淺談 Esperanto I
Mallonga artikolo pri Esperanto.
上次學外語篇文提到，我想用粵語寫多啲世界語 (Esperanto) 嘅嘢。呢幾日諗唔到 FYP 點寫，就寫少少世界語介紹嚟轉換下心情先。
世界語係喺十九世紀後期，由一位叫 L. L. Zamenhof 嘅波蘭眼科醫生發明嘅。佢想發明一隻方便全世界嘅人學嘅第二語言，嚟促進世界和平同各地人民之間嘅了解。而世上第一本用世界語嘅書，就係佢自己以筆名 Dr. Esperanto 寫嘅《Unua libro》，直譯叫做《第一本書》。
冇錯，Esperanto 喺最初並唔係呢隻語言嘅名稱，而只係發明者 Zamenhof 嘅筆名——當時佢稱呼呢隻語言做 lingvo internacia，「國際語言」也。但短短幾年間，呢隻人工語言嘅使用者社群，已經習慣咗直接稱呼呢隻語言做 Esperanto，而呢個名最後亦獲認可為官方名稱。
至於中文現行譯名「世界語」，據說係喺二十世紀初從日本借返嚟嘅和製漢語。當時 Esperanto 亦有另一個譯名「萬國新語」，兩者可能都係取咗 Zamenhof 想全世界嘅人都能方便學習、運用世界語嘅本意啩。喺嗰個知識分子會主張廢漢字、全盤西化等思想嘅年代，有人見到世界語呢隻思維咁嶄新嘅概念股，會以如此譯名吹奏亦非不能理解。
不過呢個譯名為 Esperanto 喺華文圈裡面塞咗頂高帽。以前 search 用中文寫嘅世界語嘅資料嗰陣，間唔中就會睇到世界語唔夠世界、好歐洲中心之類嘅批評。儘管世界語語法同選詞上真係好以歐洲為中心，但世界語喺強調方便人們學習嘅同時，又真係冇話過自己好「世界」。
其實 Esperanto 呢個名係來自世界語動詞 esperi，解作「希望」。詞根 esper- 係借自法文 espérer (同義)，加上世界語代表現動作進行者嘅詞根 -ant-，再將詞尾變成名詞嘅 -o，就得出 Esperanto 「希望的人」嘅本義。而 Esperanto 喺日文嘅名稱亦變咗用片假名直接稱呼，而冇再用到「世界語」呢隻字。
（以上部分內容係消化過英文維基相關條目再寫嘅，因為中文維基嗰啲同世界語有關嘅條目呢，係包保你睇完都唔會想學呢隻語言嘅。）
因為寫下寫下發覺有啲長嘅關係，今次講住世界語嘅基本語法同發音先。
世界語詞根
上次都提到，世界語嘅生字最初係由 Zamenhof 喺各種語言度揀啲嚟借，再修改下串法同加上詞根組成。詞根主要來源係羅曼語系（法文、意大利文等）同日耳曼語系（德文、英文等）嘅語言，亦有從拉丁文、希臘文同斯拉夫語系嘅語言借入少量字詞。而一啲比較現代嘅生字，例如一啲科技用語，就係由後人為原有生字配上詞根組成，或者由英文借入。
