Member preview

「銀行唯一的秘密」

銀行界人多口雜,所謂「銀行secrets」其實都唔係啲咩秘密。如果真係有秘密,大概就係喺銀行界成功嘅奧秘:鬥早出世,同埋鬥長命。

好坦白講,你見到樓上啲老闆行行企企、食飯幾味,其實可能佢哋真係冇咩畀你優勝,只係,佢哋早過你出世,早過你入行,早過你霸咗個位,然後又面皮夠厚、襟得悶,於是排凳仔論資排輩就到佢哋騎住你。冠冕堂皇嘅講法係,佢哋經驗豐富、夠資深,而你就時辰未到,請再坐一會。

正如置記一位 Private Banker 朋友話齋,冇咩職業比金融或銀行來得沉悶。我另一位廣告界朋友曾經跳入銀行諗住安安穩穩過埋下半世,殊不知眨下眼又出返嚟。鬼咩,銀行嘅廣告,一來有監管條例規範 (「借定唔借?還得到先好借!」已經比起任何一句 banking slogan 入腦) ;二來銀行要顧及公眾形象,就連揀代言人都要千挑萬選,以免唔覺得揀著個名人,喺廣告臨出街先爆出醜聞。創意?唔係 first priority 咯。要忍到悶,真係一門技能。

世界上冇咩地方比香港更加鍾意銀行。睇外國電視節目如 “Graham Norton Show” ,如果觀眾受訪問時申報做嘅職業係銀行或會計之類嘅話,係會遭受主持人白眼嘅。但偏偏香港人,尤其是家長,零舍鍾意仔女畢業打份銀行工。無他,銀行嘅穩陣程度僅次於政府工,而升職加薪嘅潛力又比公務員高,業績好仲有花紅添!

之前舉過一個例子:舊時後生女讀完中五入銀行做櫃員 teller ,被名媛貴婦相中、邂逅公子哥兒再嫁入豪門,聽落好似都市傳說。而家大學生畢業搵唔到其他工亦總可以喺銀行搵個水泡,做 sales 跑數又好,喺後勤對文件對電腦都好,薪高 (比起其他行業嚟) 糧準、年假多、醫療福利好,喺今時今日嘅社會,都算天上人間。

入門嗰關門檻低而回報高,但向上嘅階梯其實往往亦受到戀棧呢啲薪酬福利嘅前輩堵塞。雖然銀行界流動性相當高,尤其是近年中資銀行收購本港同業然後大展拳腳,出手闊綽到 match 唔到;但係人到咗咁上下就開始落葉歸根,結咗婚生兒育女嗰啲固然係咁,其他大致知道自己事業見頂、有返十幾年年資嘅從業員,亦好少話再跳嚟跳去。

試問喺一個金字塔形態嘅機構入面 (即係頂層人數少,基層人數多) ,中上層嘅 senior/middle management 一旦停止流動,中下層嘅 junior management 又邊有上位空間?有,不過好少咯。

一個上層穩定,下層出現 glass ceiling 嘅環境,好容易滋生一種不思進取嘅心態。「反正做又係咁,唔做又係咁,不如慳返啖氣啦」,情況有啲似豬欄,圈養住一堆豬,你唔好跳咗出去或者咬主人隻手,就固定時間有固定豬餿過你吃。份量多少主人話事,得寵嘅或者有得食多啲,但好少餓得死你。

咦喂,點解好似講到咁似呢個社會嘅寫照?拿,我唔係專登架。不過,咁啱,金融行業正正係香港經濟支柱,而銀行又係金融行業入面請最多人嘅瓣數之一咁囉。

Like what you read? Give 置地記者 a round of applause.

From a quick cheer to a standing ovation, clap to show how much you enjoyed this story.