第一篇

再唔開始寫下嘢，可能我真係寫唔返。

嚟到拉科已經差唔多一年半，重有大約四個月我就會返香港。下次幾時再返嚟，我真係唔知道，不過應該唔會係呢幾年內嘅事。所以我都想記錄下啲喺度見識到同埋諗到嘅嘢，就算無人睇都好，當係留畀唔知幾多年後嘅自己睇返都好。我影相麻麻，拍片無器材，美術細胞又欠奉，咁就唯有用文字啦。其實我一路都有寫下日記，但日記寫嚟寫去，都係得嗰啲今日做過啲咩呀之類嘅嘢，我想寫啲唔同嘅嘢，想補返啲背景資料，因為我寫日記係寫畀嗰一刻嘅自己睇，好多瑣碎嘅細節可以省略，但若干年後攞返出嚟，可能真係會唔記得點解當日啲事情會咁樣發生...

我記得以前都有喺Facebook寫下note，不過啲嘢真係好小學雞，寫寫下亦都無再寫。而之前寫落嗰啲，我到而家都唔係好敢睇返...

而家之所以決定重新開始寫下嘢，其實都係多得一個唔係太熟嘅大學同學。話說佢而家去緊exchange，早幾個月嗰陣，佢見自己有時間，就決定挑戰自己每日寫一篇嘢，而家寫下寫下佢已經儲到百幾日，嗰份恆心我真係覺得好勁，我間唔中都有睇下佢寫嘅嘢，睇下睇下，佢啲文好似對住我講：”喂其實你都好多嘢可以寫，做乜唔試下啫？”

本來我係諗住返到香港先開始寫嘅，不過，呢幾日內心好似有股力量催逼我要開始，都係嘅，大部分男性都係咁，乜都話做到，但講下講下就會無咗件事。為咗唔畀自己後悔，我決定即刻開波。

下定決心寫之後，跟住落嚟就係要決定用咩語言寫，我有諗過用英文、口語定書面語寫。我亦都諗過好似我個朋友咁，每篇都用兩種語文寫，不過真係好花時間，咁搞法我只會畀藉口自己唔寫。最後，我決定用廣東話口語寫，因為廣東話始終係我母語，寫出嚟嘅情感一定係最真摯，英文版都可以寫嘅，不過我之後先再諗諗佢啦。

第一篇短短地，寫住咁多先，日後多多指教。

— — — — — — — — — — — — — — — — — — — — — — — — — — — — — — —

出文翌日補充：其實我之前有個blog，係喺去英國之前開，我丟低佢都有一段時間，我一路都以為寫到英國半路已經無寫，但啱啱入返去睇，原來我喺英國臨走嗰陣都重寫緊，係返到嚟之後先無再繼續...