[~Walang Hangganan.]

*Piksyon. Ang modelo ng 
Mundong umaalpas sa 
Tanaw ng aking paningin 
Distansyang abot ng mga paa 
Alaalang maririnig muli mula 
Sa tikom na pagkatiklop — 
Nawawalang oras 
Lulan ng nagpapalitang mga paksang 
Nakapaloob sa espasyong 
Pinamamagitan ng mga linya.

*Limitasyon. Dahil hindi magpapaangbot 
Ang simula sa huli, 
Ang harap sa likod 
Ay hindi magtatagpo 
Sa kanilang tipanan, 
At ang mga ulap ay kailanma’y 
‘Di sasalubong sa iyong mga yapak.

*Kasinungalingan. Sa pagwakas ng kakayahang maaninag ang nalalapit na lupalop, dugong lumulusong sa katawan nang mapaandar ang parito’t paroon ng aking inilululang alaala,

~Ang panahong tikom na natiklop ay magbabalikwas, at hindi magpapaangbot sa mga tiyak na espasyong nakapaloob sa mga nagpapalitang linya

*Sapagkat ito’y may hangganan.