Member preview

第二回:一心為下一代

捨棄中環生活圈,擁抱綿羊與蜜糖之地。


點解要移民紐西蘭? 其實都係政治原因。
身邊有好多朋友都問過朋友D點解要移民?

客觀講,Danny係香港撈得幾唔錯下。 年紀輕輕已經係本地大家族辦公室管理層,有自置物業,年薪七位數。如果無咩大意外,再過多十零年應該可坐到上市公司董事局職位。比起其他創業家/苦幹/父幹既人比當然略有不足,但絕對比上不足,比下有餘。以佢公屋出身,讀地區中學黎講,可以話係達標有突,充分體現香港政府同老一輩成日掛係口邊既獅子山下精神。

係咁既條件下,Danny都毅然決定放低香港所有事業。係決定移民去紐西蘭時,佢地係當地仲要無任何親戚朋友。決心同太太兩個人去當地從新開始。

咁點解仲要走?

Danny係幾個商會/義工組織浸淫多年,見得太多本來堅守公義,真誠服務社會既朋友係利益之下一個個投共。佢好怕自己有朝一日都會變到咁,而且花無百日紅,愈來愈多高級管理人員黎自中國,文化方邊劣幣驅逐良幣,未來既生存/工作環境只會更差。其實以上既野,D都有信心自己頂得住,但當Danny一考慮小朋友既將來就即刻做左決定。

香港根本唔適合小朋友成長,由細細個開始已經有大量競爭,要上興趣班爭入名校,童年已經壓力爆錶,又好可能要面對國民教育既洗腦。工作環境方面,係可見既將來唔會有好大既改善,收入中位數咁多年都無咩提升,普通年青人出黎做野後只會為左層好細既樓營營役役,講唔上任何生活質素。講到尾,香港只係適合俾叻人賺錢既地方,Danny話如果自己小朋友只係一個中庸既人,甚至係一個蠢材,無信心佢可以係香港有尊嚴地生存。

Danny既期望一直好簡單,希望小朋友可以開開心心、快快樂樂咁成長,到佢大個既時候可以養活自己,有尊嚴咁生活已經滿足。

Pine! 全部都係 Pine! 攝於基督城 Bottle Lake Forest Park

(2017–11–08)