呢套電影未上映其實都幾期待，因為Joaquin Phoenix做Joker呢個角色。比較愕然嘅係Joker會喺今年威尼斯攞咗金獅獎，估唔到超級英雄電影會響國際影展攞到最高榮譽大獎。(但其實套戲本身唔係定位做超級英雄電影，而係文藝片)
Joaquin Phoenix嘅角色Arthur未變成Joker之前係做小丑，想為Gotham城市市民帶來歡樂。奈何因為一次表演失誤加上俾同事陷害，被公司解僱。接著發生的一連串事件，加上被Robert De Niro於電視節目羞辱，令Joaquin Phoenix開始精神崩潰。成套戲氣氛壓抑，瀰漫著一股不安同焦躁的氣息。早段電影Joaquin Phoenix被解僱後，於火車裡突然病發大笑被三名男乘客毆打。男主角反抗殺害三名乘客嗰場戲充滿爆發力。
Joaquin Phoenix之前攞過威尼斯影帝同康城影帝，今次喺Joker亦無令人失望。因為自己係精神病康復者而俾公司老闆與其他人歧視，佢每一次病發時的大笑令人睇到好心酸。中段擅自拆開母親要寄俾Thomas Wayne嘅信發現自己與Wayne一家人嘅關係。但到咗後段Arthur真正知道所謂何事後，Joaquin Phoenix一舉一動同演出相當震撼。Joaquin Phoenix喺呢套戲付出唔少心思，不能自控嘅大笑，後段化完裝響樓梯跳舞等等場面好帶動到觀眾情緒。最後佢同Robert De Niro嘅對手戲好有火花，上流社會人仕與社會邊緣人價值觀的對壘令人反思。
劇情方面導演聲稱借鑒Martin Scorsese嘅Taxi Driver同King of comedy，而導演亦刻意將Robert De Niro響套戲做Talk Show主持人，定位故事同King of Comedy差唔多。電影比較有爭議性係將Thomas Wayne定位做一個懶理民間疾苦的反面角色，佢嘅妄言間接令民怨大爆發。另外一個有爭議嘅係結局，Joker俾Gotham市民追捧，劇情實在有啲政治不正確，同時亦到Bruce Wayne嘅立場好尷尬，佢大個做Batman點說服到Gotham市民佢係真心幫個城市？
總括而言，Joker係一套劇情同演出相當突出嘅電影，由頭緊張到落尾。
