【公民黨選擇性失憶/失明】

公民黨黨魁楊岳橋係11月補選當日,在fb出文(註一)。佢話:

「參與一場不受干預的自由選舉,正是最能突顯香港與中共絕不相同的行為。」

楊大狀係咪已經唔記得,點解九龍西需要舉行立法會補選?

等我提提你,係因為2016年中共叫人大釋法,導致已經當選做議員既劉小麗宣誓無效,喪失議席(註二)

楊大狀係咪睇唔到,點解本應收左山既泛民元老李卓人,又出返黎代替劉小麗參選?

等我提提你,係因為特區政府DQ劉小麗再參選資格,剝奪政治權利(註三),李卓人先以後備身份落場。

中共如此明顯、做咁多野插手我地香港選舉,咁都叫「不受干預」?楊大狀,你無野下!係咪等到有一日中共DQ埋你地自己友先叫「干預」呀?

為左拉票,不惜幫中共粉飾太平,企圖誤導你地既支持者。公民黨真係好cheap、好肉酸!


結果立法會九龍西選區補選,由口講獨立,但實際上親共/親政府既陳凱欣勝出。

兩名泛民候選人李卓人同馮檢基總共得票 105,556,夾埋都係少過陳凱欣106,457票。按以往泛民vs建制既支持比例大約五五:四五,簡單計算,有大約10%唔鍾意建制派既選民,今次無出黎含淚投泛民。

都難怪,每一次選舉,泛民班友例牌都話「保住關鍵一席」。有如街邊檔掛足十年果幅「結業清貨,一件不留」banner。大家都聽到滑晒牙,已經唔能夠以此摧谷選民出黎「含淚」投票畀你了。

何況,越黎越多人知道,所謂「關鍵一席」根本就係呃人!

因為政府提出既法案,包括香港人最驚既「二十三條立法」,其實係無需要分組點票通過(i.e.功能組別同地區直選兩個組別分別得到過半數支持)。只需全體立法會過半數支持(i.e. 有三十五個議員贊成)就得!呢度政府一直都未驚過議席數目從未過半既泛民。

而立法會議員提出既私人法案先要分組點票(例如:修改立法會議事規則,就一定以私人法案形式提出,因為政府無權咁做)。呢個亦係泛民口中「關鍵一席」既由來。可惜,2011年,正正就係因為有四個泛民議員(註四)倒戈支持建制派,導致第一次收緊議事規則夠票通過!我想問,當年你地有珍惜過「關鍵四席」咩?

更諷刺既係,當年李卓人有份投贊成票架!我地畀你出賣過一次仲唔夠,仲想有第二次?笑話!

#選擇性失憶 #選擇性失明 #平行時空 #民主黨真誠賣香港


註:
1. 〈
寧失千金〉,fb,楊岳橋

2. 〈曾裁定宣誓有效 梁君彥:人大釋法令情況改變〉,明報,2017–7–14

3. 〈選舉主任宣布三理由 裁定劉小麗參加九西補選提名無效〉,明報,2018–10–12

4. 民主黨主席何俊仁、副主席劉慧卿、支聯會主席李卓人、公民黨湯家驊

(2018–11–26)