八重山寨王 之 華為禁令
本八重山寨王並不是手機製造業從業員，但對於華為禁令與及Google、高通及博通聲名的中止合作，坊間吃瓜群或花生友既睇法，認為有呢個「華為包圍網」睇你呢間萬惡偷data淨係識抄唔駛R&D公司點死，卻是有一點意見想講一下。
從商務合作既角度去睇，大統領禁令一出，各大同華為有合作伙伴關係既伙伴管理們理應與管理層及法務等等商討形勢、潛在風險以及下一步行動等等。跟住就再同華為相關人仕接觸，商討雙方對於中止關係各自既睇法、以之後既影響、各種可能及善後工作。
各美國科技公司與華為係合作伙伴，關係有幾愉快唔知，但大家本來既商務關係就係建基於各取所需，並非敵我對立（如果係既駛鬼等到大統領落法令咩）。中止合作絕非「華為你都有今日！我要代替美國來懲罰你！」，因為就算唔係各有損失，都起碼搞到大家要重新再打一打算盤，「無啦啦搵啲咁既野黎搞呀⋯⋯」
Google中止合作，華為只可以用AOSP（Android Open Source Project），沒有了要Google授權才能用的Play Services，金翅仆街鳥！
首先，山寨王先問左自己一個問題：點解大統領玩野幾日後，出鞘第一刀的是Google。
山寨王認為原因係華為同Google之前最主要既合作就係Android既授權以及相關聯既Google Play Service，而雙方應該都同意，即使中斷授權，已出貨在用家手上既機繼續使用雙方都冇法律風險。
至於新機，「OS同Service果啲最後一棒，你諗定硬件啲料邊到黎先再講啦！」
中斷授權其實對Google影響暫時冇乜（損失既係唔知有冇幾多既權金同埋華為之後原本華為出新機既巿場佔有率，但其實影響是相對intangible，「可以到時再睇下點」），對華為既影響雖深遠但亦都係相對慢性。
所以第一刀由Google輕輕𠝹落去，山寨王是認為因為即時影響較少，比較快諗掂，並唔係Google特別有正義感。
連高通、英特爾等等晶片商都中止合作！華為手機等變廢鐵。
高通、英特爾與博通等晶片商為第二批宣佈中斷為華為合作，停止向華為提供晶片。然後？巿場話你知然後會點，就係晶片商們既股價即瀉。
睇圖就知點解。從美國呢批晶片商黎講，唔想同華為中止合作既意念就更強，大佬，好地地冇左8%收入喎？「你老闆無啦啦扣起你8%人工你都唔順氣啦。」何況，如高通在modem上雖然仍在巿場上保有領導地位，但SoC上其實華為自己以至「山寨王既同業」聯發科都亦步亦趨，如果戰場拓大，將整個中國巿場既中高端SoC真係有後來者搶走，「咁就真係多得大統領唔少」。
而另一方面，高通等美國公司其實仍然會授權華為用佢既專利、收取「高通稅」等權金。
因為出口控制法並不包含知慧財產權，大家都覺得可以繼續，亦預料美國當局唔會反對。你以為啲晶片公司真係想玩死華為？就算你有十隻會屙金蛋既鵝，你都唔會想整死一隻啦大佬。「果一隻就係負責頂住你老婆每個月買既新包包，冇得買？好慘架。」
根本各晶片公司及技術供應商都無意搞個甚麼「華為包圍網」。所以，山寨王幾相信其實晶片商都唔多想見到華為啲手機變廢鐵既。
總之，山寨王幾相信一眾科技公司都係會押注呢個禁令玩唔到幾耐，係有得傾。除左華為既5G技術係強大既談判籌碼，最重要係根本大家都知，所有同華為有合作既美國公司，都唔多想呢件事會發生，當今科技業界既技術供應鍊咁複雜，「根本就冇得一刀切咁玩，可以傷人十乘而唔駛自損三、五、七乘。」
所以大家分析「冇左Google Play Service咁華為既機在國外巿場成為廢鐵」其實唔多現實：因為Google同華為本身都冇呢個意願去打破現狀，更何況其他如高通、博通等等係華為身上搵唔少錢既公司？
睇相佬呃你十年八年，八重山寨王雖坐鎮八重山，但亦非一無所知。本山寨王唔會話下個星期禁令就玩完，但肯定並非各位浩然天地、正氣長存既網友想像既正邪之爭。
你睇，冇兩下Google就唔駛停住啦，「仲咁興奮係到解拆咁多黎做乜？」
