通常喺松仔園行完一圈，會返出去大埔公路入口離開。想增加新鮮感，中途轉線落港鐵大埔墟站。落山路全面人工化，吃力指數低，緊記要帶傘。
行山路線：
松仔園巴士站 ＞大埔滘自然護理區 ＞大埔滘林徑（藍路） ＞大埔滘林道 ＞山塘路 ＞龍成堡 ＞盈峰翠邸 ＞山塘新村 ＞港鐵大埔墟站
落港鐵站的轉線點，就喺大埔滘林道滘鉛段的涼亭旁。只要沿住大埔滘林徑（藍路）行，直至離開林木區轉踏水泥馬路，自然見到前面有涼亭同流動廁所。涼亭旁邊有路牌指示落港鐵站。
落山主要行石級，係一條石屎晨運徑，冇機會踩到泥，相當易走。之後接入山塘路，左轉沿馬路落山，途經龍成堡、盈峰翠邸、山塘新村。落到山塘路盡頭，前方冇幾遠就係大埔墟站。落山呢程用咗大約八個字。
成個行程以睇植物為主，大部份時間喺樹蔭下走動，只係到咗山塘路，就要開住傘一路落到大埔墟站喇。
*** *** ***
行山貼士：
- 愛護郊野，勿吸煙，勿亂掉口罩。山野不設垃圾桶。
- 自己垃圾，自己帶走，包括水果皮、果芯。亂掉果皮只會吸引其他人堆放更多垃圾。
- 自己垃圾，自己帶走，包括水果皮、果芯。亂掉果皮只會吸引其他人堆放更多垃圾。
- 自備足夠糧水，沿途冇補給。
- 防曬、防蚊。必須時刻留意天氣變化，提防可致命的中暑／熱衰竭。
- 完成行程時間：約 2 小時
🚏 🚌 🚏 🚌 🚏 🚌 🚏 🚌 🚏 🚌
交通貼士：
九巴 72 / 72A / 73A / 74A 或綠色小巴 28K 到松仔園站
