我講廣東話

噚日講到我決定用廣東話寫，今日就講下語言。

問個問題先，香港人講廣東話，咁西班牙人講咩話呢？

你可能會好快咁答我，西班牙文囉。

Well…都啱嘅，不過啱唔晒。事實上，西班牙有四種官方語言，包括Castellano/Castilian、Català/Catalán/Catalan、Euskara/Vasco/Basque同埋Galego/Gallego/Galician，另外重有一堆地區方言。一般大家所指嘅西班牙文其實係Castellano，即係中部Castilla地區嘅語言，Català係Catalunya/Cataluña地區嘅語言，即係之前新聞話搞獨立公投嗰個加泰隆尼亞地區，呢個地區嘅首府係Barcelona (巴塞隆那)。而Euskara就係巴斯克語，係Euskadi/País Vasco(巴斯克地區)同埋半個Navarra/Nafarroa地區嘅官方語言，而最後一種就係Galego，係Galicia/Galiza (中文好似叫加利西亞)嘅官方語言，我而家身處嘅A Coruña就係位於呢個地區。如果我哋夾硬用中國嚟做例子，就好比喺廣東省廣東話同煲冬瓜同樣係官方語言，而福建話喺福建就同煲冬瓜並列。可惜嘅係，某個政權唔知因為咩原因，係咁打壓煲冬瓜以外嘅語言，同西班牙早幾十年嗰個獨裁者佛朗哥 (Francisco Franco)一模一樣。諷刺嘅係，佛朗高其實係個Galego (來自Galicia嘅人)...

香港分地方就用區嚟分，西班牙都係咁，先分做十幾個自治地區，之後再分省，然後再分市鎮。Galicia地區分做四個省，分別係A Coruña、Ourense、Lugo同埋Pontevedra，而A Coruña省嘅首府就係A Coruña市，有趣嘅係，Galicia地區嘅首府Santiago de Compostela同樣都係位於A Coruña省。

講返語言先，咁一般嚟講呢，喺Catalunya、Euskadi同埋Galicia以外，其他地區嘅人母語都係Castellano，至於喺呢三個地區呢，一般都會培養學生流利使用兩種語言嘅能力。喺學校入面兩種語言同埋英文都係必修科，而一般科目呢，就各處鄉村各處例。據我一位來自Bilbao (畢爾包)嘅朋友所講，由於Euskara同Castellano真係太唔同，而Euskara又真係太難學，喺Euskadi可以揀用Euskara或者Castellano嚟讀。而Catalunya就唔使講，佢哋非常非常重視Català，即使係Barcelona呢個國際大都會，喺街上面聽到Castellano同Català嘅比例都仍然係50:50，甚至好多告示都係先Català後Castellano。至於Galicia呢，我見我哋功輔班啲學生啲教科書全部都係Galego。

不過同香港有人輕粵重普一樣，喺Galicia都有唔少人輕Galego重Castellano，特別係喺城市。Galicia一直都係個以農業同漁業為主嘅地區，所以有啲人由農村搬出城市之後，就覺得Galego係鄉下佬嘅語言，城市人應該同世界接軌講Castellano。加上早幾十年個獨裁者佛朗哥主張一國一語，力推Castellano，大力打壓地區語言，而Galicia嘅人民又無好似Catalunya同埋Euskadi嗰邊咁反抗中央，無乜點努力去堅持用Galego。無錯，佛朗哥歸西之後，西班牙好神奇地得到真民主，成為君主立憲國家，Català、Euskara同Galego都得到法定嘅名分，但係我總係感覺Galego始終都無Català同Euskara喺各自嘅社區咁普及。Santiago或者一啲比較鄉郊嘅地方係真係好重視Galego，我亦都有來自小鄉鎮嘅朋友屋企真係只係講Galego，但係Galego喺A Coruña唔普及又真係個不爭嘅事實，我喺呢邊識嘅本地人喺屋企都係講Castellano多過Galego，我有個曾經喺Barcelona生活過嘅朋友，連佢都話喺A Coruña街頭真係幾乎完全聽唔到Galego，啲學生一行出學校傾計全部都係用Castellano。無錯，如果你入Riazor睇拉科嘅比賽，所有宣佈都係用Galego，但係坐喺你身邊嗰啲球迷全部都係用Castellano去咒罵場上嗰班唔生性嘅球員。

講真我唔擔心Galego會死，但係如果A Coruña唔講Galego，就真係會衰失自己嘅特色，變成另一個普通嘅西班牙城市。

講完一大輪，其實我都係想拉返嚟講香港。

1997之後，我哋見證住香港一味向中國大陸獻媚，煲冬瓜變成必修，啲家長爭住谷啲小朋友學好煲冬瓜，咁呢樣嘢講真無可厚非，畢竟語言嘅嘢學多一兩種無壞，但你唔應該喺過程中犠牲你嘅母語，唔應該因為佢無咁多人用就貶低佢或者睇低佢，話佢係無用嘅語言，話佢浪費時間，話佢好失禮。你應該以佢為榮，因為係佢將你變得同世界其他地方嘅人唔同。

曾經有人同我講過，每種語言都賦予人唔同嘅角度去睇呢個世界，無一種語言比另一種語言優越。我以前曾經覺得英文比廣東話緊要，之後又覺得學識煲冬瓜先係王道，但倒頭來，真真正正讓我完全表達到自己心中所想嘅，就只有我嘅母語廣東話。

我係香港人，我講廣東話。