手術記
續：應該係 Medium 首個香港人做性別適合手術前嘅 live diary！
齋戒日（D-1，4 月 30 日）
承上文，手術前一日我要清空腸胃，所以 30 號我唔可以攝取任何固體食物，同埋要飲瀉藥排便。因此手術前最後的晚餐，就係 29 號晚酒店對面嘅海南雞飯，同埋之後喺 M 記買嘅粟米批（出院後想試埋香芋椰子批同菠蘿批）。
30 號朝早十點鐘，我照診所指示飲曬成枝瀉藥。好彩係一般藥水味，唔苦、唔太難飲。瀉藥大約十點半開始發揮效用，頭幾次真係倒水咁瀉出嚟。為咗補充返瀉走嘅水分，診所提我記得每十分鐘飲一杯水，同埋下晝三、四點影一張廁所相俾佢睇（suppose 要係清澈冇嘢）。可以飲水、茶、齋啡、純果汁，但奶類飲品同有果肉嘅果汁就唔得。
費事個口太寡，我前一晚去 7–11 買定咗啲茶同椰子水飲。另外仲有買咗枝能量飲料，但飲咗兩啖覺得難飲就冇再飲落去。屙咗幾次去到一兩點左右，開始感覺冇乜便意，飲落去嘅液體多數變成尿液，由前門而唔係後門排出。有啲擔心嘅我就 WhatsApp 問診所 staff 咁有冇問題，佢話都正常嘅，只要夠鐘影到相俾佢睇就得。
去到四點鐘終於屙到第 11 定 12 次，影到張大致清澈透明嘅馬桶相交差。之後我繼續 keep 住灌水，因為去到半夜就唔飲得。由香港過嚟送我上路嘅朋友，喺 6 點幾嚟到酒店，準備陪我一齊入廠。
入廠 check in
夜晚 8 點，診所接送車又嚟到酒店。塞咗一大輪車後，總算趕及喺 9 點前去到醫院 check in。再次度高磅重量血壓血氧後，護士就帶我哋上頂樓病房。稍為安頓好後，朋友就返去自己酒店，而我就先沖返個涼。
沖完涼冇幾耐，大約 11 點左右，護士嚟咗喺我左手打豆，不過暫時未上鹽水。瞓到半夜 3 點，突然有護士摷醒我再強硬地浣咗次腸，再叫我用枝消毒沐浴露沖多次涼。去到 5 點左右再有護士入嚟叫醒我同開始吊鹽水。
之後我就瞓到平時鬧鐘較嘅 7:20 起身。過咗陣有兩位護士嚟到，等我去多次廁所後就送返我上病床，準備上法場。
入手術室
佢哋除咗我副眼鏡留喺病房，所以去到上返病房前嘅畫面，都十分之唔清唔楚。首先搭 lift 落到二樓，推過一大段路後再搭另一架𨋢上三樓嘅手術室。推入手術室前，佢哋再同我對多次姓名同出生日期。
入手術室後，我由病床爬過手術台繼續攤。今次除咗血壓計同血氧儀外，仲有喺心口貼咗三塊嘢，我估係用嚟 check 心跳、睇我會唔會心術不正用？準備期間我嘗試秦英夾雜咁同醫生護士傾計，順便放鬆下個人。之後麻醉醫生畀張 consent form 我簽，簽完之後有位護士就拎咗個氧氣罩嚟叫我深呼吸，我問係咪氧氣嚟，佢話深呼吸就得。於是我照做，頭兩下冇乜反應，跟住第三下就⋯⋯
術後一刻
一瞬間就 feel 到自己去咗另一間房，同埋下面痛痛地。噢，即係已經做完嘞。有護士嚟同我講手術順利完成，而家已經打緊止痛藥。不過隔咗一陣之後痛感越嚟越劇烈，加上冇眼鏡咩都睇唔到好令人不安，我開始扭計要求送返我上病房，同埋加止痛藥份量。一開始由 4mL/h 嗎啡加到 6、再之後加到 8mL/h。
因為乜都睇唔到，我其實都唔 sure 自己喺邊度甦醒。燈光唔同，總之肯定唔係手術室。應該係某間 recovery room，又係個要推一段走廊再搭𨋢先返到嚟病房嘅遙遠地方。嗎啡加到 8 之後感覺好返啲，再攤多陣之後就有嘢食送到。嚟探望嘅朋友亦都嚟咗。
麻醉藥效力應該仲未散曬，所以當時仲係冇乜氣力，懶得食嘢。把聲亦唔知點解好沙，所以亦唔太想同朋友傾計。到四點幾有力坐起身食嘢時，碗粥已經凍凍地。兩日冇食嘢自然乜都好食，不過頭幾啖可能因為身體未慣有嘢落肚，吞落去之後個人有少少作嘔。好彩忍住咗。之後慢慢食食曬餐飯，同埋喺電話同唔同人報平安。
食完飯之後繼續攤。唔知關唔關麻醉藥事，個人一合埋眼嗰陣，感覺好似進入咗另一個世界咁。合埋眼時「望」到嘅畫面好有現場感、真過平時發夢，會 feel 到自己可以活動、同人講嘢，直到自己發現件事 unrealistic (e.g. 可以落床），就會自動擘返大對眼返嚟現實世界。成個感覺好奇異，唔太識形容。呢個感覺大約去到第二朝先散走。
夜晚飯七點半左右就送到，一樣係粥+兩個配菜+生果+果汁嘅配置。食完飯就繼續攤，間中碌下電話繼續報平安同埋覆 messages。因為冇力自己拎起部 iPad 或電腦，所以都費事叫人攞過嚟。
吊鹽水同嗎啡部機間中會響。起初我唔知咩事，之後用部電話影個 mon 先知係因為滴曬，搵返護士嚟 refill 就得。另外護士每隔幾個鐘就會嚟度血壓血氧同體溫，清乾淨尿袋同埋度下血壺有幾多血咁。
新界西頭幾日都會用嚿護陰狀硬物同埋紗布包紮住，所以暫時連我自己都唔知佢咩樣，只能透過血壺得知傷口出血情況。成 pack 嘢包住嘅感覺唔太舒服，加埋以上種種，所以基本上我每瞓大約一兩個鐘就會擇醒。
去到半夜個人開始係咁放屁，但暫時未有糞便。醫生話大家通常都會去到拆包嗰日先會有嘢屙得出，令我好奇呢幾日食嘅嘢唔通真係就咁消化曬渣都冇剩？
第二日（D+1，5 月 2 日）
朝早 7 點醫生嚟咗睇我情況。佢講返尋日嘅手術一切順利，同埋 check 咗下我啲數據。出血減少咗，排尿亦唔太黃，係唔錯嘅 signal。醫生要我今日飲多啲食多啲，喺床上多啲轉下姿勢，同埋試下落床走動。至於聲沙係因為手術期間插咗氧氣喉，過幾日會自然好返。可能因為能夠自行進食，護士拆咗鹽水包之後冇換新，只係得返嗎啡。
相對手術啱啱完成嗰陣，個人感覺精神返好多，可以正常傾偈、睇 Netflix 同埋寫文（而家呢篇）。不過記性就麻麻，尋日啲第一手經歷開始變得模糊，要睇返自己同朋友分享咗啲咩先記得返清楚。
見完醫生後護士用熱毛巾幫我抹咗下全身，畀咗塊凍毛巾我抹面。仲有幫我換被換枕頭，換過件病人袍同埋墊喺床上塊吸血墊。佢哋換完我先見到原來件袍同塊墊上面成大 pat 血。好彩之後已經冇點再出血，血壺水位冇再上升，只有間中 feel 到幾滴血由陰部流過屁股。今朝再換袍、墊嘅時候，袍上面已經冇血，只有墊上面有少量血漬。btw 個血壺樽口係綠色睇落好似大排檔啲茄汁樽。
不過我最想要嘅始終係洗頭，攤完兩晚個頭十分之立。真係想知嗰啲自拍自己做完手術嘅日本 trans girls 係點影到自己個頭咁乾淨企理。
7 點幾食完早餐後，午餐好快就喺 11 點送到。食完飯之後隔咗陣，叫咗護士嚟睇住我行。同想像中唔同，行路唔需要人扶住，自己行都行到。不過因為有成嚿嘢包喺下面，個人感覺好重、行得好慢。喺房入面行咗個圈，就又攤返上床。
陰部間中有種異物感，應該係有尿從尿喉排出。同時間仲有種幻肢嘅感覺，覺得自己依然感受到部分切除咗嘅器官，例如會覺得已經切走咗嘅蛋蛋條管戚住戚住，又或者係有嘢掂到個頭。不過後者可能係真又未定，因為嗰度有部分皮膚係直接用咗嚟造粒椗。呢種感覺可能要等拆包時，睇到自己陰部實際變成點嗰陣，先至會逐漸散去都未定。
食完 lunch 後仲係好肚餓，所以叫朋友買咗啲零食上嚟，另外又好快咁清咗幾枝水。之後都係喺張床上面 hea 下咁。晚飯比想像中早好多，四點半就送到。食完後唔知點解又冇朝早晏晝咁肚餓，又冇咁想飲水。
成晚睡眠質素都麻麻地，由十點開始每一兩個鐘就會醒一次。雖然較定咗鬧鐘，但都係會焦慮袋嗎啡四點半吊曬嗰陣個人就會痛。當然最大原因我覺得真係因為個頭立到好唔舒服⋯⋯
而家（D+2，5 月 3日上午）
今日早餐都係準時 7 點送到，差唔多時間醫生都嚟咗。見我話傷口而家已經唔太痛，醫生就話而家袋嗎啡吊完後唔會再補，覺得痛可以問護士拎口服止痛藥。為咗適應得好啲，我叫護士將嗎啡由 8 降返去 4mL/h，so far 感覺冇乜大礙。講到尋晚瞓得唔好，醫生話可以叫護士安排安眠藥。但最好今晚唔使食都有覺好瞓啦。
仲有就係要開始 train bladder，感受下新生活嘅屙尿感覺（？）：用個夾仔夾起尿喉，儲起自己嘅便意，去到咁上下先至解返開。so far 大約每 30 分鐘一個 interval，感覺唔算太痛苦，唯獨係排完嗰一剎那，會有種個人被尿喉揪動嘅感覺，少少唔舒服啦。講到最唔舒服，到而家都仲係喺咳同笑嗰陣，會有種牽一髮動全身地痛到西冚咁嘅感覺。
之後抹身時，護士發現我屁股皮膚好痕，應該係因為坐得太耐。佢哋提我唔好 R，多啲換姿勢，同埋話拆包後就會好好多。另外今日抹身之後仲有搽咗啲爽身粉，感覺個人乾爽返啲。頭髮方面問準佢哋後，暫時用朋友買嚟嘅 dry shampoo 噴咗幾下，之後再視乎情況噴多啲。
如無意外嘅話，食完晏會練習多次行路，同埋試下用冬甩咕𠱸墊住個人坐起身。體溫一直喺低燒邊緣徘徊，我間中亦明確 feel 到個人好熱、想出曬汗咁。醫生護士都係提我飲多啲水咁。
呢兩日應該都係重覆返呢啲過程，直到後日開箱睇自己陰部變成咩樣——可以肯定嘅係會好核突，因為手術後初期係會成塊腫起曬，要去到幾個月到半年後先正式知道會變成點 lol 另外就係要學點 dilation（擴陰），暫時最大 concern 係假如一日要通三次每次要一個鐘嘅話，咁返到日本返工嗰陣咪好鬼麻煩⋯⋯
攰，瞓陣先。
繼續 R 助養：
https://ko-fi.com/bethatalks
