Member preview

【老屎忽阻住晒】消防高層不滿, 「任何仁」真人版從此消失?

香港消防處前幾日推出官方吉祥物「任何仁」,仲搵個有肚腩既員工充當臨時演員,係記者發佈會著住彩藍色蒙面緊身衫玩角色扮演,貼地之餘又有喜劇感。「任何仁」迅即係網上爆紅,仲惹黎商家、公營機構、網友爭相戲仿(parody)。大家咁多年黎都未試過玩公共宣傳黎玩得咁熱鬧咁開心。

我呢頭仲諗緊班高級公務員係咪食錯藥,做乜願意冒險揀個破格設計出黎;果頭港台《視點31》就話收到消防處內部消息(註),話處方唔會再搵真人扮「任何仁」,以後只會以卡通人物形式出場。因為班高層覺得「有違正面英雄形象」「意識唔係咁好」(好明顯班消防佬都係AV「透明人間」系列fan屎黎啦!)

係人都知呢班薪高、糧準、有長俸既高級公務員一直活係平行時空。佢地既思維、技能、output都同出面私營勞工市場脫晒節。政府年年落畢直,佢地只識搞埋幾十年如一既嘉年華、同樂日,悶到爆既推廣活動。係,好似好多人參加,不過永遠都只係得班阿婆阿伯同細路仔囉。仲要係有建制派區議員配合動員、搞埋團先充撐到個場喎!

今次難得有創意,又用低成本製作。其肉酸造型,由一開發始畀網友揶揄負評,再到各方惡搞、二次創作湧現,最後網民翻兜接受,人氣急升。前後不足一日走均高山低谷、成功入屋,盡顯乜野叫「柒到盡頭便爆紅」,可以講係公共marketing前無古人。如果咁就畀一班心邪、又怕揹鑊既老屎忽ban左,真係喊出黎!大家諗下,咁多年黎,除左「垃圾蟲」「大嘥鬼」,你仲up得出第三款咁正既作品咩?


註:

消防高層唔cult得 任何仁人間消失?〉,蘋果日報,2018–11–7

(2018–11–8)