Chanda Mama

Chanda Mama,

Chanda mama, aaj aap bade hi pyare dikh rahe ho
Gol aur safed mujhe khidki se taad rahe ho
Log kehte hain kayi daag hain aap mein
Main kehti hoon jaadu hai aapki chamak mein
Aapki roshni jab mere mukh par padti hai
Puri duniya tham jati hai
Main khil uthti hoon
Aapki chamak ko rom rom mein sama leti hoon
Chupke se dekhte ho mujhe, jaise aaj kar rahe ho
Chanda mama, aaj aap bade hi pyare dikh rahe ho.

Chanda mama, aap aisa kyun karte ho?
Mujhe sulaake khud gayab ho jate ho
Dinbhar main aapko hi dhoondhti rehti hoon
Par aap nahi milte, aisa kyun?
Aakhir maine surya se puchh liya, "Kahan hain mere chanda mama"?
Usne kaha, "raat tak intazar karo, woh tay kar rahe hain ek safarnama"
Chanda mama, mera saara din aapke intazaar mein gaya beet
Aakhir sandhya ne pehgam bheja "le aa gaya tera meet"
Main daudke khidki ke paas gayi
Aur aapko dekhke achanak udaas si ho gayi
Aaj aap nahi dikh rahe kal jaise 
Aap gol nahi ho, aisa kaise?
Aapki chamak bhi dhoondhla gayi hai
Kya aapki madad kar sakti hoon main?
Yahi sochke main aapki taraf torch dikhati hoon
Par aap badal ke peechhe chhup jate ho, naa jaane kyun
Gumsum hoke jab main chali jati hoon
Aapki roshni mujhe awaaz deti hai "arey kahan chali gayi tu?"
Main mudke dekhne lagi aapko
Aap door se muskura rahe the dekhke mujhko

Phirse aap chale gaye door
Ab main samajh gayi yeh hai aapki goor
Yakeen ho gaya mujhe 
Nahi reh sakte hum bina ek duje
Dinbhar aapke intazaar mein thi
Pata tha aap aoge jald hi
Aaj sandhya ne pehgam nahi diya
Shayad use bhi ab pata chal gaya
Ki aap roz raat ko hi aate ho
Meri tanha raaton ka sahara bante ho

Chanda mama, main kabse aapki raah dekh rahi hoon
Kya aapko dikh rahe hain mere aansoon?
Shayad aaj aapko der ho gayi
Yahi sochke khudko manati gayi
Raatbhar aapke intazaar mein beeti
Ab toh pehli po bhi phati
Parantu aap nazar nahi aaye
Ab kya hoga meri udaasi ka upaay?

Chanda mama, main aaj dinbhar sochti rahi 
Ki aapko kuch hua toh nahi
Mera chen chheenkar lekar gaye aap
Shayad mujhe ho raha hai taap
Aapki yaad mein khoke bitaya har pal
Kya aap nazar aaoge kal?

Haar maanke sar khidki pe patak ke jab main rone lagi
Aasmaan se ek pyari se muskurahat dikhayi padi
Aap halki se hasi has rahe the 
Main bhool gayi jo bhi shikaayatein karni ki aapse
Phir achanak kuch kami mehsoos hui
Main phir dukhi ho gayi
Aap aaj bhi gol nahi ho
"Main aa jaunga wapis, mujhe kuch din do"
Aapke shabdo ne mujhe jeene ka hausla diya
Ek ankaha vaada kiya

Roz thode thode badhte gaye aap
Mere dil mein umang jaga gaye aap
Aapki badhauti aur meri muskaan eksath chalne lage
Aakhir phirse aap gol dikhne lage
Aapki chamak aur ek baar padi mere mukh par
Yeh jaana pehchaana sa sparsh chhaa gaya mere dil par
Yeh raat bahut khaas hai
Kal aapko wapis jana hai
Chanda mama, iss milan ki raat ko hum khulke jee lenge
Ek dusre ko apna sab kuch de denge
Main jaanti hoon aap kal mujhse door ho jaoge
Phir kuch dino baad hi lautke aaoge
Ab aapki reet jaan gayi hoon main
Phir bhi aapki yaadon mein kho jati hoon main
Chanda mama, aapne yeh reet bahut soch samajhke banayi hai
Phir bhi aapse ek sawaal karna chahti hoon main-
Kya aap mujhse door jaate ho jaise phirse mere paas aa sako?
Ya mere paas aate ho jaise phirse door ja sako?

One clap, two clap, three clap, forty?

By clapping more or less, you can signal to us which stories really stand out.