又入院記
手術後記仲寫緊
上星期三（5 月 8 日）凌晨去去下廁所下體忽然血流不止。WhatsApp 問完診所意見後，我爬返上床躺平等待止血，但血依然一直流個唔停。血一路流，我一路 message 兼 voice call 問診所有冇咩可以做，但答案都係「冇」，只能夠等。血流如注（冇誇張）咗大約半個鐘，大概感覺到止血嗰陣，個人彷彿隨時失去意識，發冷兼暈下暈下。
隻手伸唔到去酒店電話搵前枱求救，唯有經診所打返電話俾酒店搵人上嚟。有位 staff 姐姐上嚟後，叫我有咩直接 LINE 佢，於是成晚半睡半醒咁搵咗佢求救幾次：幫手買嘢飲、拎嘔吐袋、較細冷氣、拎毛巾當被冚⋯⋯要佢睇到個住客下面成攤血仲要幫手買嘢飲（我仲爭 10฿ 未還），我嚴重唔好意思⋯⋯ :’(
斷斷續續瞓咗幾次後，卒之捱到七點零鐘。LINE 完同事今日冇辦法開工後，我嘗試落床梳洗，但一坐起身個人就勁頭暈，唯有攤返低，攤到原定術後一週面診嘅時間 08:45，睇下診所有冇人會上嚟。
大約幾分鐘後，診所護士推住輪椅上咗嚟，望咗下傷口，同嘗試俾我坐上輪椅。然而可能因為失血過多，我一坐起身又再眼冒金星。之後有返意識嗰陣，個人已經攤咗喺地上面，兩位護士好用力咁叫醒我。意識恢復後，護士同我講要即場吊鹽水，同埋要 call 白車送返我去手術間醫院，檢查下發生咩事。
隔咗陣吊鹽水 setup 先行由診所送到。吊完鹽水後我繼續躺平，keep 住同護士講嘢嚟保持清醒，同埋問護士遞啲之前買落嘅紙包果汁嚟飲。
吊咗約半個鐘鹽水後，救護車到喇。眾人合力移我上擔架床，期間護士幫我執咗最緊要幾樣嘢落背囊——銀包、證件、電子產品s，但叉電線/器就冇攞到。由於酒店部𨋢太細，入𨋢時張床要 set 做坐姿。呢個時候個人已經好返些少，就算坐起身都冇見頭暈。
估唔到第一次瞓喺白車竟然係喺泰國。白車上醫生間中會同我講嘢，確保我清醒。我講到自己喺東京返緊旅遊 related 嘅工，佢就話自己上星期都去完東京旅行嚟，仲話如非必要唔想去新宿站附近。響警笛嘅救護車就係唔同啲，車程比上兩次坐診所車來回酒店同醫院都快唔少。
重返醫院，今次首先入咗分流站。由擔架移過另一張床，再度多次血壓血氧，今次仲有啪埋手指驗血糖，另外仲抽咗枝血去驗。攤咗陣又有位護士姐姐過嚟俾入院紙我簽，佢話佢學緊少少中文，識講「痛」係「tòng」。
恰咗一陣終於可以上病房。本來以為今次會去普通啲嘅病房，不過入到𨋢見到職員撳 22 樓，就知又係送返去前幾日出院嘅私家病房。返到上去，見到前幾日 say 完 byebye 嘅護士姐姐們，我會心微笑咗下。房號就有啲唔同，今次搬過咗兩格，由 2257 去咗 2259。
入院嗰兩晚同上次冇太大分別。都係每隔幾個鐘有護士嚟度血壓血糖，七點幾早餐，十一點午餐，四點半就晚餐。每朝有護士嚟抹身，間中清埋尿袋咁樣。唔舒服嘅同樣係冇得洗頭，同埋成日半夜擇醒。吊鹽水今次多啲花臣，除咗鹽水仲有血清同血，有時仲有止痛藥直接打落去。紅色嘅血總共輸咗四定五包：除咗有一包啲血入嚟嗰陣，感覺有少少拮到皮膚嘅痕癢感外，打另外幾包嗰陣都冇話有咩奇怪感覺。
由於冇準備到差電器同電線，第一晚我要好好分配幾部機剩低嘅電量，甚至將 main 緊嗰部機都熄埋。好彩朋友第二日嚟探病嘅時候，有帶埋叉電線同叉電器，感覺自己可以做返個文明人——同時我不禁喺度諗，點解叉電器會叫做「尿袋」？自己吊住嗰個尿袋，明明係喺身體度 extract 啲尿出嚟，功能上同輸電落部機度嘅叉電器啱啱相反，點解叫尿袋？純粹因為一嚿嘢駁住另一嚿嘢？
安然度過第一晚後，第二朝主刀醫生終於嚟巡房。醫生話下晝要驗下下體睇下係邊度出血，同埋睇下使唔使再做手術。心經膽戰等到下晝，終於有人嚟搬我上擔架、送我落檢查室。醫生用鴨嘴鉗打開陰道後，先係清潔咗一下裡面，跟住再望下有冇傷口。佢話見到有個傷口，應該係尋晚爆血嘅位置，但上面已經有凝血冚住，就唔冒險清理了。假如之後成晚都冇流血，就可以出院；假如再有出血，就要再全身麻醉做手術，聯針聯返好個傷口。
我問點解一路都覺得係條直腸入面痛但傷口會喺陰道，佢話而家嘅我仲未習慣 sense 到啲感覺係嚟自邊個窿。如是者我全日都極小心翼翼行事，包括喺床上去廁所都秉持唔好出力嘅精神。卒之隔咗成晚都冇血，10 號星期五下晝可以出院。但尿喉就要再插埋個 weekend，到下星期一返診所覆診，確保冇再出血嘞，先至可以拆埋咁話。
食完 lunch，醫院有人上嚟搵我埋單。一睇，成七萬฿ T_T 萬幾蚊港紙、三十幾萬円，我份夏季花紅咁就冇咗，粗俗啲講真係成世人屙過最貴嘅一篤屎 it really is some bloody shit. 唯有之後睇下 claim 唔 claim 到保險。（雖然都冇乜期望）
