Game of Thrones 第七季最後一集

捱眼瞓,睇完 Game of Thrones 第七季最後一集,幾有驚喜,總括黎講係好睇嘅,而且想喺今季見到嘅嘢,都有齊了。而佢最終結局,亦都好適合作為第七季至第八季之間嘅橋樑。Winter is here。

對於整季嘅感覺係,第七季極力嘗試去將之前嘅所有嘢做個小總結,解釋謎團,促成事件發生,以備第八季嘅連場大戰同最終結局 — — 亦即,邊一個會登上鐵王座,講左十世嘅所謂 Iron Throne。

或者正因為第七季目的係咁,所以無可奈何地,劇中時間事件都推進得好快,引致唔少問題,包括劇情細密度不足、經常出現「瞬間轉移」、邏輯推演惹人垢病、各角色份量比重到喉唔到肺,同埋對白唔夠利害等等,可以逐樣數。缺乏原著指導,編劇唯有自己基於文本種種發展劇情,唔係話唔好,但始終有粗疏之處囉。

不過,話唔說盡,第七季都算係咁啦,如果撇除上述種種問題,從畫面同劇情張力睇,Game of Thrones 依然係一部好犀利嘅電視劇。自從第六季第九集 Battle of the Bastards 被喻為電視史上「最有電影感」嘅場面起,Game of Thrones 喺戰爭打鬥上都無令人失望過(至少對我黎講啦)。

IMDB 上得到 9.9 分嘅第七季第四集 The Spoils of War 真係幾好,睇到好緊張,有「龍擊長空」,有「人間煉獄」,氣勢絕頂,喺果種絕對武力底下,人點可以唔屈服?呢啲場面背後嘅係見到劇組精心製作*。

當然,去到爭議好大嘅第六集 Beyond the Wall 就係另一樣嘢。同樣係有奮力大戰,人鬼撕殺,但係由於有地方唔合邏輯,惹人質疑,咁就令到原本可以完美地好好睇嘅東西,都可惜有瑕疵。

據講話第八季,亦都係最後一季,有可能去到 2019 年先會有,而且得六集,作為 fans 真係要慢慢等下。去到屆時開播,Game of Thrones 已有 8 年歷史,由 2011 年播到依家,都算係有今生無來世啦。希望嘅係,劇組醒醒定定,唔好再犯下果啲小錯誤 — — 畢竟 Game of Thrones 真係呢十年最受矚目同期待嘅電影劇。

我都唔知點解可以唔劇透底下鳩講到咁多嘢。離真正結局仲有年幾兩年,受類中世紀背景吸引、魔幻、戰爭、權鬥吸引嘅、想睇嘅自然會去追返,唔想睇嘅講咩都唔會睇啦。

*見 Youtuber Nerdwriter 講點樣 「Recreating Game Of Thrones’ Dragon Battle」 https://youtu.be/hcfGViXv4YQ

One clap, two clap, three clap, forty?

By clapping more or less, you can signal to us which stories really stand out.