Manzil hai teri…

Ummedon se bhari aankhein, khwahishon se bhara dil aur sapnon se bhari uski duniya, bas chal diya woh,
Pata tha usko uski zindagi ki kashti, mussibaton ke iss samandar ke paar lagegi toh sirf koshishon ke sahare.
Kahin upar kahin neeche, Kahin jyada kahin kam, kahin khushi kahin gam, ye kisse hamesha rahenge tere saath,
hasna hai rona hai, kahan chalna hai kahan theherna hai, ye sab hai tere haath.
Kabhi der bhi hogi, kabhi jaldi bhi, kabhi kuch haath lagega kabhi nahi bhi,
tere jazbaaton ka kaarwan hai jo rahega tere saath, himmatein bhi tutne dena kabhi fir se judne ke liye, magar sapnein nahi.
Dikhenge tujhe kinaare bhi aankhon ke tere saamne, kaunsa kinara chaiye tujhe kaunsa nahi, kaunsa thikana chaiye tujhe kaunsa nahi,
kabhi tu samjhega galat kabhi samjhega sahi, magar wohi toh seekhna hai iss samandar me, ek kinara nahi toh dusra sahi, dusra thikana nahi toh teesra sahi.
Kya hai tere haath me? kya hai jo hai hamesha hai tere saath mein ?
teri takdeer hai tere haath mein, tu hi hai hamesha tere saath mein.
Khud se hai teri ladai ? Ladke hasna seekh le ya haar manna seekh le,
itna kahunga bas tujhse, haar me woh maja nahi, paseena baha ke jeetna seekh le.
Kuch raaetin aayengi aisi, kuch aise din aayenge, tu puchega apne aap se, kyun ? aakhir kyun hai tu yahan,
jawab bhi milega tujhe khud se hi, jhaank ke dekh andar apne, khud ko aur duniya ko behtar banane ke liye hai tu yahan.
Ummedon se bhari teri aankhein kabhi dubne mat dena, khawahishein dil me hamesha hi rakhna,
sapnein badlenge hakikat me tere, koshishon ka sahara kabhi khone met dena.
Pahunchega tu teri manzil ke paas, pahunchega tu teri manzil ke paas, bharosa rakh, Tu pahunchega teri manzil ke paas.
