 之外, Compliance 嘅生活日常好大部份係 problem solving (if not 上網睇 Facebook / plan 旅行 (大誤)) 。

當然,有時問題來源唔係 business ,而係負責把關嘅監管機構。咁人哋受君之䘵,當然要擔君之⋯⋯憂。有糧出,自然有新嘅政策同指引出嚟,而呢啲嘢好少可話唔影響生意嘅,如果唔係整嚟做乜鬼。

於是,如何閱讀同理解官樣文章、諮詢文件及最終生效嘅新規矩,就睇個人修為同吸收能力。襟,襟在歷久常新,有能力迎接環境轉變,仲要係快速應變嗰隻。

咁你話,點讀、點解,乜唔係人人一樣架咩?每一隻字都尚且可以有歧義,拼埋一齊成句成段,意思真係可以有好多種演譯。何況英國前朝遺下嘅框架係原則為本 (principle-based) ,輔以先例 (precedent cases) 供後人指路,人類對於條文、規矩嘅演繹就變得好重要。

換句話講, common sense is so important 。襟派人士,一定要有「襟抆聲匙」。咁你唔好問我點樣培養 common sense 啦, it’s just not so common you know…

當然,我都見識過一啲完全唔係路,一味迴避、唔孭飛嘅 Compliance 。但人哋已經身處高峰接近雲端,不吃人間煙火,而我相信睇得呢篇文嘅十居其十都未上到去嗰個位,咁就唔好向嗰個方向諗喇,襟戇, James 。

One clap, two clap, three clap, forty?

By clapping more or less, you can signal to us which stories really stand out.