三國無雙行 – Day 11 – 兵馬俑

一早起嚟,聞到茶香。原來係其中一個室友泡茶。呢間青旅嘅人點解都咁有質素🙈當然包括我😎同佢傾咗一陣茶道,其實我主要係聽。佢話綠茶提神,紅茶安睡,每隻茶葉都有特定泡嘅温度,否則會影響口感。要揀茶葉好壞睇佢嘅葉嫩唔嫩,例如顏色鮮唔鮮、芽尖(如果我冇聽錯嘅話)係咪幼細。去飲茶嘅時候,每杯唔好飲曬(其實我唔明,會有分別咩?🧐),而且每杯都唔同味(呢個真),可以喺口到品嚐一陣先飲。其實比起飲茶,我更享受嘅係成個過程嘅交流,成見事文青曬😂

然後我諗住出發就發現我整唔見咗西安朋友嘅西安通(姐係八達通)🤦‍♂️超級大意。跟住就出發兵馬俑。真係超級多人,好難受。俾大家玩個遊戲,估下下圖嘅字係咩。

其實兵馬俑真係好勁,佢根本唔係一個墓咁簡單,佢係一個地下宮殿嚟!依家挖到9號坑,都未挖完。而且真正完成修復嘅只有第1個挖出嚟嘅坑,第2個幾乎只完成修復一少部分。

其實我喺到諗秦始皇係點諗到要成個軍隊陪葬嘅呢?😂我諗咗好耐,嗱,即係咁,人地死,係後人幫佢立個墓,係要嚟紀念佢、悼祭佢,咁係後人嘅工作嚟。秦始皇就即位開始幫自己建墓,咁姐係點呢?我死,然後我紀念返自己,咁啲後人做咩呀lol? 咁秦始皇諗諗下,唔得喎我死咗,你哋咁得閒,咁…咁落嚟陪我啦!得閒打個麻雀都好呀嘛真係,成千上萬枱一齊打,成個地府都無覺好訓,呢鋪真係佔領地府。原來秦始皇幫自己挖墓就係想佔領地府,咁所以香港前幾年啖有班年青人被人話自挖墳墓囉,咁唔怪得另一群人神經咁敏感啦,香港原來有咁多人想做秦始皇😎

好!講完廢話,其實睇返佢生平,細細個就係人質之子嘅身分,秦趙兩國關係唔好,都唔方好食好煮,亦唔會受當地人歡迎,從小就要堅強,學識保護自己。然後13歲就登位,要唔做扯線公仔,就要好好磨練自己,到最後佢最偉大嘅成就就係作為史上第一個統一全國嘅皇帝,基本上可以話呢件事係建構佢自己最自豪嘅一面,可想而知,佢會挖個咁嘅地下宮殿俾自己都同佢成長背景有關。

雖然話挖到9號坑,但其實𠵱家可以睇嘅1、2、3號坑,第1個係軍隊列陣,第2個都係軍隊但比較多騎兵同弓兵,第3號坑規範比較細係將軍墓。講真我都幾佩服啲專家,竟然可以喺啲碎片揾得返係邊舊打邊舊。而且你喺現場會睇到佢哋係點修復,佢哋嘅工作台其實就喺個坑入面,亦會記曬號碼。但聽過𠵱家已經唔再挖,因為目前技術唔夠勁,會令到啲兵馬俑出土嘅時候因為接觸陽光同空氣產生化學作用,會整壞佢哋。但講開又講,佢1、2、3號坑都係咁俾人參觀,我見到啲人會揼垃圾落去,其實都好危險。

其實古人嘅智慧真係好勁,可以有咁細緻嘅手工藝,甚至佢哋係有顏色。你要知秦朝係講緊2000幾年前,全部都人手做,真係𠵱家都唔知有無人做得返出嚟。

Btw,有人問我啲兵馬俑有無味,其實我都係唔知,一嚟我嚟佢哋好遠,二係呢到好多人!真係太多人啦,跟本唔容許你慢慢睇啲簡介,其實成個體驗都幾差,因為假如兵馬俑有味,你會聞到汗味多過兵馬俑嘅味。🤮

話時話,成個兵馬俑影得最靚嘅唔係喺兵馬俑到影,而係喺紀念品店到影😂其實我唔講,呢張相都扼得下人,啲人去到就會發現被人扼。

結論就係諗清楚先好嚟兵馬俑,可以睇嘅嘢唔多。要嚟就幾方便嘅西安城有公交,揾地圖最穩陣,門票係150人仔。離開兵馬俑,西安朋友知道我唔係好食得慣西安嘢食,就帶咗我去食日式咖哩,又真係幾好食,鋪頭又靚。食完返到青旅又多一個人入住,佢請我哋食西瓜,仲寫咗張明信片俾我。呢間西安壹方青旅真係好好!

開估返,一開始個幾隻字係 – 秦始皇帝陵文物陳列廳


遊 記 軼 事

搭車去兵馬俑途中,有一個自稱係青年志願軍嘅上咗車。佢幫我地介紹兵馬俑附近唔同嘅景點,其實幾好,原來喺兵馬俑附近有個山叫驪山,山頭有一點嘢凸出嚟嘅建築就係烽火戲諸侯嘅烽火台。然後原來秦始皇真身係葬喺兵馬俑隔離嘅一個小山頭。同埋附近有一個相傳係楊貴妃沖涼嘅地方叫清華池。其實有咩咁特呢?仲要收80人仔入場,你話睇楊貴妃沖涼就真係驚奇啦。之後佢最近有個推廣,兵馬俑附近有一個鴻門宴嘅景點,可以免費入場同接送。但無去,唔知好唔好睇,感覺都係搭建出嚟。但點都好,我覺得青年志願軍真係幾好,好似多咗個導遊咁,但佢地都好辛苦。

另外,我都有發現另一樣嘢。西安朋友對西安歷史好熟識,對佢地嚟講成個西安就係佢哋嘅家,諗返自己唔好講香港,對屯門有幾熟識呢?當然香港嘅歷史唔長,加上歷史因素香港人嘅本土意識基本係近10年20年先開始有。但我覺得如果我哋真係覺得自己住喺到有感情,係應該要研究自己住嘅地方嘅歷史。不過當然,香港嘅情況真係唔係好令我對呢個地方有感情,我成日會諗有得移民我會移民。我對香港人呢個身分認同真係唔強。但到底係因為有感情所以想認識呢到,定因為認識呢到,所以有感情?永遠都係互為因果,但至少,返香港之後,我要好好讀下香港歷史,人哋問我香港係點,我至少有自己對自己住嘅地方有一番見解。