ເຮົາຮຽນຖືກສາຍແລ້ວບໍ່?

ຄຳຖາມໂລກແຕກຂອງນັກສຶກສາທຸກໆຄົນ ເຮົາຮຽນຖືກສາຍແລ້ວບໍ່? ສາຍນີ້ແມ່ນສາຍທີ່ເຮົາມັກແລ້ວບໍ່?

ນັກສຶກສາທີ່ມາຮຽນນຳຂ້າພະເຈົ້າຫຼາຍຄົນຕ້ອງອອກ ຫຼື ຢຸດຮຽນ. ບາງຄົນກໍຢຸດແຕ່ເລີ່ມຕົ້ນ ບາງຄົນກໍຢຸດກາງທາງ ຮ້າຍແຮງກວ່ານັ້ນແມ່ນຢຸດຕອນປີສຸດທ້າຍ.

ບາງນ້ອງທີ່ມີສະຕິແດ່ ກໍມາປຶກສາກ່ອນວ່າຊີວິດຈະເລືອກທາງໃດ ຄວນເຮັດແນວໃດ. ກໍຖືວ່າດີໄປທີ່ເຂົາມາປຶກສາກ່ອນ. ແຕ່ສຳລັບບາງນ້ອງຊໍ້າພັດໄປແບບງຽບໆ ບໍ່ບອກບໍ່ກ່າວ ບໍ່ມີການເຕືອນມາກ່ອນ ຄິດຢາກອອກກໍອອກເອົາດື້ໆເລີຍ. ກາຍເປັນອາຈານຕ້ອງມານັ່ງກຸມຂະມັບ ຖາມໂຕເອງວ່າກູເຮັດຫຍັງຜິດບໍ່ນໍ້ ນັກຮຽນຄືບໍ່ຢາກຮຽນນຳກູ.

ບັນຫານີ້ເປັນບັນຫາທີ່ຊໍາເຮື້ອນຳວົງການສຶກສາລະດັບຂັ້ນສູງບໍ່ວ່າຈະເປັນສາຍອາຊີວະ ຫຼື ປະລິນຍາຕີກໍຕາມແຕ່ ມີທັງຄົນຮຽນຈົນຈົບ ແລະ ມີທັງຄົນອອກກາງທາງ. ເຊິ່ງທັງໝົດນັ້ນເຮົາຕ້ອງມາເບິ່ງກ່ອນວ່າສາຍທີ່ນ້ອງໆເລືອກຮຽນນັ້ນ ແມ່ນສາຍທີ່ເຮົາມັກແລ້ວບໍ່ ມັນແມ່ນແລ້ວບໍ່ ຖືກແລ້ວບໍ່ ລອງຖາມໃຈໂຕເອງເບິ່ງກ່ອນ.

ໃນບົດຄວາມນີ້ຈະມີຄຳຖາມໃຫ້ນ້ອງໆໄດ້ລອງຖາມໃຈໂຕເອງ ກ່ອນທີ່ຈະຕັດສິນໃຈເລືອກສາຍຮຽນ ຫຼື ຜູ້ທີ່ເລືອກແລ້ວຈະໄດ້ຖາມໂຕເອງຄືນ.


1. ເຮົາມັກຫຍັງ?

ເລືອກສາຍຮຽນຈາກສິ່ງທີ່ເຮົາມັກ ແນ່ນອນມັນເປັນສິ່ງທີ່ເຮົາມັກເດ້ ເຮົາຢູ່ກັບມັນໄດ້ໝົດມື້ ໝົດເວັນ ບໍ່ມີເບື່ອ. ສາຍຮຽນແບບນີ້ລະ ແມ່ນສາຍຂອງເຮົາແລ້ວ ເຮົາມາຖືກທາງແລ້ວ ເຮົາຈະເລືອກຮຽນສາຍນີ້.

ແຕ່ວ່າ…ສິ່ງທີ່ເຮົາມັກ ພໍ່ແມ່ ພີ່ນ້ອງປ້ອງປາຍບໍ່ມັກນຳເດ? ແຟນເຮົາບໍ່ມັກເດ? ຫຼື ສິ່ງທີ່ເຮົາມັກຊໍ້າພັດບໍ່ມີສອນໃນປະເທດລາວເດ? ເຮົາຈະເຮັດແນວໃດ?

2. ເຮົາຖະນັດຫຍັງ?

ເລືອກສາຍຮຽນຈາກສິ່ງທີ່ຖະນັດ ມັນສຸດຍອດແລ້ວ ເຮົາຖະນັດທີ່ສຸດ ເຮົາໂປຣທີ່ສຸດໃນສາຍນີ້ ບໍ່ມີໃຜຮູ້ເທົ່າເຮົາແລ້ວ ເຮົາສຶກສາບຶດດຽວກໍເຂົ້າໃຈແລ້ວ ເບິ່ງນ້ອຍໜຶ່ງກໍເຮັດເປັນແລ້ວ ສາຍນີ້ແມ່ນສາຍທີ່ເໝາະກັບເຮົາທີ່ສຸດ.

ແຕ່ວ່າ…ສິ່ງທີ່ເຮົາຖະນັດ ມັນບໍ່ແມ່ນສິ່ງທີ່ເຮົາມັກທີ່ສຸດເດ? ສິ່ງນີ້ອາດຈະບໍ່ສາມາດນຳໃຊ້ໄດ້ໃນຊີວິດຈິງເດ? ສັງຄົມອາດຈະຍັງບໍ່ທັນຍອມຮັບເດ? ເຮົາຈະເຮັດແນວໃດ?

3. ເຮົາຈະໃຊ້ວິຊານີ້ຫາກິນໄດ້ບໍ່?

ເລືອກສາຍຮຽນທີ່ໃຊ້ຫາກິນໄດ້ ສາຂານີ້ມີຄວາມຕ້ອງການຫຼາຍ ໃຜໆກໍຢາກໄດ້ສາຂານີ້ມາເຮັດວຽກນຳ ຮຽນມາແລ້ວມີບ່ອນເຮັດວຽກແນ່ນອນ ໄປໃສໃຜໆກໍຖາມຫາແຕ່ອາຊີບນີ້ ຂ້ອຍຈະເລືອກຮຽນສາຍນີ້.

ແຕ່ວ່າ… ສິ່ງທີ່ຄົນຕ້ອງການຫຼາຍ ຄົນກໍຍ່ອມສະມັກຮຽນຫຼາຍ ກໍເກີດມີການແຂ່ງຂັນສູງ ເຮົາພ້ອມທີ່ຈະແຂ່ງຂັນແລ້ວບໍ່? ມີຄວາມສາມາດດ້ານນີ້ແທ້ບໍ່? ພ້ອມທີ່ຈະສູ້ຊົນບຸກບືນຍາດແຍ່ງກັບຄົນອື່ນບໍ່? ແລ້ວເຮົາມັກມັນບໍ່? ເຮົາຖະນັດໃນວິຊານີ້ບໍ່?

ນັ້ນເປັນພຽງ 3 ຄຳຖາມສັ້ນໆທີ່ຝາກໃຫ້ນ້ອງລອງໄປຖາມໂຕເອງກ່ອນ ລອງຖາມໃຈໂຕເອງເບິ່ງ ແລ້ວຫາຄຳຕອບໃຫ້ພົບ ເມື່ອພົບແລ້ວນ້ອງໆຈະຮູ້ເອງວ່າມັນເໝາະຫຼືບໍ່

ສຳລັບຄົນທີ່ກຳລັງຮຽນຢູ່

ຊິຖອຍຫຼັງກໍບໍ່ໄດ້ ຊິໄປໜ້າກໍໄປບໍ່ເຖິງ ເປັນຄວາມຮູ້ສຶກທີ່ນ້ອງໆນັກສຶກສາຫຼາຍຄົນກຳລັງປະເຊີນຢູ່ ຢາກບອກໄວ້ວ່າເຮົາໄດ້ເລືອກຮຽນແລ້ວ ສາຍນີ້ເຮົາເລືອກເອງ ເຮົາເປັນຄົນໝາຍເອງ ບໍ່ໄດ້ມີໃຜມາບັງຄັບເຮົາ ສະນັ້ນ, ເດີນທາງຕໍ່ໄປ ສູ້ຕໍ່ໄປ ກັດແຂ້ວສູ້ໄປຈົນມັນຈົບ.

ນ້ອງໆຮຽນໃຫ້ຈົບ ແລ້ວຈຶ່ງໄປຊອກເຮັດສິ່ງທີ່ເຮົາມັກ ຫຼື ເຮົາຖະນັດຕາມຫຼັງກໍໄດ້ ແຕ່ໃນໄລຍະທີ່ຮຽນນີ້ ກໍຖືເປັນການເກັບກ່ຽວປະສົບການຕ່າງໆ ທີ່ເຮົາບໍ່ຖະນັດ ໃຫ້ກາຍເປັນອີກສິ່ງໜຶ່ງທີ່ເຮົາຖະນັດເປັນໄປໄດ້.

ຢ່າຫວັງ ຫຼື ວາງເປົ້າໝາຍທີ່ສູງເກີນໄປ ຈະເຮັດໃຫ້ເຮົາຕ້ອງບືນຈົນເກີນໄປ ແລ້ວເຮົາກໍຈະເມື່ອຍ ທໍ້ແທ້ໝົດຫວັງ ຈົນເຮັດໃຫ້ເຮົາບໍ່ສາມາດກ້າວຂ້າມຜ່ານອຸປະສັກຕ່າງໆນາໆໄດ້.

ບໍ່ວ່າຈະເປັນແນວໃດກໍຕາມ ຈະກຳລັງເລືອກສາຍຮຽນຢູ່ ຫຼື ຮຽນແລ້ວແຕ່ຫາກໍຮູ້ໂຕວ່າມັນບໍ່ແມ່ນ ກໍໃຫ້ມີເປົ້າໝາຍທີ່ແນ່ນອນ ແລ້ວເຮັດເປົ້າໝາຍນັ້ນໃຫ້ບັນລຸເທື່ອລະກ້າວ. ໂດຍການວາງເປົ້າໝາຍສັ້ນໆ ກ້າວໄປເທື່ອລະໜ້ອຍ ສຳເລັດໄປເທື່ອລະຢ່າງ.

ສູ້ສູ້ເດີ້ ຊີວິດນັກສຶກສາ