<鄭健和> — 見證港漫的潮起潮落,香港亦然 [下]
注意: 以下文章同樣嚴重劇透, 如果你睇緊和仔大人任何一本作品又未睇晒,麻煩按過另一篇文睇。
世上任何一樣野唔會永遠都只向住一個方向行。當某種力量行到一個極致,就會有一股相反力量產生去對抗/中和。呢條法則適用於好多地方,例如自然,物理,股市,政治等等。
同樣地,當牛佬選擇做港漫界的王晶,藉住老行尊既地位不思進取時,一股名為”鄭健和”的新力量正在港漫界冒起。如果要打個比喻,我會用港漫界的林超賢去形容和仔大人既才華。





首先,鄭健和同其他港漫創作者其中一個最大的分別係,他無試過有一本作品爛尾(火龍仲叫做未完, 唔算)。係呀,你無睇左,無一本作品爛尾已經係一個成就。一個港漫故事可以from start to finish,當中牽涉既主要原素包括銷量,讀者口味,市場反應 (以上三組詞語都係講緊同一樣野 — customer)。畢竟出版一本港漫,絕對係一盤生意。個故事唔啱讀者口味,跌兩三期書,漫畫社已經要考慮摺左本書佢。
其次,個故事能否走到最後,亦好視乎主編對故事的掌控能力。和仔有講過佢構思<封神紀>之初,已斷定以主角阿狗由奴隸,到一族之主,再成為神的過程為故事主軸。觀乎以上作品最長的一本<殺道行者>,以190期作結,和仔應該無因為本書受歡迎而強行拉長個故事。
大眾將港漫視為娛樂,你畫到個扣人心弦的故事,市場反應基本上已經唔會差。和仔更進一步,將大量喻意注入其作品,引發讀者思考。作為文化鑑賞者(對,我一直認為港漫是香港文化),我更注重作者透過其作品表達的意念多過作品本身。<殺道行者>探討物理,時間,善與惡同因果。<封神紀>諷刺強權,而<西遊>我則認為是要表達有啲我地一直認為美好既事情,實際上並唔係我地想像中咁美好。當發現真相時,我們更加唔應該因為以前的包伏而置之不理(因為係故事大橋所以唔劇透了,有睇既人應該知我講咩)。
喜愛的角色真係多到數唔晒,硬要本本都選的話,大概會係以下人選 :





赤心 — <武神鳳凰> — 表面上只懂玩樂的二世祖,但有著仁慈的心,和全角色中最高的武學天份。初戰最強的煉戰仍能把他壓倒,及後更協助大地方勝出武神大會。
末日騎士 — <殺道行者> — 殺道會傾盡人力物力創造的最強改造人,其”完全學習技能”可瞬間學會並使用對手第三度醒覺的異能 (但最後一戰並無學到阿信的量子世界[誤]?)
子羽 — <封神紀> — 大商國紂王之弟,一生浪跡天崖。他的劍,被譽為人間最強之劍。
約翰 — <大軍閥> — 非主要角色,但其故事極之動人(後談),
白狼 — <西遊> — 故事主角,性格描述為”他有一種近乎瘋狂的執念,未到目標的話至死也不肯罷休” 。
如來 — <西遊> — 天界第一,其"慈悲之怒拳"更是勁到裂開。故事可以發生也是多得他拼死將奇經帶離天宮。
仲有個孫悟空,之後會寫一篇文。
至於最喜愛的場境更加係唔知點揀,唯有隨機選幾個最鍾意的劇情(什麼邏輯?)
天泣對蒼魂 — <武神鳳凰> — 武神大會第一場,亦係全書最好睇的一場對決,真係隔住本漫畫書都feel到打到空氣凝結。
末日騎士對凱撒 — <殺道行者> — 同樣係打到天崩地裂的一場。
子羽同紂王道別的一幕 — <封神紀> — 我嘗試用一幅圖去表達個意境。

約翰與蘇珊 — <大軍閥> — 約翰穿以其超能力穿梭時空,回到和蘇珊(其女友)相識之前,選擇不認識她去避免她之後的死亡。
香港人成日放係口邊的 “變幻原是永恆”, 其實係演繹緊Dynamic equilibrium呢個概念。世界唔會永遠既一套法則可以一直用落去。牛佬將<古惑仔>授權電影公司,拍出賣座的<古惑仔>一至六集。但到今時今日拍出的<古惑仔 — 江湖新秩序>卻仆直。和仔授權騰訊出<封神紀>同<西遊>動畫,暫時叫食到條大陸水。之後點繼續搵個equilibrium, 直係考佢功夫。
同樣地, 要點搵到個變幻,去配合個永恆,更加係香港人的一大課題。香港產業太集中於四大pillar industry,只要對世界局勢有點認知的人也會聯想到,當別的地方成功複製並趕上香港的產業模式,香港的競爭力和國際地位必然會被大幅削弱 (而事實上這情況已經逼在眉睫)。可改變現狀的,基本上有三群人:
- 為官者: 制定政策去扶助新產業,製造一個條件有利的ecosystem去讓初創企業成長 (其實ecosystem可以由業界自行創造, 政府只需提供助力如稅務優惠, 地方已可)。能做到這程度者,其團隊必然是極具前瞻性和市場觸覺。(編按:香港政府 … 見過Steve Jobs已經係一大成就,所以還是不用談了。)
- 資本者: 以其資本配合創意者的意念,必能育之 (但多數香港的資本者都係老一輩的人,一係就求穩,一係就以利益行先,所以還是不樂觀。)
- 創意者: 有的是創新的想法,苦無資金。(一係靠積蓄。但以此創業基本上同賭上自己的一切無咩分別)
但掉番轉頭黎諗,點解我地硬係要追求經濟發展呢? 其實一眾香港人眼裡只追求利益,實在忽略同錯過左好多美好既野。
慶幸既係近年見到幾個以自己既理想出發,將自己想做既事做好,再感動他人的例子 (e.g. 空姐發夢日記 Genie, Wood & Ink, 緬甸二家姐, 千紅幸福照相館)。
我有時會諗,如果香港人有一半以上既人都可以做出好似佢地咁,做到自己想做的事,也許,香港就有點不一樣了。
這個,會是我們正在尋找的equilibrium嗎?
