唔好再亂咁影！教你攝影時構圖的重要性

隨住時代進步，科技愈嚟愈先進，電子產品嘅功能亦愈出愈多，好多神奇功能，百花齊放。就好似手機咁，甚至開始取代傳統專業攝影相機添！

而且而家啲人，鐘意咩都攞手機出嚟影一餐飽，相機食先，方便呃 like 嘛！不過，影左十幾張，甚至幾十張都冇一張相可以見得人？

今日教大家一個簡單影靚相嘅方法 — — — 構圖。

三分構圖／黃金比例分割
唔知大家有冇聽過三分構圖或者黃金比例（ 1：1.618 或 2：3 ）呢？其實喺我地嘅日常生活入面，一直都有黃金比例嘅構圖存在，一啲睇落覺得靚嘅事物，例如著名嘅《蒙羅麗莎的微笑》呢幅畫，就正正係黃金比例分割嘅例子喇。

三分構圖係將相片分別從上下、及左右分成三等份，即係總共分成九等份，形成 “井” 字形分割。

喺相片構圖嘅時候，相片主角可霸佔成張相嘅 ⅓ 或者 ⅔ 面積，咁樣嘅構圖可以營造出較廣闊同更具視覺張力嘅畫面，望落更有平衝感同協調性。

原文刊登於SRSWorks

相片主角亦唔一定要擺係中間位置，可以擺係 “井” 字型嘅四個交叉點或中間位置偏左或偏右位置，咁就唔會覺得張相失左平衡，又唔會覺得影出黎嘅相老土啦。

反射式構圖
呢個反射式構圖，通常出現喺影湖光山色嘅時候，或者好似前排好流行用水面形成鏡像效果嗰啲，其實都係應用左呢個構圖方法呀！當有物件可以作出反射嘅時候就可以使用，喺反射式嘅構圖入面，通常嘅最常用嘅係 1／2 嘅對稱方式，呢種構圖能最夠呈現到平衡感同穩定嘅視覺效果。大家日常可以留意下地下嘅水氹或者大廈外牆，可能有意想唔到嘅收獲咖！

對稱式構圖
換言之，就係將相片分割成兩個等份，左右、或者上下完全對稱。同反射式構圖唔同嘅係，對稱式構圖並不是利用物件反射，而係本身被拍攝對象就已經係對稱嘅樣。不過要遇到對稱物件可能比較講求運氣或準備，今時今日，一個 App 可以幫到你。出黎個效果可能更有趣添呢！

遠近構圖
適當地利用遠近構圖可以營造一種空間感，加強主角嘅誇張度，以近大遠細嘅方式令主角更為突出，亦可以引導讀者嘅目光。呢個方法仲可以同時利用相機景深效果去突出主角，而家某啲品牌手機嘅相機，都做到好好嘅景深效果，張相即刻專業晒！

角度
係影相嘅時候，角度同樣重要。例如俯視、仰視、上、下、左、右等等……攝影者企嘅角度都好影響成張相嘅效果同觀感。不妨花多啲時間去印意一下身邊事物，唔同角度影落去會有唔同效果咖！（例如靚女自拍一定要高炒，大家明咖啦！）

另外，影一啲大場景嘅時候，畫面一定要平穩水平，唔可以東倒西歪，拍出來的嘅相睇上去先會覺得舒服。

當然啦，任何構圖都需要注意一開始提到嘅黃金分割比例，即係 ⅓ 或 ⅔ 嘅分割法。特別係對稱成構圖同反射式構圖，當中如果被拍攝事物有唔係對稱嘅關係時，就要多加留意啦！

而家大部分手機相機都有三分構圖嘅網格的功能，可以去設定度打開網格，有左三分構圖網格輔助，掌握埋以上提過嘅構圖技巧，就可以輕鬆影出更靚、更有平衡感、更容易呃 like 嘅相啦！

如果你喜歡這篇文章，請拍手給小編知道：

1 個「拍手」：看完文章拍手留記錄
2–5 個「拍手」：認同文章內容，覺得不錯
5–15 個「拍手」：想多看到這類文章！小編加油！
15–49 個「拍手」：實在太好了！要多給點拍手以示支持！
49 個「拍手」或以上：不知道一直按住「拍手」可以給到幾多呢？哈！