術後雜記
應該係 Medium 首個香港人做完性別適合手術嘅 diary！（寫得太慢，已經唔 live）
第二次出院 (10/5) 之後，身體開始平穩地康復。由術後初期每日覺得自己唔同咗好多，變成每朝瞓醒覺得自己精神咗少少、行得走得多兩步路嘅感覺。因此今次就唔以日為單位敍事喇，而係記得啲咩 remarkable 嘅就寫下咁。
學去廁所
平安度過出院後嘅週末後，星期一 5 月 13 日終於返咗去診所拆尿喉。拆尿喉呢半分鐘，話係我人生又一個最痛苦嘅 30 秒都不為過，彷彿成條新尿道被夾硬擘開咁。
為咗確保我識自己去廁所，護士要我飲兩大枝水，留喺診所直到排到兩次小便。最恐怖嘅係假如唔識屙，佢哋會塞返條尿喉入去。兩枝 600mL 水我好快清曬，半小時後尿意開始湧現，於是我就申請去第一次廁所。然而唔知係緊張，定係其實未有咁多尿落到去，第一次只係排到幾滴落個量兜度。
出返嚟護士叫我唔使咁緊張，可以再等多陣，同埋喺硬堀堀嘅廁板上坐太耐會令下陰唔舒服，屙唔出就出返嚟坐梳化。不過一唔小心就又會爆血，加埋屙唔出就要再插喉，兩大危機喺面前，試問我又點唔緊張。
出返嚟又再坐多四五個字，今次 feel 到真係嚟料，結果順利排到 500mL，亦都 confirm 咗自己冇用錯肌肉。麻煩嘅係由於下面仍然腫脹緊，小便基本上係唔會直接出嚟，而係會好似個花灑咁周圍噴，甚至向後噴⋯⋯醫生話順其自然等佢過兩三個月好返就得。
走走댁댁 (dek6)
拆尿喉後，行路唔再會俾條喉戚住戚住，亦唔使隨身帶住尿袋，活動起上嚟方便好多。儘管如此，行得耐企得耐，下面依然係會見痛。當然隨住身體康復，同埋每日習慣活動多啲，活動範圍同時間係 keep 住有改善嘅。
仲記得頭幾日第一次出街，由酒店龜速行去附近超級市場，行到一半都頂唔順要折返。過多兩日就成功行到入去買少少嘢，隔多兩日 weekend 甚至搭到車去百貨公司 shopping 一陣。只係每行、企大約十零分鐘，個人就會開始痛，唔搵位坐唔得。同埋夜晚返到去，同埋到第二朝都會 feel 到下面腫得特別勁。
而有件好 counterintuitive 嘅事，係齋企仲攰過行，真心想知我下面到底係點運作。返到嚟日本，由屋企行去車站、車站行去區役所、車站行去診所打針，行 7–8 分鐘都冇話太痛，但係喺電車企三四分鐘個人已經會頂唔順。尋日喺橫濱打完針返嚟嗰陣就係咁，上咗架特急企幾分鐘已經痛到想死，唯有一到下個站就轉去搭各站停車，坐住慢慢碌返嚟東京。
暫時都唔敢跑跑跳跳。快步都唔敢，有感假如嚟緊返工追唔到車遲到，要同公司討價還價。最壞打算係直接傷病手當😤 至於做運動，醫生都係話等兩三個月啦。（基本上咩都係兩三個月，因為都係等傷口埋口康復）
坐低！
做完大手術，行行企企好攰大家都明。但坐都好攰好費力，聽落係咪好奇怪？坐低嗰陣係舒服定係受罪，好視乎屁股坐嘅位置，同埋張凳有冇得挨後，都係同下陰要受幾大壓力有關。
有得半躺/挨喺度會舒服啲，齋坐嘅話就要諗辦法將度力向後卸。即使最近已經由上星期仍然要用手撳凳、廁板借力，變成返到嚟日本可以就咁坐低，但坐直個人依然係冇可能。一坐就會壓住成個下面勁痛，就算有冬甩咕𠱸都係咁話。何況冬甩咕𠱸本身件事都好玄，同一個坐法有時會舒服，有時都係會覺得全身壓曬落去咁。
返到日本
唔知點解，喺曼谷返東京嘅飛機上落嚟、坐上輪椅嗰一剎，我諗嘅唔係「終於返嚟喇」（鬆一口氣），而係「帰っちゃった、返＿咗嚟喇」（嘆氣）。
我唔討厭日本，甚至乎我夠膽開始 transition 都係多得日本嘅環境，但唔知點解一返到嚟羽田，我就覺得自己返咗殘酷嘅現實世界咁。呢種情緒可能同去完日本返到嚟赤鱲角嘅香港人一樣，亦都可能係長期荷爾蒙不足喺度作崇。
除咗等行李有啲耐之外，入國個過程其實幾快幾順利。不過比起喺曼谷，返到嚟羽田感覺多咗份拘謹，我唔係幾好意思同幫我推輪椅、行李嘅 staff 姐姐們傾偈。出咗入境大堂後，輪椅最遠只能去到車站閘口，所以我去到閘機前面就要自己企返起身。好彩行李車係可以推到落月台嘅。
最後想講嘅係：「行到幾步路，但係中長距離移動需要輪椅」呢個處境真係好尷尬。雖然我有航空公司貼嘅 sticker 表明我需要協助，但坐走廊位嘅我喺着陸後，同坐喺入面嘅乘客解釋「我要等輪椅所以企唔到起身住」嗰陣，都係勁想搵個窿鑽入去。
因手術暫時失去部分移動能力嘅我尚且如此，終身處於呢個狀態嘅人，平日肯定會受唔少被人懷疑係咪扮傷殘嘅目光。真係辛苦晒。
搭車
頭先都講咗少少呢副身體搭電車有幾攰。除咗身體上嘅限制外，仲有精神上嘅消耗。喺日本嘅人一搭車就變咗戰鬥格咁，就連平日做樣嘅禮儀都幾乎放埋一二邊。硬推、攝位、橫衝直撞，一應俱全。
好不幸（？）班機早咗少少返到羽田、喺專人輔助下入國過程又比想像中快，我落到羽田個火車站嗰陣先係 07:45 左右。本身我諗住要個零鐘先夠㗎⋯⋯因為咁，京急同山手線兩程都變咗喺 peak hour 搭車。
京急嘅「急行」真係好鬼慢，由羽田出返嚟差唔多停成十個站，仲要打爆晒成架車。兩大個喼放咗喺度啲人都要夾硬推，唯有用返平時搭車對抗啲掗埞阿叔嘅招數，頂返過去還以顏色。去到品川，我拎住兩個喼準備落車，啲人都係要喺左右兩旁攝住過，有冇咁撚趕啊心諗。京急沿線啲人俾人話大壓力多人身事故真係唔係冇理由㗎。
喺品川月台，平時京急轉去山手線條轉乘通道得電梯同樓梯，搭𨋢要行另一條路。個月台仲要得 1001 部𨋢，成件事勁 inaccessible。由京急落返 JR 線大堂又有幾級樓梯要搭𨋢（不過日本好多地方都係咁，有事冇幹整兩三級樓梯你歎），勞吾筋骨空乏吾身。
品川返池袋，冇辦法下唯有山手線站站碌。品川碌返去大崎、目黑呢段路，比想像中多好多人。冇 help mark 冇優先席坐之下，我唯有坐住個喼坐到新宿先有位坐。中間去到原宿，架車突然話安全確認停咗成個字，我痛到即場啪咗粒止痛藥。返到池袋轉東上線就還好，因為同出城返工嘅社畜（平日嘅自己）係相反方向。
化妝護膚
喺曼谷呢幾星期，經歷過喺醫院冇得洗頭、痛住企喺度沖涼、坐唔到喺度化妝，各種物理上嘅限制好成功咁令我放棄喺日本嘅美役標準。唔係唔想，係痛呀，同埋冇工具。想刮腋毛但冇剃刀，想修下眉但枝電動眉刀帶漏配件，唯有擺爛。
少數堅持有做嘅係搽髮油吹頭同埋出遠門嗰陣畫一畫眉。冇辦法，啲頭髮炸開、分叉得勁到冇辦法坐視不理，而條眉完全唔畫就會兩截得太離譜。我都想知點解自己左邊眉去到眉峰就會突然斷開。
不過一返到日本屋企沖涼，我就剃咗加拿大毛同埋輕輕除咗手腳毛 sosad 因為長時間坐低仲係好辛苦，呢兩日我暫時仲未化過全妝。星期五去區役所淨係搽咗冇色防曬，去橫濱拮針都剩係上埋 base 冇搽粉底。之後返工應該都唔會化全妝了，留返啲時間通模好過。
食嘢
每次見醫生佢都會提我記住食多啲飲多啲，補充營養，冇話要戒口。所以出院後過多兩三日，我就開始飲返咖啡。之前話可能導致腹瀉嘅生果都照食返——返到日本就冇得放題咁食㗎喇。
酒店嘅免費 breakfast set 算豐盛，尤其係啲西瓜菠蘿火龍果好似唔使錢咁。Lunch 嘅話我喺頭幾日身體冇咁靈活嗰陣， 就喺房食杯麵算數。到好返啲可以落酒店餐廳食早餐食 lunch 嗰陣，就幾乎都係落去食。啲粉麵飯足料惹味夠鑊氣，真心唔捨得走。
晚飯就通常都係嗌 grab 啲粉麵。附近有間粵式粉麵舖，啲雲吞麵牛腩麵同皮蛋瘦肉粥都唔錯，係枝奶茶濃咗少少。又有間牛雜河啲牛雜幾好食，另外仲有間泰式嘅「釀豆腐麵」（一隻粉紅色湯底，同中文釀豆腐無關。就好似泰文「白糖糕」係油炸鬼一樣），酸味味都唔錯。最得意係酒店附近有間周月（中環鰂魚涌有分店嗰間），不過嗌嗰晚胃口麻麻冇食太多，只係記得隻味 OK 似嘅。
返到嚟日本呢，就真係好掛住曼谷啲嘢食。正如頭先所講，嗌外賣泰菜有泰味、粵菜有粵味，嗰日喺大商場食大戶屋個味都仲係好日本；相對返嚟日本你唔特登搵就只會搵到口味在地化咗嘅中華、東南亞料理⋯⋯欲哭無淚。
不過講真，因為唔太出得街，我喺曼谷都好多嘢仲未試。啲街邊串燒、甜品就不在話下，啲咖喱同冬蔭 X 我都覺得自己未食夠⋯⋯反而海南雞飯、雲吞麵、牛腩麵呢啲就算一解咗鄉愁。
NSFW
其實都冇咩 N 唔 NSFW 可言，呢個本來就係性器官嘅手術嚟。
一切性事醫生都話要兩個月後、傷口好返先准考慮。無論係自己嚟定人哋嚟、前定後都好，都一律要傷口好返先得。醫生仲有話頭幾次記得叫 partner 溫柔啲放輕啲。
講返啲日常啲嘅嘢先：即使而家隔咗大半個月，我小便嗰陣都仲係會下意識地伸手「逗住」，跟住先醒起已經冇嘢好逗。清理嗰陣都麻煩好多，唔可以好似以前咁捽，要輕拍，但即使係咁我都仲係感到鼠蹊位有少少爆擦。仲有就係而家去廁所仲係會亂咁 fe4 嚟 fe4 去，每次都要特登抹埋大髀後內側。
出恭反而冇乜大問題：可能因為我飲食上比較節制，暫時都幾易抹乾淨。不過都仲係唔太放心，喺曼谷酒店就算見到冇漬，都會用濕紙巾抹多下確認。而家返到嚟日本，都喺 Amazon 買咗啲沖得落廁所嘅濕紙巾。
雖然醫生開咗綠燈俾我用洗屁股馬桶，但暫時都係唔敢冒險。好似醫院咁喺馬桶旁邊另外一個獨立花灑頭嘅設計，喺衛生上先適合。
傷口護理
隨住開始可以 dilation（通模），每日早晚除咗洗傷口之外又多咗樣嘢做。除咗頭幾日護士吩咐要喺日頭通第二次模外（就返診所營業時間，方便出事時求救），而家每日兩次通模，都係起身同沖涼之後做。
醫生俾嘅 schedule 係早晚兩次，每次半個鐘，自己接受到嘅話可以酌量加時。通模好簡單，其實就係擺碌特別設計（應該有）嘅棒狀物入陰道，每日兩次嚟防止佢埋口。確保衛生同安全，枝 dilator 要笠安全套同埋搽 KY，同埋要 keep 住畀少少力落去 stretch 裡面嘅皮膚，以嘗試 achieve 返理論上嘅最大深度。
通模期間要確保枝棒直入，唔可以喺入面左右撩、扭嚟扭去，但我發現去到接近盡頭嘅時候，枝 dilator 就會自己向左扭轉咗少少。覆診嘅時候同醫生反映，佢用手指 test 完亦都話我份人裡面有少少左傾。深度上呢兩星期我最盡都係去到四吋左右，醫生就話最盡可以試下五吋。「三吋係必需保持嘅下限，四吋勉強可以同亞洲人，你 partner 係洋人就要畀啲心機」by 醫生。
Dilator 亦唔係得一枝。除咗而家用緊嘅 23mm 不鏽鋼棒外，仲有枝 26mm 同 32mm 嘅玻璃棒。不鏽鋼棒有少少彎曲、冇刻度，玻璃棒就直不甩、有 mark 到幾吋深嘅。護士話返嚟一星期後可以轉上去 26mm，辛苦嘅話可以先用 23mm 開路再上，不過我仲未試。
So far 其實由叩門到放到入最盡（四吋）其實都幾嘥時間，可能係我個人太健康、個傷口每日都埋口得好快咁啦 >< 半個鐘嘅 session 其實 end up 都要用差唔多 45 分鐘先完成，加埋之後用生理鹽水同 betadine 沖洗傷口內外，大約要一個鐘鬆啲。
由於通模時間都幾長下，而且有一隻手要用嚟撳住碌棍，呢半個鐘可以做嘅基本上就係睇片。喺曼谷嗰陣就係翻睇達哥玩人中之龍 or Outlast，呢幾日就開始倍速翻煲進擊的巨人。而家仲睇緊第一季，但點解啲內容好似同我十幾年前第一次睇嗰陣咁唔同嘅⋯⋯
我有啲明點解 Reddit 又好 Twitter 又好咁多人通模通到屌晒鬼。未必係因為痛——例如對我嚟講係異物感多過真係不適——而係因為每日早晚都要做，期間又冇得 multi-task 做其他活動，成件事喺度掗住自己嘅 schedule。我醫生要我每日兩次 30 分鐘已經算短，有啲醫生甚至會要求每日三次，或者每次一個鐘咁，呢啲我覺得真係辛苦。
諗到咩再寫啦！btw 繼續渴求咖啡：https://ko-fi.com/bethatalks
