非專業陪玩：《逆統戰》
「隻 game 玩得完，國家好安全」
Sep 14, 2021
上次講《選舉工程》，講到我後來試玩咗，相傳連大外宣都奈佢唔何、只能盡力冷處理嘅反共桌遊鉅作《逆統戰》，結果大失所望。
《逆統戰》呢隻來自台灣、打正旗號以推翻中共為目標嘅桌上遊戲，喺開發、眾籌過程中，一直獲各地獨派組織、「流亡政府」鼎力支持。開發團隊釋出嘅背景、角色設定，以及大量日系畫風嘅角色插圖，一路引嚟唔少期待，甚至曾經招來中共輿論機器猛烈抨擊、然後彷彿怕咗隻 game 咁拒絕評論，使到「中共真係驚咗《逆統戰》」嘅傳言不脛而走。乃至今年開發者出貨時，為香港玩家作特別物流處理 [A]，以令《逆統戰》可以「偷運」入香港，彷彿隻 game 真係足以動搖中共根基⋯⋯
可惜⋯⋯
試玩之後，只能感歎：諗咁多人物、世界觀設定、豪言發展電腦版等咁多「兼覓 (gimmick)」，不如腳踏實地做好遊戲機制同美術設計先啦。國家根基係動搖咗呀——隻 game 大幅動搖咗，我對課金支援呢隻 game 嗰啲政治團體、臨時政府、流亡政府嘅信心。
（以下內容為真心評價，少哈薯，請見諒）
美術設計：慘烈過中華民國美學
得罪講句，同網上宣傳時美輪美奐嘅角色插畫相比，遊戲中實際用到嘅大小配件，包括地圖、卡牌、提示卡、token 等，佢哋嘅設計都可以話係慘不忍睹，直頭係災難級，完全冇考慮過玩家感受。
先講地圖：
- 反光。
- 鐵路用返同道路唔同色嘅實線就得。而家逐條枕木畫出嚟，過分複雜兼睇到人眼花。道路、鐵路本身亦太多不必要嘅彎曲。
- 地圖上標示城市嘅圓圈資訊嚴重過載，然而當中大部分資訊，都可以由各個勢力嘅小地圖上，更加清晰、直接咁睇到。例如陣營標誌，細到咁我真係唔知你印嚟做乜。下左右嗰兩三點，意義亦極不直觀——我唔講你知唔知係代表咩陣營可以喺嗰格度起兵？呢啲資訊其實全部可以喺大地圖度刪去，騰出空間放城市名。而家啲城市名寫到豆潤咁細，仲要用楷體嚟寫，點睇。
- 地圖加入地貌係畫蛇添足。美術上，地貌令本身就密質質嘅地圖，變得更密密麻麻更難睇。遊戲上，大小地貌包括長城、長江等對遊戲實際運作都冇影響，加嚟無謂。[B] 實用上，開發團隊聲稱地圖上嘅地貌有助學習地理，之但係咁，玩得呢隻 game 嘅人，有幾多個會對東亞地理一無所知呀⋯⋯
- 幅地圖用嘅顏色太多，但又冇好好劃分到咩顏色代…
