點樣提高揸Uber收入？
首先, 好人好姐做乜走去做Uber司機先?
"梗係為錢啦, 唔通為興趣咩, X!"
其實做Uber司機一般其實收入唔算高。以最大路的Uber X為例, 現時(2020年7月)的收入大概是80-120一粒鐘，仲要扣油錢。Uber Black比較高, 聽過有人揸5至6個鐘, 收入過千。
就好似＂性格決定命運＂，揸Uber收入最主要嘅決定條件就係你部車:
1: 純電: 每公里成本0.2(T仔 Model S免費任叉, 前提係要搵到Supercharger),
2: 混能: 每公里成本0.4–0.6, 唔使等叉電最爽
3: 電油: 通常$1-$1.5, 貴過$1.5等於幫油公司打工, 做善長仁翁 (除非做Black)
咁係咪一定要揸純電或者hybrid先可以有好D嘅收入呢? 當然唔係, 只係揸呢類車有先天嘅優勢, 如果打算全職做, 不如平平地供一部。
我都聽過有例子，兩個司機夾份供部二手Model S, 二十零萬, 月供三千, 相等於每人每日皮費50大元, 一個日更一個夜更, 咁都係提高收入嘅方法。
之但係, 好多有意揸下Uber嘅司機都係本身有部電油車, 想做下兼職幫補下啫（在下都係）。咁可以參考以下幾點：
- 擇肥而接: 大部份行程都係上午由住宅區出市區, 晚上倒轉, 司機可以盡量去呢D地區, 甚至可以喺有加乘(地區轉為橙色/紅色)時, 只選擇接呢D單
2. 善用"回家": 新手司機上總部登記之後, 每日有兩次"愛回家", 即可以指定去嘅地點, 由電腦配對派單。司機識得用呢個功能又派到單，收入自然提升。呢個功能非常關鍵, 要另開一篇專文講使用技巧。
3. 盡快止蝕: 經驗所得, 日間時間去左港島, 返九龍嘅單係比較少, 甚至有時做幾個鐘都係短單。如果時間容許，可以做一張短單當俾隧道費，或者乾脆用一個愛回家配額過番九龍。
暫時係咁多先，跟住我會再仔細分析同埋分享多Ｄ揸烏爸嘅經驗:)
