自學法文雜談
上次寫咗篇文講自己學外文嘅感想之後，有莊友想我寫多少少，講下點樣自學法文。由於我自己法文唔係真係好好，亦唔係學到好深入，所以呢篇文只算係呢大半年嘅學習感想，實際參考價值應該唔大。
法文嘅發音同拼寫法其實都幾有規則——至少有規則過英文。
先講發音同拼寫法。曾幾何時我都俾一啲關於法文發音嘅 myths 嚇怕咗，例如「你永遠估唔到法文啲字尾幾時會靜音」、「個 r 音同啲鼻音好難發」。但係學咗無幾耐我就發現，法文嘅發音同拼寫法其實都幾有規則——至少有規則過英文。
法文嘅 vowels 並冇話特別難發音，而 consonants 亦都只得幾個係英文裡面唔存在嘅。/ɲ/(compagne)、/ɥ/(suis) 呢兩個音並唔難發，麻煩啲嘅 /ʁ/ 亦都好難發錯做另一個音。只要擺啱脷同做啱嘴型，應該就唔會震錯位。但因為 r 音喺法文嘅詞𢑥入面都好常見，所以最好都係讀啱先。好消息係，r 音喺唔同法蘭西人之間，個發音係有啲差異㗎。
「法文好多字嘅字尾會mute咗」呢一點固然係事實，但法文邊啲 consonants 係會 mute 到，就唔係完全無跡可尋。有個小貼士叫做「Careful Rule」，好多教材都會講，意思係 careful 裡面 c、r、f、l 呢四個 consonants，假如出現喺字尾，佢哋就通常都會發音。其他例外字母仲有 b、k 同 q，不過以呢幾個字母結尾嘅字，常用字我暫時只諗到 cinq。而其他 consonants 基本上可以當佢哋靜音。此外，動詞變化入面 3rd person plural (即係英文 they) 各種變化嘅 -ent 尾都係靜音。
當然，上面嘅歸納法總會有例外，但講到例外同例外嘅例外，英文一定更多。英文好多我哋自細就學嘅字，都有啲唔發音但寫咗喺度嘅字母，例如 autumn、climb、comb、debt、know、psychology、receipt，仲有更多更多。（讀幼稚園嗰陣，我試過以為 know 係讀 cow ⋯⋯）而且英文嘅 vowels，同一個讀音可以有多種唔同拼寫法，法文喺呢點反而好有規律。
法文發音最難嘅地方，我覺得在於 liaison，即係佢哋點將幾隻字 lur 成一抽。但呢樣我諗就算跟老師學，都應該要浸返咁上下先地道。我諗初學者如我，知道幾時一定要 liaison，同埋幾時唔准 liaison（例如 et 字前後）應該都夠。而上述兩者以外嘅位置，liaison 嘅程度係會視乎 register 變化，越正式傾向越 lur 埋一抽。
