巧克力ê台語

捌有一擺聽吳密察ê演講講，台灣佇日本時代，1900年到1910年ê十年間，對種甘蔗得著ê經濟利益，成長較欲一千倍。

嘛捌聽老輩講過，怹佇日本時代做囡仔ê時，欲食糖仔餅仔四秀仔是比國民黨來台灣ê初期閣較簡單。

雖罔咱會感覺「巧克力」是近代ê物件，但是佇日本統治台灣初期，這粒佇製糖工業內底蓋重要ê小島，就已經食有。

1907年ê日台大辭典內底有寫：

這馬咱咧用華語講ê「巧克力」，彼當陣叫「芝車力」，若用台羅拼音，寫做「tsi-ku-la̍t」。

不而過，現此時你若佇街仔路頂講芝車力，檢采無人聽有囉。